NǓKPLƆNKPLƆN 16
Etɛ lɛ Jezu ka Wà Hwenu E É Ðò Ayikúngban Jí É?
Mɛ gegě nɔ lin ɖɔ Jezu ɔ, vǐ yɛyɛ̌ e ma ɖó ɖɔxátɔ́ ǎ é ɖé, gbeyiɖɔ nǔnywɛtɔ́ ɖé, alǒ nya e ɖò kúdónú é ɖé wɛ. Mǐ ka sixu kplɔ́n nǔ dó wǔ tɔn d’eji gbɔn gbɛzán tɔn ayikúngban jí tɔn ɔ gbígbéjé kpɔ́n gblamɛ à? Ðò nǔkplɔnkplɔn elɔ mɛ ɔ, mǐ na gbéjé nǔ taji hugǎn e Jezu wà é ɖé lɛ kpo lee enɛ sixu d’alɔ we gbɔn é kpo kpɔ́n.
1. Azɔ̌ taji hugǎn tɛ Jezu ka wà?
‘Axɔ́suɖuɖu Mawu tɔn sín wɛnɖagbejijla’ wɛ nyí azɔ̌ taji hugǎn e Jezu wà é. (Xà Luki 4:43.) É jlá wɛnɖagbe ɔ ɖɔ Mawu na ɖó axɔ́suɖuto, alǒ acɛkpikpa ɖé ayǐ, bɔ é na ɖeɖɛ tagba gbɛtɔ́ lɛ tɔn lɛ bǐ. a Jezu wà azɔ̌ syɛnsyɛn nú xwè atɔn adaɖé dó ɖɔ wɛn wusyɛn dó lanmɛ nú mɛ tɔn enɛ sín xó nú mɛ lɛ.—Matie 9:35.
2. Linlin tɛ wu Jezu ka bló nǔjiwǔ lɛ?
Biblu ɖɔ ‘nǔjiwǔ kpo nǔ ɖaxó ɖaxó kpo, kpodo wuntun e Mawu jlɛ́ gbɔn Jezu jí lɛ é kpo’ gegě xó. (Mɛsɛ́dó 2:22) Kpo hlɔnhlɔn Mawu tɔn kpo ɔ, Jezu kpéwú bo ɖó acɛ dó ninɔmɛ ayǐ mɛ tɔn jí, na nǔɖuɖu mɛ afatɔ́n mɔ̌kpan, gbɔ azɔn nú mɛ, bo tlɛ lɛ́ fɔ́n mɛ sín kú. (Matie 8:23-27; 14:15-21; Maki 6:56; Luki 7:11-17) Nǔjiwǔ Jezu tɔn lɛ xlɛ́ nyi wɛn ɖɔ Mawu wɛ sɛ́ ɛ dó. Ye lɛ́ xlɛ́ ɖɔ Jehovah ɖó hlɔnhlɔn bo na ɖeɖɛ tagba mǐtɔn lɛ bǐ.
3. Etɛ lee Jezu zán gbɛ̀ gbɔn é ka sixu kplɔ́n mǐ?
Jezu setónú nú Jehovah ɖò ninɔmɛ lɛ bǐ mɛ. (Xà Jaan 8:29.) È klán gbè xá Jezu có, é xwedó nǔ e Tɔ́ tɔn byɔ ɖò así tɔn lɛ é bǐ télélé kaka yì kú kpo gbejininɔ kpo. É ɖexlɛ́ ɖɔ nú gbɛtɔ́ lɛ tlɛ ɖò ninɔmɛ vɛwǔ lɛ mɛ ɔ, ye sixu sɛn Mawu. Mɔ̌ mɛ ɔ, Jezu jó “xlɛ̌ tɔn nyi ayǐ nú [mǐ], bonu [mǐ] na zé afɔ dó afɔdo tɔn lɛ mɛ.”—1 Piyɛ́ɛ 2:21.
BA DÒ NÚ NǓ D’EJI
Gbějé lee Jezu jlá wɛnɖagbe ɔ mɛ lɛ bo lɛ́ bló nǔjiwǔ lɛ gbɔn é kpɔ́n.
4. Jezu jlá wɛnɖagbe ɔ
Jezu ɖi zɔnlin nú kilomɛtlu kanweko mɔ̌kpan gbɔn ali e jí afúntúntún gɔ́ lɛ é, bo jlá wɛnɖagbe ɔ mɛ gegě lee é nyɔ́ bló gbɔn é. Xà Luki 8:1, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Mɛ ɖěɖee kplé bo na ɖótó Jezu lɛ é kɛɖɛ wɛ é nɔ jlá wɛn ɔ à?
-
Gǎn tɛ Jezu ka dó bo na mɔ mɛ lɛ?
Mawu ko ɖɔ ɖ’ayǐ ɖɔ Mɛsiya ɔ na jlá wɛnɖagbe ɔ. Xà Ezayíi 61:1, 2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Nɛ̌ nǔɖɔɖ’ayǐ enɛ ka jɛnu gbɔn Jezu jí gbɔn?
-
A ka lin ɖɔ mɛ lɛ ɖó hudo wɛnɖagbe enɛ tɔn ɖò égbé à?
5. Jezu kplɔ́n nǔgbo xɔ akwɛ lɛ mɛ
Gɔ́ nú wɛnɖagbe e kúnkplá Axɔ́suɖuto Mawu tɔn é jijla ɔ, Jezu kplɔ́n nǔ e sixu d’alɔ mɛ lɛ é mɛ. Kpɔ́n kpɔ́ndéwú ɖé lɛ ɖò Mawuxóɖiɖɔ Só Jí tɔn tɔn e mɛ lɛ tuùn tawun é mɛ. Xà Matie 6:14, 34 kpo 7:12 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Wěɖexámɛ Jezu tɔn e nyɔ́ zán é tɛ ka ɖò wemafɔ enɛ lɛ mɛ?
-
A ka lin ɖɔ wěɖexámɛ enɛ sixu d’alɔ gbɛtɔ́ lɛ ɖò égbé à?
6. Jezu bló nǔjiwǔ Lɛ
Jehovah na hlɔnhlɔn Jezu bɔ é bló nǔjiwǔ gegě. Nú a na kpɔ́n kpɔ́ndéwú ɖokpo hǔn, xà Maki 5:25-34 alǒ xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Etɛ nawe azinzɔnnɔ e ɖò video ɔ mɛ é ka ɖi nǔ na?
-
Etɛ a ka yí wǎn na ɖò nǔjiwǔ enɛ mɛ?
Xà Jaan 5:36, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛ nǔjiwǔ Jezu tɔn lɛ ka “ɖekúnnu” na, alǒ ɖexlɛ́ dó wǔ tɔn?
A ka tuùn à?
Wema Biblu tɔn ɛnɛ e è nɔ ylɔ́ ɖɔ Wɛnɖagbe-Wema lɛ é mɛ wɛ nǔ e mǐ tuùn dó Jezu wu lɛ é ɖè hugǎn, ye wɛ nyí Matie, Maki, Luki kpo Jaan kpo. Mɛ e wlán Wɛnɖagbe-Wema lɛ é ɖokpo ɖokpo ɖɔ xó dó gǒflɛ́mɛ ɖé lɛ wu dó Jezu wu ɖò ali vovo nu. Gǒflɛ́mɛ enɛ lɛ bǐ nyi ta fí ɖokpo ɔ, bo kɔ́n sɛ̀ sín gbɛzán Jezu tɔn jí ɖò ali e dɔn mɛ é ɖé nu.
-
MATIE
wɛ wlán Wɛnɖagbe-Wema éyɛtɔn jɛ nukɔn. É tɛɖɛ̌ nǔkplɔnmɛ Jezu tɔn lɛ jí, taji ɔ, nǔ e Jezu kplɔ́n mɛ dó Axɔ́suɖuto Mawu tɔn wu lɛ é.
-
MAKI
wɛ wlán Wɛnɖagbe-Wema e hwe hú bǐ é. É ɖɔ xó dó nǔ ɖěɖee jɛ bo sɔ́ akpakpa mɛ lɛ é gegě wu.
-
LUKI
sɔ́ ayi ɖó lee ɖɛxixo ɖò taji nú Jezu sɔ é, kpo lee Jezu wà nǔ xá nyɔnu lɛ gbɔn é kpo jí hugǎn.
-
JAAN
ɖɔ xó e Jezu ɖɔ xá xɔ́ntɔn vívɛ́ tɔn lɛ kpo mɛ ɖevo lɛ kpo é gegě nú mǐ. Enɛ d’alɔ mǐ bɔ mǐ tuùn mɛ alɔkpa e Jezu nyí é.
MƐÐÉ LƐ ÐƆ: “Nya ɖagbe ɖé kpowun wɛ Jezu nyí, é sɔ́ hú mɔ̌ ǎ.”
-
Etɛ hwɛ ka lin?
ETƐ LƐ A KA KPLƆ́N?
Jezu jlá Axɔ́suɖuto Mawu tɔn, bló nǔjiwǔ lɛ bo lɛ́ setónú nú Jehovah ɖò nǔ bǐ mɛ.
Vɔ̌gbɔnji
-
Azɔ̌ taji hugǎn tɛ Jezu ka wà hwenu e é ɖò ayikúngban jí é?
-
Etɛ nǔjiwǔ Jezu tɔn lɛ ka xlɛ́?
-
Nǔ taji tɛ lɛ Jezu ka kplɔ́n mɛ?
KÍJÉ
Etɛ jí Jezu ka ɖɔ xó dó hugǎn?
“Axɔ́suɖuto Mawu Tɔn: Lee É Ðò Taji nú Jezu Gbɔn É” (Atɔxwɛ [Gungbe] 1er octobre 2014)
Gbějé nǔ e wu mǐ sixu ɖi nǔ ɖɔ Jezu bló nǔjiwǔ lɛ nǔgbo nǔgbo é kpɔ́n.
“Nǔjiwǔ Jezu Tɔn Lɛ: Etɛ Ye ka Sixu Kplɔ́n We?” (Atɔxwɛ [Gungbe] 15 juillet 2004)
Kpɔ́n lee kpɔ́ndéwú mɛɖée sísɔ́ dó savɔ̌ tɔn Jezu tɔn huzu gbɛzán nya ɖé tɔn gbɔn é.
“Cejɛnnabi Gbɛ̀ Kɛɖɛ Wɛ Un Zán Wá Yì” (Atɔxwɛ [Flansegbe] 1er octobre 2014)
Kpɔ́n azɔ̌ taji e Jezu wà ɖò sinsɛnzɔ́ tɔn mɛ lɛ é; è tò ye ɖebɔdoɖewu.
a Nǔkplɔnkplɔn 31-33 na ɖɔ xó dó Axɔ́suɖuto Mawu tɔn jí ganji.
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
