ODHEAI 16
Prithumer Astana Jezun Kitem Kelem?
Zaitea lokamnim Jezu vixim aikolam. Tumkam ghoddie, to zolmolo tednam kitem zalem, to lokank koso xikoitalo ani taka koso marlo itlench khobor asa astoli. Punn prithumer tachem jivit koxem aslem tem zannam zalim zalear ami taka anik bore bhaxen vollkhonk pavtolim. Hea odheai-ant, Jezun prithumer astana koslim mhotvachim kamam kelim ani tem zannam zalʼlean amkam koso adar zatolo tem ami polloitolim.
1. Jezuchem mukhel kam kitem aslem?
Lokank “Devachea Rajeachi bori khobor” porgott korop, hem aplem mukhel kam mhunn Jezun sanglem. (Lukas 4:43 vachat.) Jezu porgott kortalo ki Dev fuddarak hea prithumer raz choloitolo ani munxancheo sogleo oddchonneo suttaveo kortolo. a Tannem sadde-tin (31/2) vorsam hi bori khobor porgott korunk khub vavr kelo.—Matev 9:35.
2. Jezun vizmitam kiteak kelim?
Devan Jezu udexim “vhoddlim-vhoddlim ani ojapanchim kamam ani vizmitam” kelim mhunn Bible-ant amkam vachunk melltta. (Itihas 2:22) Devache xokten Jezun ek vadoll thamboilem, hozaramnim lokank jevonn dilem, duens vo pidda asloleank borim kelim ani meloleank pasun jivont kelim. (Matev 8:23-27; 14:15-21; Marku 6:56; Lukas 7:11-17) Jezun kelʼlea vizmitam vorvim Devanuch taka dhaddlolo mhunn kollon ieta. Toxench, tannem kelʼlea vizmitam vorvim amche sogle tras kaddunk Devak xokti asa mhunn kolltta.
3. Jezu koddlean ami kitem xikonk zata?
Jezun dor eke poristithint Jehovak manvota tench kelem. (Juanv 8:29 vachat.) Zaitea lokamnim tacho virodh kelo, tori astana to moro porian Devak visvaxi ravlo. Kotthin poristhitint pasun ami visvaxiponnan Devachi seva korunk zata mhunn Jezun dakhoun dilem. Hea toren, Jezun amkam ‘tachi dekh gheunchi mhunn amchea pasot ek udharonn dovorlam.’—1 Pedru 2:21.
KHOLAIEN XIKAT
Jezun lokank bori khobor koxi porgott keli ani tannem vizmitam koxim kelim tem zannam zaiat.
4. Jezun bori khobor porgott keli
Jezun khub lamb vatt cholon, Devachea Rajeachi bori khobor zata titlea lokank porgott keli. Lukas 8:1 vachun sokol dilʼlea prosnanche zobab zannam zaum-ia:
-
Jezun fokot aplea sorxim ailolea lokank porgott kelem kai?
-
Lokank bori khobor porgott korunk Jezun kitem kelem?
Mesias bori khobor porgottʼttolo mhunn Devan adinch sangon dovorlolem. Izaias 61:1, 2 vachun sokol dilʼlea prosnanche zobab zannam zaum-ia:
-
Hi bhasaunni koxi purnn zali?
-
Aiz lokamnim bori khobor aikop gorjechem oxem tumkam dista?
5. Jezun mhotvachim lisanvam xikoilim
Jezun Devachea Rajeachi bori khobor porgott keli. Titlench nhoi, tannem sodanchea jivitant faideak poddttat toslim lisanvam pasun xikoilim. Jezun dongrar dilʼlea updesant kitem xikoilem tachim thoddim udharonnam polloum-ia. Matev 6:14, 34 ani 7:12 vachun sokol dilʼlea prosnanche zobab zannam zaum-ia:
-
Hea versamnim Jezun kitem korunk xikoilem?
-
Jezun xikoilʼlim lisanvam aiz pasun faideak poddttat kai?
6. Jezun vizmitam kelim
Jehovan Jezuk zaitim vizmitam korunk xokti dilʼli. Tachem ek udharonn pollounk, Marku 5:25-34 vachun vo VIDEO polloun sokol dilʼlea prosnanche zobab zannam zaum-ia.
-
Te duent bailek kitem khatri asli?
-
Hea ghoddnnentlean tumkam kitem avoddlem?
Juanv 5:36 vachun sokol dilʼlea prosnacho zobab zannam zaum-ia:
-
Jezun kelʼlim vizmitam tache vixim kitem “govai ditat” vo kitem dakhoun ditat?
Tumi zannant?
Bible-ant Matev, Marku, Lukas ani Juanv hea pustokamnim Jezu vixim choddxi mahiti asa. Hea pustokank Bore Khobrechim pustokant mhunnttat. Dor eka pustokant, Jezu vixim osli mahiti asa ji amkam dusrea pustokant mellona. Him char-ui pustokam vachtat tednam amkam Jezuchea jivita vixim anik kolltta.
-
MATEV
hea xisan Bore Khobrechem poilim pustok boroilem. Tantunt amkam Jezun xikoilʼle zaite vixoi mellttat, zoxem Devachem Raj.
-
MARKU
hea xisan boroilʼlem pustok char-ui pustokam modem lhan asa. Tantunt amkam thoddeach utramnim zaitea ghoddnneam vixim vachunk melltta.
-
LUKAS
hea xisan boroilʼlea pustokant, Jezu bailank koso lekhtalo ani magnnem korop taka kitlem mhotvachem aslem tem amkam vachunk melltta.
-
JUANV
hea xisan, Jezu aplea ixttam lagim ani dusream lagim kitem uloilo tem boroilem. Tor, hantuntlean Jezu koslo munis aslo tem amkam kolltta.
THODDO LOK MHUNNTTA: “Jezu sonvsarant lokank borem korunk ailʼlo.”
-
Tumkam kitem dista? Jezu fokot heach karonnak lagon ailʼlo kai?
KITEM XIKLIM
Jezun Devachea Rajea vixim porgott kelem, vizmitam kelim ani sodanch Jehovak manvota tench kelem.
Porot Ugddas Korum-ia
-
Prithumer astana Jezuchem mukhel kam kitem aslem?
-
Jezun kelʼlea vizmitam thaun kitem kollon ieta?
-
Jezun koslim lisanvam xikoilim?
ANIK SODHAT
Jezu choddso khoinchea vixoi-acher uloitalo?
“Devachem Raj Jezuk Kitlem Mhotvachem Aslem?” (The Watchtower, October 1, 2014)
Jezun khorench vizmitam kelʼlim mhunn ami kiteak patieunk zata tem zannam zaiat.
“Jezun Kelʼlea Vizmitam Thaun Ami Kitem Xiktat?” (The Watchtower, July 15, 2004)
Jezu lokanchi kitli kallji ghetalo tem zannam zalʼlean eka munxachem jivit koxem bodolʼlem tea vixim vachat.
“Hanv Fokot Mhojeach Pasot Jietalom” (The Watchtower, October 1, 2014)
Jezuchea jivitantlea mukhel ghoddnneam vixim zannam zaunk chartt polloiat.
“Jezuchea Jivitantleo Mukhel Ghoddnneo” (New World Translation of the Holy Scriptures, Appendix A7)
a Devachea Rajea vixim anik mahiti amkam odheai 31 tem 33-ant mellttoli.
Tumkam Hem-ui Avoddttolem
ZAITE PAVTT VINCHARLOLE PROSN
Jehovachim Sakxim Bible xikonk koxim modot kortat?
Jehovachea Sakxeamnim Bible xikonk ji funkott manddavoll kelʼli asa tantunt tumi Bible-achem khoinchem-i bhaxantor uzar korunk zata. Tumchea ghorcheank vo ixttank tumchea sangata Bible xikonk apounk fattim soronakat.
