EKIRAJAAYA 16
¿Kasa naaʼinrapuʼuka Jesús soʼu yaajachin nia Mmapaʼa?
Wainma na wayuu aapakana nüchiki Jesús, eepejeʼe na aapakana nüchiki wanaa sümaa joʼuuin nia. Eeshii na aapakana nüchiki wanaa sümaa nünüikimaajachin nia Maleiwa jee eetaashii waneinnua aapakana nüchiki wanaa sümaa outuin nia. Atüjeena waya sooʼomüin nüchiki Jesús wekirajaale süchiki nukuwaʼipa yaaiwaʼaya nia Mmapaʼa. Sünain ekirajaayakat tüü, wekirajaajeerü achiki süpüshi tü naaʼinrapuʼukat Jesús otta kaseerüin watüjain sünainjee.
1. ¿Kasa aʼyatawaa naaʼinmaapuʼuka maʼin Jesús?
Tü aʼyatawaa naaʼinmaapuʼukat maʼin Jesús shia nüküjain tü pütchi anasükat süchiki nukuwaʼipa Maleiwa sünain aluwatawaa (paashajeʼera Lucas 4:43). Aküjashi nia pütchi süchiki nüikaleʼerüinjatüin Maleiwa sukuwaʼipa wanee aluwatawaa anouteʼerüinjatka tü kasa mojusü alatakat sümüin wayuu. a Aʼyataashi maʼin Jesús sünain aküjaa tia pütchikat soʼu apünüin juya shiatapünaamüin (Mateo 9:35).
2. ¿Kasapülajatü naaʼinraka Jesús kasa pülasü?
Saashin tü Bibliakat «nia [Jesús] wane wayuu naaʼinrakai anainjee Maleiwakai watta saalin kasa [...] tü kasa nütüjakat apüleerua Maleiwa nümüiwa» (Aluwataaushikana [Hechos] 2:22). Naapüin Maleiwa nümüin Jesús tü nüpülainkat süpüla niimaleʼerüin wawai, wainmain eküülü nutuma, niiyajüin wayuu eekai ayuulin jee nüsoʼireʼerüin saaʼin wayuu eekai outuin (Mateo 8:23-27; 14:15-21; Marcos 6:56; Lucas 7:11-17). Sünainjee tü kasa pülasü naaʼinrakat Jesús, wayaawata aaʼu nuluwataalain nia Maleiwa. Jee müsia wayaawata aaʼu nunouteʼereerüin Jehová tü kasa mojusü alatakat sümüin wayuu, jama pülashaatain maʼin nia.
3. ¿Kasa watüjaka sünainjee nukuwaʼipa Jesús?
Oonooshi Jesús waneepia sümaa nünüiki Maleiwa jaʼitasü kasain alatüin nümüin (paashajeʼera Juan 8:29). Naaʼinrüin süpüshuaʼa tü nuluwataakalü anain chi Nüshikai jaʼitasü wainmain maʼin tü kasa aaʼinnakat nümüin Jesús. Wayaawata aaʼu sünainjee tia eein süpüla waneepiain nümaa Maleiwa wanee wayuu jaʼitairü kasain alatüin nümüin. Makalaka nücheküin Jesús napüleerua na nikirajüinkana noushikajaainjanain süchiirua nukuwaʼipa (1 Pedro 2:21).
WEKIRAJAA SOOʼOMÜIN
Wekirajaa süchiki tü naaʼinrakat Jesús wanaa sümaa nüküjain pütchi sümüin wayuu otta süchiki tü kasa pülasü naaʼinrakat.
4. Nüküjain Jesús sümüin wayuu süchiki tü pütchi anasükat
Mayaainjeʼe yarüttüin maʼin tü mmakat wopuluʼu, ayatüshia oʼunuin Jesús wattapünaa sünain aküjaa pütchi sümüin wayuu. Jaashajeʼera Lucas 8:1 otta yooto jia süchiki tüü:
-
¿Aküjashiche neʼe pütchi Jesús namüin na wayuu antakana nünainmüin?
-
¿Kasa naaʼinraka Jesús süpüla nüküjain pütchi sümüin wayuu süpüshuaʼa?
Nüküjatüjülia Maleiwa nüküjainjatüin chi Mesíaskai tü pütchi anasükat. Jaashajeʼera Isaías 61:1, 2 otta yooto jia süchiki tüü:
-
¿Ekeraajüsüche tia pütchi aküjünakat nüchiki Jesús?
-
¿Choʼujaasüche süküjünüin tü pütchi anasükat sümüin wayuu maaʼulu yaa?
5. Aneerü wakuwaʼipa sünainjee tü nikirajakalü anain Jesús
Nnojoishi aküjain neʼe Jesús pütchi nüchiki Maleiwa sünain aluwatawaa, nikirajüinya na wayuukana süchiki tü kasa anasü neʼreetkat sünainjee tü nikirajakalü anain. Wekirajaa süchiki tü nikirajakalü anain Jesús saaʼu wanee namüna. Jaashajeʼera Mateo 6:14, 34 otta 7:12 otta yooto jia süchiki tüü:
-
¿Kasa waaʼinrüinjatka saashin tia pütchi nüküjakat Jesús?
-
¿Aneetche nukuwaʼipa wanee wayuu naaʼinrüle tia?
6. Aaʼinrüshi Jesús kasa pülasü
Naapüin Jehová nümüin Jesús tü nüpülainkat süpüla naaʼinrüin kasa pülasü. Anuu süpüshi tia. Jaashajeʼera Marcos 5:25-34 jee shiale jünajüin tü VIDEOKOT. Süchikijee, yooto jia süchiki tüü.
-
¿Kasa sunoujaka anain tü wayuu weʼrakat suluʼu tü videokot?
-
¿Kasa ponoko paaʼin sünainjee tü naaʼinrakat Jesús?
Jaashajeʼera Juan 5:36 otta yooto jia süchiki tüü:
-
¿Kasa wayaawataka aaʼu nüchiki Jesús sünainjee tü kasa pülasü naaʼinrakat?
¿Pütüjaa aaʼu tüü?
Süpüshi tü aküjünakat nüchiki Jesús, ashajünüsü shia suluʼu tü Bibliakat sünain pienchisü karaloʼuta, Mateo, Marcos, Lucas otta Juan. Suluʼu tia pienchisükat karaloʼuta, ashajünüsü waneirua kasa nnojotka ashajünüin suluʼu tü waneirua. Sünainjee süpüshuaʼa tü ashajünakat, wayaawata aaʼu jamüin maʼin nukuwaʼipa Jesús.
-
MATEO
Shia tü palajatkat karaloʼuta nüchikimaajatkat Jesús. Ashajünüsü süchiki tü nümakat süchiki sukuwaʼipa aluwatawaa nutuma Maleiwa.
-
MARCOS
Palirü tü ashajünakat nüchiki Jesús suluʼu karaloʼutakat tüü. Aküjünapejeʼe süchiki waneirua kasa anaka maʼin.
-
LUCAS
Tü ashajünakat suluʼu karaloʼutakat tüü, shia süchiki tü waaʼinrajatkat woʼuraajapa nümüin Maleiwa otta süchiki kojutuin nümüin Jesús na jieyuukana.
-
JUAN
Karaloʼutakat tüü, aashajaasü süchiki nukuwaʼipa Jesús otta süchiki tü kasa nüküjakat namüin naʼaleewainyuu otta na waneinnua.
EESHII WAYUU EEKAI NAMÜIN: «Jesús, niaʼaya neʼe chi Maleiwakai».
-
¿Jamüsüjaʼa pünüiki süchiki tia?
WATÜJAAITPAKA AAʼU
Aküjashi pütchi Jesús süchiki sukuwaʼipa tü aluwatawaa eeinjatkat nutuma Maleiwa, aainjashi nia kasa pülasü, oonooshi nia waneepia sümaa nünüiki Maleiwa otta naaʼinrüinya tia soʼunnaa niʼrüin müliaa.
Pusouta shiʼipajee
-
¿Kasa naaʼinmaaka maʼin Jesús wanaa sümaa yaajachin nia Mmapaʼa?
-
¿Kasa wayaawataka sünainjee tü kasa pülasü naaʼinrakat Jesús?
-
¿Kasa nikirajaka anain Jesús aneetka atuma wakuwaʼipa?
PÜNAʼLA SOOʼOMÜIN
¿Kasa naashajaapuʼuka maʼin achiki Jesús wanaa sümaa nüküjain pütchi?
¿Jamüsü weʼitaainjatka waaʼin sünain shiimain sülatüin tü kasa pülasü naaʼinrapuʼukat Jesús?
«¿Kasa watüjaka sünainjee tü kasa pülasü naaʼinrapuʼukat Jesús?» (Aapiria Wayuu, juulioʼu 15, 2004)
Paashajeʼera nüchiki wanee wayuu eeʼiratakai nukuwaʼipa sünainjee jülüjain naaʼin nukuwaʼipa Jesús.
«Shia neʼe jülüjapuʼuka taaʼin tü takuwaʼipakat tamüiwaʼa» (Pütchi suluʼuka Aapiria Wayuu, 2014)
Anuu süchiki tü naaʼinrapuʼukat Jesús, jalapünaapuʼuin nia otta joujatüin alatüin tia.
a Sünain ekirajaaya 31-33, aküjüneerü sooʼomüin süchiki sukuwaʼipa aluwatawaa nutuma Maleiwa.
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
