JOKWA 16

Nje Yesu a bolino̱ ponda a tano̱ o wase?

OKA

Bato jita ba mo̱nge̱le̱ te̱ Yesu, ba me̱ne̱ nde mwe̱nge̱ ma muna, muto̱ped’a mudī ńe dibie̱ to̱ moto ńena ńe o wo̱. Nde jombwedi te̱ longe̱ lao ponda a tano̱ o wase, mo̱ je ná di bata bia nja eno̱ na mbale̱ e? O din jokwa, di me̱nde̱ kwalea ońola mambo mō̱ ma mweńa Yesu a bolino̱ na ne̱ni nika ńeno̱ ná ńongwane̱ wa.

1. Nje e ta ebol’a boso ya Yesu e?

Ebol’a boso ya Yesu e ta nde ná a langwe “myango ma bwam ma janea la Loba.” (Langa Lukas 4:43.) Myango ma bwam a langono̱ mye nde ná Loba a me̱nde̱ te̱se̱ janea lena di me̱nde̱ bo̱le̱ ndutu ye̱se̱ mbel’a moto e be̱nno̱. a Yesu a bīse̱ bato mu mwe̱ndi ma bwam esibe̱ wo̱lo̱, mbu milalo n’epasi.—Mateo 9:35.

2. Ońola nje Yesu a po̱ngino̱ betańsedi e?

Bibe̱l e malangwa jita la ‘bebolo ba ngińa na betańsedi na byemban bena Loba a bolino̱ tongwea na Yesu.’ (Bebolo 2:22) Na ngińa Loba a bolino̱ mo̱, Yesu a lo̱ki mùdi munde̱ne̱, a dese̱ lokoli la bato, a bo̱lise̱ baboedi, a pumbwe̱le̱ na bawedi. (Mateo 8:23-27; 14:15-21; Marko 6:56; Lukas 7:11-17) Betańsedi ba Yesu be lee̱ ná bwē ná Loba nde a lom mo̱. Be lee̱ pe̱ ná Yehova a be̱n ngińa o bo̱le̱ ndut’asu ye̱se̱.

3. Njika belēdi di mabusane̱no̱ o mbadi Yesu a die̱le̱no̱ longe̱ lao e?

Yesu a sengane̱ Yehova ponda ye̱se̱. (Langa Yohane 8:29.) To̱ na mitakisan a kusino̱, Yesu a boli nje ye̱se̱ Sango ao a baise̱no̱ mo̱ ná a bole, nate̱na o kwed’ao. A lee̱ ná bato ba benama be ná ba bolea Loba, to̱ ba be̱ nde o bete̱medi ba ndutu. Yesu a dī so̱ “eyembilan ná [di] bupe̱ matanga mao.”—1 Petro 2:21.

ALA O NJIBA

Ombwea ne̱ni Yesu a langono̱ myango ma bwam, a po̱ngo̱ pe̱ betańsedi.

4. Yesu a lango myango ma bwam

Yesu a dango bebwea ba kilometa o mangea ma dibudu, a langwea bato be̱se̱ a tano̱ a dongame̱ne̱ myango ma bwam. Langa Lukas 8:1, nde lo kwaleye pe̱ ońola min myuedi:

Mo̱ buka te̱ bato bena ba ta ba ko̱to̱me̱ o sengane̱ mo̱ nde Yesu a te̱ye̱no̱ dikalo e?
Njika miwe̱n Yesu a po̱ngino̱ ná a dongame̱ne̱ bato e?

Loba a ta a bīse̱ ná Mesia a me̱nde̱ langwa myango ma bwam. Langa Yesaya 61:1, 2, nde lo kwaleye pe̱ ońola min myuedi:

Ne̱ni Yesu a londise̱no̱ y’edinge̱ e?
Mo̱ o mo̱nge̱le̱ ná bato ba be̱n ńo̱ngi o senga mi myango ma bwam we̱nge̱ e?

5. Yesu a boli belēdi ba mweńa

O sumo te̱ langwa la myango ma bwam ma Janea la Loba, Yesu a boli pe̱ belēdi be mongwane̱. Jombweye ngus’a byembilan o ekwal’ao omo̱ń a mudongo. Langa Mateo 6:14, 34 na 7:12, nde lo kwaleye pe̱ ońola min myuedi:

Njika malea ma mongwane̱ Yesu a bolino̱ o ben bepasi e?
Mo̱ o mo̱nge̱le̱ ná ma malea me pe̱ ná mongwane̱ bato we̱nge̱ e?

6. Yesu a po̱ngi betańsedi

Yehova a boli Yesu ngińa o po̱ngo̱ betańsedi jita. Ná we̱ne̱ eyembilan ewo̱, langa Marko 5:25-34 to̱ ombwa SINIMA. Ombusa nika kwalea ońola myuedi mi mabupe̱.

SINIMA: Muboed’a muto a mabo̱lisabe̱ (5:10)

Nje nu muto nu ta nu boa a tano̱ a dube̱ e?
Nje e matape̱ wa o ben betańsedi e?

Langa Yohane 5:36, nde lo kwaleye pe̱ ońola min myuedi:

Betańsedi ba Yesu be ‘boli mboṅ’ to̱ be lee̱ ná nje ońol’ao e?

Mo̱ o ta o bia nika e?

Jita la mambo di bino̱ jombwea Yesu di tilabe̱ nde o yin kalat’a Bibe̱l ine̱i: Mateo, Marko, Lukas na Yohane. Mutiled’a kalati te̱ a tili mambo mō̱ jombwea Yesu mena bane̱ ba si tilino̱. Di langi te̱ yi kalati ine̱i di mabe̱ne̱ so̱ṅtane̱ la bwam la longe̱ lao.

MATEO

nde a se̱le̱ tile̱. Kalat’ao e makwalea nde jita ońola belēdi ba Yesu, tobotobo be a bolino̱ jombwea Janea la Loba.
MARKO

nde a tili kalati ńe esungu buka ye̱se̱ oteten a yi ine̱i. E malangwa jita la mambo ma mańaka ma bolan o longe̱ la Yesu.
LUKAS

a makika mweńa ma muka na ne̱ni Yesu a tano̱ ombwea bito.
YOHANE

a lango mambo jita Yesu a kwaledino̱ na mako̱m mao na bato bape̱pe̱; nik’e mongwane̱ biso̱ o bia njika pat’a moto Yesu a tano̱.