TOƁƁERE 16

Ko honɗun annabi Iisaa waɗunoo fewndo o wonunoo ka hoore leydi ?

LECTURE

Yimɓe buy no miijoo fii annabi Iisaa wa boobo penu maa annabaajo faamuɗo. Kono en waaway anndude fii makko ko ɓuri nii e hoore taskagol ngurndan makko ɗan ka hoore leydi ? E nder ndee toɓɓere, en ndaaray piiji ɓurɗi hittude ɗi annabi Iisaa waɗi e honno ɗii nafirta on.

1. Ko golle honɗe ɓurnoo hittande annabi Iisaa ?

Golle ɓurnooɗe hittande annabi Iisaa ɗen hari ko feɲɲingol « Kibaaru Moƴƴo on, ɗun ko kibaaru fii laamu Alla ngun » (janngee Luuka 4:43). O feɲɲinno kibaaru moƴƴo on wonndema Alla waɗoyay laamu, maa guwerneman, jittoyayngu satteendeeji tagaaɗo fow a. Annabi Iisaa wakkilino yottingol ngal nelal okkayngal tanƴinaare fii duuɓi tati e feccere (Matta 9:35).

2. Ko honɗun kaawakeeji annabi Iisaa ɗin holli ?

Deftere Alla nden no haali fii « kaawakeeji moƴƴi e kuuɗe e maandeeji, kon ko Alla warri e [annabi Iisaa] » (Kuuɗe sahaabaaɓe ɓen 2:22). E hoore bawgal Alla ngal, annabi Iisaa waawuno deƴƴingol waabiliire, ɲammingol yimɓe guluuji e guluuji, ɲawndugol nawnuɓe e hay immintingol mayɓe (Matta 8:23-27 ; 14:15-21 ; Markuusa 6:56 ; Luuka 7:11-17). Kaawakeeji annabi Iisaa ɗin holluno ko laaɓi pos ko Alla nelunoo mo. Ɗii holluno kadi Yahuwah Alla no mari bawgal jittugol satteendeeji men ɗin fow.

3. Ko honɗun ngurndan annabi Iisaa ɗan jannata en ?

Annabi Iisaa ɗoftino Yahuwah Alla e saa’iiji ɗin fow (janngee Yuuhanna 8:29). Fii kala ɓe dartino mo, annabi Iisaa e hoore sella-finndeyaagal, waɗuno kala ko Baaba makko yamirnoo mo haa o feƴƴini. O holluno yimɓe no waawi rewude Alla hay si no sattani ɓe. Ko wano non annabi Iisaa accanii en « misal, fii no jokkir[en] batteeji makko ɗin » (1 Petruusu 2:21).

LUGGINEE

Ndaaree honno annabi Iisaa feɲɲinirnoo kibaaru moƴƴo on e no o waɗirnoo kaawakeeji non.

4. Annabi Iisaa feɲɲinno kibaaru moƴƴo on

Annabi Iisaa seppuno ka woɗɗi e laawi wonduɗi e nduggu fii feɲɲinangol yimɓe buy kibaaru moƴƴo on. Janngee Luuka 8:1 e yewton fii ɗee lanndaale :

Annabi Iisaa waajino tun yimɓe araynooɓe heɗitoo mo ?
Ko honno annabi Iisaa wakkilornoo fii yahugol ka yimɓe ?

Alla daaluno wonndema Almasiihu on feɲɲinay kibaaru moƴƴo on. Janngee Isaaya 61:1, 2 e yewton fii ɗee lanndaale :

Ko honno annabi Iisaa laatiniri ndee hiitannde ?
Hiɗon miijii yimɓe ɓen hannde no hatonjini e nanugol oo kibaaru moƴƴo ?

5. Annabi Iisaa jannuno goongaaji hittuɗi

E hoore feɲɲingol kibaaru moƴƴo on fii laamu Alla ngun, annabi Iisaa jannuno fii piiji nafayɗi en. Ndaaree goɗɗe e mise iwruɗe ka Waaju makko ka hoore fello. Janngee Matta 6:14, 34 e 7:12 e yewton fii ɗee lanndaale :

Ko waajuuji nafayɗi honɗi annabi Iisaa jonni e ɗee aayeeje ?
Hiɗon miijii ɗii waajuuji no wondani en e nafa hannde ?

6. Annabi Iisaa waɗuno kaawakeeji

Yahuwah Alla okkuno annabi Iisaa bawgal fii waɗugol kaawakeeji buy. Fii yi’ugol misal, janngee Markuusa 5:25-34 maa fijinon VIDIO on. Ɓawto ɗun, yewton fii lanndaale jokkituɗe ɗen.

VIDIO : Debbo nawnunooɗo ɲawndano (5:10)

Ko honɗun debbo nawnunooɗo on fellitunoo ?
Ko honɗun hawnanii on e oo kaawee ?

Janngee Yuuhanna 5:36 e yewton fii ngal lanndal :

Ko honɗun kaawakeeji annabi Iisaa ɗin ‘seeditani’ maa holli fii makko ?

Hari hiɗon anndi ?

Ko annduɗen kon fii annabi Iisaa no iwri ka defte nay noddaaɗe Linnjiila on (Matta, Markuusa, Luuka e Yuuhanna). Kala winndunooɗo haaluno fii makko no sertiri. Ko winndaa fii makko kon fow no holli ko labaa fii ngurndan makko ɗan.

MATTA

ko kanko adii winndude deftere aranere nden ka Linjiila. Hinde holli ko annabi Iisaa janni kon, tentinii fii laamu Alla ngun.
MARKUUSA

ko kanko winndi deftere ɓurnde raɓɓiɗude nden ka Linnjiila. Hinde haali fii piiji buy firnuɗi ɗi annabi Iisaa waɗi.
LUUKA

kanko o tentinno fii toraare e no annabi Iisaa teddinirnoo rewɓe ɓen non.
YUUHANNA

kanko o winnduno fii no annabi Iisaa siforii non e hoore haalugol fii yewtereeji hakkunde makko e yiɓɓe makko hiɓɓuɓe ɓen e woɓɓe goo.