LESONI 16
Na Cava e Cakava o Jisu ni Bula e Vuravura?
E levu era nanuma ni dua ga na gonedramidrami o Jisu, e dua na parofita vuku, se dua na turaga sa voleka ni mate. Ia vakacava eda rawa ni vulica e levu tale na ka me baleti koya nida dikeva na nona bula e vuravura? Ena lesoni qo, eda na dikeva eso na ka bibi e cakava o Jisu kei na kena yaga vei iko.
1. Na cakacaka cava e bibi duadua vei Jisu?
E bibi duadua vei Jisu me ‘tukuna na itukutuku vinaka ni Matanitu ni Kalou.’ (Wilika Luke 4:43.) E vunautaka na itukutuku vinaka ni na tauyavutaka na Kalou e dua na matanitu, ena walia na noda leqa kece na kawatamata. a E ogaoga tiko ga o Jisu me tolu veimama na yabaki, me vunautaka na itukutuku vinaka qori.—Maciu 9:35.
2. Na cava na inaki ni nona cakamana o Jisu?
E tukuni ena iVolatabu ‘e levu na cakamana kaukaua, na cakacaka veivakurabuitaki, kei na ivakatakilakila e cakava na Kalou ena vuku i Jisu.’ (Cakacaka 2:22) E solia na Kalou na kaukaua vei Jisu me lewa na draki, vakani ira e vica vata na udolu, vakabulai ira na tauvimate, e vakabulai ira mada ga na mate. (Maciu 8:23-27; 14:15-21; Marika 6:56; Luke 7:11-17) E vakadinadinataki ena cakamana i Jisu ni talai koya mai na Kalou. E vakaraitaka tale ga ni tu vei Jiova na kaukaua me vakaotia kece na noda leqa.
3. Na cava eda vulica ena ivakarau ni bula i Jisu?
O Jisu e dau talairawarawa vei Jiova ena ka kece e cakava. (Wilika Joni 8:29.) Ni tusaqati mada ga, e yalodina ni cakava na ka kece e tukuna vua o Tamana me yacova nona mate. E vakaraitaka nida rawa ni qarava na Kalou ke da sotava mada ga na ituvaki dredre. E laiva gona o Jisu e dua ‘na ivakarau meda muria voleka na weniyavana.’—1 Pita 2:21.
VAKEKELI
Dikeva na sala e vunautaka kina o Jisu na itukutuku vinaka kei na nona cakamana.
4. E vunautaka o Jisu na itukutuku vinaka
E taubaletaka o Jisu e vica vata na drau na maile na gaunisala kuvu me vunautaka na itukutuku vinaka vei ira e levu. Wilika Luke 8:1, qai veivosakitaka na taro qo:
-
E vunau ga o Jisu vei ira na soqoni yani mera rogoci koya?
-
Na cava e cakava o Jisu me vaqarai ira na tamata?
Sa tukuna tu mai na Kalou ni na vunautaka na itukutuku vinaka na Mesaia. Wilika Aisea 61:1, 2, qai veivosakitaka na taro qo:
-
E vakayacora vakacava o Jisu na parofisai qori?
-
O nanuma ni dodonu mera rogoca tale ga nikua na itukutuku vinaka qori?
5. E tukuna o Jisu na ivakavuvuli yaga
E vunautaka o Jisu na itukutuku vinaka ni Matanitu ni Kalou, e tukuna tale ga na ivakavuvuli yaga. Dikeva e vica na ivakaraitaki ena nona vunau kilai levu ena ulunivanua. Wilika Maciu 6:14, 34 kei na 7:12, qai veivosakitaka na taro qo:
-
Na ivakavuvuli yaga cava e tukuna o Jisu ena tikinivolatabu qo?
-
Cava o nanuma, se yaga tiko ga nikua?
6. E cakamana o Jisu
E solia o Jiova na kaukaua vei Jisu me cakava e levu na cakamana. Raica e dua na kena ivakaraitaki ni o wilika na Marika 5:25-34 se sarava na VIDIO, qai veivosakitaka na taro tarava.
-
Ena vidio, na cava e vakadeitaka na marama tauvimate qori?
-
Na cava o qoroya me baleta na cakamana qo?
Wilika Joni 5:36, qai veivosakitaka na taro qo:
-
Na cava e “vakadinadinataka” na cakamana i Jisu?
O bau kila?
Eda kila e levu na ka me baleti Jisu ena va na ivola ena iVolatabu e vakatokai me Kosipeli, na Maciu, Marika, Luke kei na Joni. E duidui na ka eratou vola na dauvola Kosipeli me baleti Jisu. Ni biu vata kece na ka eratou vola, e levu na ka eda kila me baleti Jisu.
-
MACIU
e vola eliu na nona Kosipeli. E tukuna e levu na ka e vakavuvulitaka o Jisu, vakabibi na nona vunautaka na itukutuku vinaka ni Matanitu ni Kalou.
-
MARIKA
e lekaleka na ka e vola. E talanoataka na veika lelevu a yaco.
-
LUKE
e vakabibitaka na masu kei na sala e kauaitaki ira kina na yalewa o Jisu.
-
JONI
e tukuna na itovo i Jisu, e kilai qori na nona dau veivosaki o Jisu kei ira nona itokani voleka kei ira eso tale.
KA ERA KAYA ESO: “E turaga vinaka o Jisu, ia e sega ni Mesaia.”
-
Na cava o nanuma?
KA O VULICA
E vunautaka o Jisu na Matanitu ni Kalou, e cakamana, e talairawarawa vei Jiova ena ka kece e cakava.
Railesuvi
-
Na cakacaka cava e bibi duadua vei Jisu e vuravura?
-
Na cava e vakadinadinataki ena nona cakamana?
-
Na ivakavuvuli yaga cava e tukuna o Jisu?
IKURI
Na cava e dau vunautaka vakalevu o Jisu?
“Matanitu ni Kalou—Vuna e Bibi Kina Vei Jisu” (Na Vale ni Vakatawa, 1 Okotova, 2014)
Dikeva na vuna eda vakabauta kina ni cakamana dina o Jisu.
“Cakamana i Jisu—Na Cava o Vulica Kina?” (Na Vale ni Vakatawa, 15 Julai, 2004)
Wilika na sala e yaga kina vua e dua na turaga na nona sega ni dau nanumi koya ga o Jisu.
“Au Dau Vakaliuci Au Ga” (Na Vale ni Vakatawa, 1 Okotova, 2014)
Raica na veitaravi ni veika lelevu e cakava o Jisu ena nona cakacaka vakaitalatala.
“Veika Bibi ena Bula i Jisu e Vuravura’ (Vakadewa ni Vuravura Vou, iKuri A7)
a Eda na qai vulica ena Lesoni 31-33 eso tale na ka me baleta na Matanitu ni Kalou.