AYÈGÈ 16

Éyòng a nga be a si, dzé Yésus a nga bò?

VOGOLO A

Abui bot ba yen Yésus ane ébobòg mòn, bevòk ane mfefeg profet, ngeki ane é mot a dug ai awu. Dzé fe éfe bi ne dzam yègè éyòng bia bebe énying dzié ya si? Ayègè di, bia yi yen abui mam Yésus a nga bò ai akia afé mam meté me ne bia dzam vòli.

1. Ésié Yésus é nga be éfé?

Ésié é nga be nfi abui asu Yésus é nga be na “a yeren mbembe foé ya Édzoé Zamba” (Langʼa Lukas 4:43). Yésus a nga tsam mbembe foé na, Édzoé Zamba ya yi mana vaa mindzug mise a si. a Yésus a nga kat bot mbembe foé té a tang mimbu milè ai étun (Matéus 9:35).

2. Dzé mesimba me Yésus me nga lere?

Bibel a lere “ngul mesimba, biyegen bimam, ai mendem Zamba a nga bò a mò moé [Yésus]” (Mimbòen mi apostel 2:22). Ai ngul Zamba, Yésus a nga telé nkulu, a tòngʼò bakura bebot, a lede minkokòn, a vele fe mimbim (Matéus 8:23-27; 14:15-21; Markus 6:56; Lukas 7:11-17). Mesimba me Yésus me nga lere a sang na Zamba nnye a nga lom nyè. Mesimba me Yésus me nga lere fe na Yéhova a bele ngul ya mana mindzug mise.

3. Ayègè afé bia nòng énying Yésus?

Yésus a nga bò Yéhova mewog abog ase (Langʼa Yohannes 8:29). A nga bò é dzam ase Ésia a siligi nyè. Énying dzié ése, Yésus a nga bò nyien Ésia woé tò éyòng a nga be a tele a mindzug. A nga lere hm na mot binam a ne ke osu na a bò Zamba ésié afiangʼen bò mindzug. Ai zen té Yésus ‘a nga lig bia mvulna mbol yi na bi tong metele mekol moéʼ (1 Pétrus 2:21).

TUENE FAG

Yene akia afé Yésus a nga tsam mbembe foé, a bò fe ngul mesimba.

4. Yésus a tsam mbembe foé

Yésus a wulugu mintet bekilimera a ndzòng mbulug, a kele a kat abui bot mbembe foé. Langʼa Lukas 8:1 ai yalen minsili mi tsaa mi:

Éyòng Yésus a tsama mbembe foé, ye a nga be a yegele ve é bot be nga zu nyè vogolo?
Mengul mefé Yésus a nga ve asu yi na a ke a toben ai bot?

Abui mimbu osusua, Zamba a nga kuli na Messias a yi yeren mbembe foé. Langʼa Yésaya 61:1, 2 ai yalen minsili mi tsaa mi:

Akia afé Yésus a nga dzali nkulen adzo té?
Ye wò tsog na bot ba yangʼen ai mbembe foé é melu ma?

5. Yésus a nga yegele bebebela be ne nfi

Yésus a nga tsam mbembe foé ya Édzoé Zamba, a vaa fe bot ayègè a ne nfi. Ntam nòng memvulna ya ékat mam ya nkol. Langʼa Matéus 6:14, 34 ai 7:12 ai yalen minsili mi tsaa mi:

Melebega mefé me ne nfi a Yésus a ve é bifus bi Bibel bi?
Ye wò yen na melebega meté me ne bia dzam vòli melu maan ma?

6. Yésus a nga bò mesimba

Yéhova a nga ve Yésus ngul na a bò abui mesimba. Bebege mvulna dzia, langʼa Markus 5:25-34 ngeki na bebege VIDÉO. Amvus ya été, yalen minsili mi tsaa mi:

VIDÉO: Yésus a led nkokòn mininga (5:10)

Ndi fé nkokòn mininga ya vidéo o nga be o bele?
Dzé ya namba wò abui asimba té?

Langʼa Yohannes 5:36 ai yalen a nsili hi:

Mesimba Yésus a nga bò ma “boala” dzé é bebege nyè?

Ye o mbe yeme dò?

Abui mam bia yem me bebege Yésus ma sò a bekalara benyii ya Bibel ba loé na bifangelium: Matéus, Markus, Lukas, ai Yohannes. Ntil éfangelium ose a mbe tili mam kan kan me bebege Yésus. Éyòng wò lang bekalara benyii beté, wò yi bi évegele ya énying Yésus.

MATÉUS

a ne é mot osu a nga til éfangelium dzié. Été a dang ngoné minyegelen mi Yésus a dang dang é mam a nga dzo me bebege Édzoé Zamba.
MARKUS

a nga til éfangelium ya dang étun aloro é bi bise bivòk. A nga lèè abui minlang ya énying Yésus.
LUKAS

a lere bia akia afé ngogelen é nga be nfi asu Yésus ai akia afé a nga mvamen ai bininga.
YOHANNES

a kat bia minlang Yésus a karege bi ai bemvoé boé ai é bot bevòk. Nala a vòli bia na bi yem akia mot Yésus a nga be.