ADZESUA 16
Aber A Jesus Wɔ Asaase Do No, Ebɛnadze Na Ɔyɛe?
Sɛ ebɔ Jesus ne dzin a, dza ɔba nyimpa pii hɔn adwen mu nye abɔdomaba bi a wɔwoo no too nguambuw mu, nkɔnhyɛnyi bi a nna onyim nyansa, anaa ɔbarimba bi a wokum no yayaayaw. Naaso, sɛ yesusu bra a ɔbɔbɔe wɔ asaase do no ho a, ana yebotum esua biribi efi mu? Wɔ adzesua yi mu no, yebosusu ndzɛmba etsitsir a Jesus yɛe no bi ho, na yaahwɛ dɛ mbrɛ dza ɔyɛe no botum aboa wo.
1. Nna Jesus n’edwuma tsitsir nye dɛn?
Nna Jesus n’edwuma tsitsir nye dɛ “[ɔbɛka] Nyankopɔn ahenman ho nsɛmpa.” (Kenkan Luke 4:43.) Asɛmpa a ɔkae nye dɛ Nyankopɔn dze ahendzi, anaa aban bi besi hɔ, na dɛm aban no na obeyi adasamba haw nyinara efi hɔ. a Jesus dze mfe ebiasa na fa yɛɛ edwumadzen dze kaa dɛm nkuranhyɛsɛm yi kyerɛɛ nkorɔfo.—Matthew 9:35.
2. Ebɛnadze ntsi na Jesus yɛɛ anwanwadze ahorow?
Bible no ka ‘ahoɔdzendze nye anwanwadze nye nsɛnkyerɛdze pii a Nyankopɔn nam Jesus do yɛe’ ho asɛm. (Asomafo Ndwuma 2:22) Jesus maa ehum kɛse taa dzinn, ɔsaa ayarfo yarba, na onyaan ewufo mpo. Nyankopɔn no tum na ɔdze yɛɛ iyinom nyinara. (Matthew 8:23-27; 14:15-21; Mark 6:56; Luke 7:11-17) Anwanwadze ahorow a Jesus yɛe no maa ɔdaa edzi dɛ Nyankopɔn na ɔsomaa no. Ɔsan so ma yehu dɛ Nyankopɔn wɔ tum a ɔdze beyi hɛn haw nyina efi hɔ.
3. Ebɛnadze na yebotum esua efi Jesus n’asetsena mu?
Papa mu o, bɔn mu o, nna Jesus tsie Jehovah. (Kenkan John 8:29.) Aber a Jesus wɔ asaase do no, ɔyɛɛ biribiara a n’Egya kaa dɛ ɔnyɛ no. Ɔwɔ mu dɛ nyimpa pii soɛree tsiaa no dze, naaso ɔkɔr do ara yɛɛ dza n’Egya kae no kesii dɛ owui. Jesus n’asetsena ma yehu dɛ, sɛ nyimpa hyia nsɛndzendzen dɛ dɛn ara mpo a, wobotum asom Nyankopɔn ma aayɛ yie. Jesus nam iyi do “gyaa [hɛn] esusudo dɛ [yendzi] n’anamɔn ekyir” pɛɛ.—1 Peter 2:21.
PƐNSAPƐNSA MU KƆ EKYIR
Ma yɛnhwɛ kwan a Jesus faa do kaa asɛmpa no kyerɛɛ afofor na ɔyɛɛ anwanwadze ahorow.
4. Jesus kaa asɛmpa no kyerɛɛ afofor
Jesus faa huntuma kwan do twaa akwansin ɔhaha pii mbrɛ ɔbɛyɛ a ɔbɛka asɛmpa no akyerɛ nyimpa dodow biara a ne nsa bɛka hɔn. Ma yɛnkenkan Luke 8:1, na yensusu nsɛmbisa yi ho:
-
Aso nyimpakuw bi a nna woehyia mu wɔ faakor nkotsee na Jesus kaa asɛmpa no kyerɛɛ hɔn?
-
Ebɛn mbɔdzen na Jesus bɔe ama oeenya nyimpa?
Nyankopɔn hyɛɛ nkɔm dɛ Messiah no bɛka nsɛmpa. Ma yɛnkenkan Isaiah 61:1, 2, na yensusu nsɛmbisa yi ho:
-
Nkɔnhyɛ yi sii dɛn nyaa mbamu wɔ Jesus do?
-
Ehwɛ a, ohia dɛ nyimpa a wɔwɔ hɔ ndɛ no so tse nsɛmpa yi bi a?
5. Mfaso wɔ nsɛm a Jesus kyerɛkyerɛe no do
Sɛ nsɛmpa a Jesus kae no da nkyɛn a, ɔdze afotu a obotum aboa nyimpa so mae. Ɔdze afotu a ɔtsetse dɛm bi mae wɔ ne Bepɔw do Asɛnka a wɔagye dzin paa no mu. Yensusu bi ho. Ma yɛnkenkan Matthew 6:14, 34 na 7:12, na yensusu nsɛmbisa yi ho:
-
Jesus dze afotu ahorow a obotum aboa nyimpa mae wɔ kyerɛwnsɛm ahorow yi mu, ibi nye dɛn?
-
Ehwɛ a dɛm afotu yi botum aboa hɛn ndɛ?
6. Jesus yɛɛ anwanwadze pii
Jehovah maa Jesus tum ma ɔdze yɛɛ anwanwadze pii. Ma yɛnkenkan Mark 5:25-34 anaa ma yɛnhwɛ VIDEO yi, na yɛnhwɛ anwanwadze ahorow yi mu kor. Yewie a, yebosusu nsɛmbisa a odzidzi do no ho.
-
Nna ebɛnadze na ɔbaa a ɔwɔ video no mu no gye dzi?
-
Ebɛnadze na w’enyi gye ho wɔ anwanwadze yi ho?
Ma yɛnkenkan John 5:36, na yensusu asɛmbisa yi ho:
-
Anwanwadze a Jesus yɛe no dzii ebɛn “dase,” anaa ɔkaa dɛn faa noho?
Ana inyim?
Nsɛm pii a yenyim fa Jesus ho no, ofi Bible mu nwoma ahorow a wɔfrɛ no Nsɛmpa no mu. Dɛm nwoma no nye Matthew, Mark, Luke, na John. Bible akyerɛwfo yi mu biara kyerɛɛw biribi soronko bi faa Jesus ho. Sɛ yɛkenkan dɛm nwoma ahorow anan yi nyina a, ɔma yehu Jesus n’asetsena ho nsɛm bi a ɔyɛ enyika.
-
MATTHEW
na ɔkyerɛɛw Nsɛmpa anan no mu dza odzi kan. Ɔkaa Jesus ne nkyerɛkyerɛ ho nsɛm pii, nkanka dza ɔkyerɛkyerɛe faa Nyankopɔn n’Ahendzi ho no.
-
MARK
na ɔkyerɛɛw Nsɛmpa anan no mu dza ɔyɛ tsia. Enyikasɛm pii a osisii no, ɔkyerɛɛw ho nsɛm.
-
LUKE
ma yehu mbrɛ nna mpaabɔ ho hia Jesus nye dɛ mbrɛ Jesus nye mbaa dzii.
-
JOHN
kyerɛɛw nkɔmbɔ a Jesus nye n’anyɛnkofo nye afofor dzii no ho nsɛm pii. Dɛm nsɛm yi boa hɛn ma yehu suban a nna Jesus wɔ.
BINOM KA DƐ: “Jesus dze, ɔnoara nye Nyankopɔn.”
-
Edwen ho dɛn?
DZA ESUA
Jesus kaa Nyankopɔn n’Ahendzi no ho asɛm, ɔyɛɛ anwanwadze pii, na otsiee Jehovah wɔ biribiara mu.
Mbobɔdo
-
Jesus baa asaase do no, ebɛn edwuma tsitsir na ɔbɛyɛe?
-
Anwanwadze a Jesus yɛe no kyerɛɛ dɛ ɔyɛ woana?
-
Jesus dze afotu a mfaso wɔ do mae. Ibi nye dɛn?
HWEHWƐ PII KA HO
Jesus baa asaase do no, nna ebɛnadze na ɔtaa ka ho asɛm?
“Nyankopɔn N’Ahendzi—Siantsir A No Ho Hia Jesus” (Ɔweɔn-Aban, October 1, 2014)
Hwɛ siantsir a yebotum agye edzi dɛ anwanwadze ahorow a Jesus yɛe no nnyɛ anansesɛm bi kɛkɛ.
“Jesus N’anwanwadze Ahorow No—Ebɛnadze Na Ibotum Esua Efi Mu?” (Ɔweɔn-Aban, July 15, 2004)
Banyin bi kenkaan mbrɛ nna Jesus dwen nyimpa ho no ho adze, na iyi sesaa n’abrabɔ. Kenkan ho asɛm.
Ndzɛmba a Jesus yɛe wɔ asaase do no, wɔahyehyɛ ne nyinara ndzidzido. Hwɛ ho asɛm.
a Adzesua 31-33 bɛka Nyankopɔn n’Ahendzi no ho asɛm akɔ ekyir.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
