KAPITE 16

Koleā Na Fai e Sesu i Lona Maʼuli i Le Kele?

PLAY

Tokaʼapi le kakai e lotou tio kia Sesu, e fai pe se gā toe memea, se polofeta pe ko se tagata na tali mamae. Koā a ʼiki anoʼaga e mafai ke tou ako mei lona maʼuli i le kele. E ta māsau loa ki ʼiki anoʼaga maʼuiga na fai e Sesu ti e ta toe tioʼi loa lona fakaʼuiga kiate koe.

1. Koleā le gaʼoi maʼuiga na fai e Sesu?

Ko le gaʼoi maʼuiga a Sesu, ko le “fakasa . . . le logo malie o le Puleaga o le Atua.” (Lau Luka 4:43.) Na fakasā e ia, e ʼaga loa le Atua o fakatuʼu se Puleʼaga leia e fakatokatokaʼia a faigataʼaʼia o le mālamanei. a Na faʼa kataki aia o soko atu lana fakamafola le logo mālie lenā lolotoga fētuʼu e tolu vaelua.—Mateo 9:35.

2. Koā fakamāʼoki e tou maʼua mei milakulo a Sesu?

E māsau i le Tosi-Tapu ki “ni milakulo, mo ni nea fakaofolele, ti mo ni fakamailoga ala na fai e le Atua [“ia Sesu,” NWT].” (Tosi Gaoi 2:22) Na mafai kia Sesu ke ʼaga aia o puleʼi a makeke o le nātulā, mo fagai se kakai tokaʼapi, mo fakamālōlō le kau masaki ti mo fakamaʼuli le kau mate. (Mateo 8:23-27; 14:15-21; Maleko 6:56; Luka 7:11-17) E fakamāʼoki mei milakulo na fai e Sesu, na kakau mai aia e le Atua. E toe fakamāʼoki ai e maʼua e Seova le makeke ke fakatokatoka ai a faigataʼaʼia fuli.

3. Koleā e tou ako mei le maʼuli o Sesu?

Na fakalogo Sesu kia Seova i anoʼaga fuli. (Lau Soane 8:29.) Logo ai le fakafesagai, kae na fai e Sesu a neʼa fuli alā na fakatotonu ake e lona Tamana o kaku ki lona mate. E fakamāʼoki mai e mafai ki le kakai ke lotou tausi ki le Atua, tatau ai faʼi pe faigataʼa. Ko ia na tuku mai e Sesu ‘se faifaitakiʼaga ke tou muliʼi agatonu ona lakaʼaga.’—1 Petelo 2:21.

MANATU LOLOTO

Ta tioʼi pe koleā na fai e Sesu ke fakasā ai le logo mālie ti ta māsau ki milakulo alā na ʼaga aia o fakasoko.

4. Na fakasā e Sesu le logo mālie

Na saʼele loaloaga Sesu ke fakamafola ai le logo mālie ki ni kakai tokaʼapi. Lau Luka 8:1, ti fai a vesili anei:

Na faifakamafola faʼi ko ia a Sesu ki kakai alā na ʼau o fakalogo kiate ia?
Koā faiga na fai e Sesu ke mafai ai lana felāvei mo le kakai?

Na fakakikite e le Atua, e fakasā loa e le Mesia le logo mālie. Lau Esaia 61:1, 2, ti fai a vesili anei:

E fakasoko fefeʼaki e Sesu le māsau fakapolofeta lenā?
Ki lau manatu, e ʼaoga ko ia i aso nei ke logo le kakai ki le logo mālie lenā?

5. Na akoʼi e Sesu a māʼoki maʼuiga

Na fakamafola e Sesu le logo mālie o le Puleʼaga o le Atua. Kae na toe akoʼi mai e ia ni akonaki maʼuiga ke tou mulimuli ki ai. Ta tioʼi ni faifaitaki mei le Akonaki a Sesu i le Maʼuga. Lau Mateo 6:14, 34 mo 7:12, ti fai a vesili anei:

Koā tokoi maʼuiga na tuku mai e Sesu i vaega anei?
Ki lau manatu, koi ʼaoga ko ia a tokoi anā i aso nei?

6. Na fakasoko e Sesu ni milakulo

Na soli e Seova kia Sesu le makeke ki le fakasoko o ni milakulo. Ta toʼo se faifaitaki, lau Maleko 5:25-34 pe tioʼi le GĀ ʼATA leinei, ti fai a vesili anei.

GĀ ʼATA: Na Fakamālōlō e Sesu Se Fafine Masaki (5:10)

Koleā na tui māʼoki ki ai le fafine leinei?
Koleā le ako e ke tāʼofi i le milakulo leinei?

Lau Soane 5:36, ti fai le vesili leinei:

Koleā na “fakamaoki” ki ai a milakulo a Sesu?

E ke iloa ko ia?

Ko neʼa alā e tou iloa o uiga mo Sesu, e ʼau mei koga tosi e fā o le Tosi-Tapu e fakaʼigoa ko Evaselio. Ko Mateo, Maleko, Luka ti mo Soane. Ti e tou maʼua mei tosi anā, ni fakamatala kesekese o uiga mo Sesu. Ti e toe fakasā i ai, a gaʼoi mālilie fuli alā na fai e ia.

MATEO

na ʼuluaki tosi e ia lana Evaselio. Na fakamatala e ia a akonaki a Sesu, kae tāfito o uiga mo le Puleʼaga o le Atua.
MALEKO

na tosi e ia lana Evaselio kae toʼetoʼe fua. Ka fakamatala e ia ni anoʼaga ti e maʼuli a neʼa alā e māsau aia ki ai.
LUKA

e māsau tāfito aia ki le faikole ti mo le agamālie o Sesu ki fafine.
SOANE

e fakasā e ia a felogoi a Sesu mo ona kauneʼa mālie ti mo ni ʼiki atu. E lasi a anoʼaga e akoʼi mai e ia o uiga mo agaaga o Sesu.