KUKWE JA TÖTIKARA 16
¿Jesukwe dre nuainbare kä tibienbätä?
Nitre tä töbike Jesubätä ngwane, monso di ñakare, ni töbätä o ni bren bren ye kwrere tätre bämike ja okwäte. Akwa Jesús nämäne kä tibienbätä ngwane, dre nuainbare kwe yebätä nikwe ja tötikai bäri ngwane, niara rabai gare bäri kwin nie. Jesukwe dre bäri ütiäte nuainbare aune ñobätä kwin mä kräke ye rabai gare mäi kukwe ja tötikara nekänti.
1. ¿Sribi meden bäri ütiäte nuainbare Jesukwe?
Jesukwe “kukwe kwin Gobran Ngöbökwe yebätä driebare nitre ie”, ye sribi bäri ütiäte nuainbare kwe (mäkwe ñäkä Lucas 4:43 yebätä). Ngöbökwe gobran ükaite abokän käkwe kukwe ben nita ja tuin ye jökrä diainkä, driebare kwe. a Kä komäbiti ötare te kukwe kwin ye driebare kwe köbö täte (Mateo 9:35).
2. ¿Jesukwe jondron ñan tuabare nuainbare yekwe dre bämikani?
Jesubiti “Ngöbökwe jändrän kri nuainbare, jändrän bä nuäre mikani, aune jändrän ñan tuabare” nuainbare drieta Bibliakwe (Hechos 2:22, Ngöbö Täräe [NGT], tärä okwä ükaninte). Ngöbö diebiti Jesukwe ñü dite muriebe minimini mikani nünenkä, nitre kwati bukani kwe, nitre bren mikaninta kwin kwe aune nitre krütanina ye ruäre ganinkröta kwe (Mateo 8:23-27; 14:15-21; Marcos 6:56; Lucas 7:11-17). Kukwe yebiti Jesukwe bämikani Ngöbökwe niara juani. Aune kukwe ben nita ja tuin ye Jehová die tärä ükatekäre bämikani kwe.
3. ¿Jesukwe kukwe bämikani ye tä dre driere nie?
Jesukwe Jehová mikani täte kä jökrä ngwane (mäkwe ñäkä Juan 8:29 yebätä). Nitre kwati käkwe ja mikani Jesús rüere, akwa Jehovakwe dre ribebare ie ye nuainbare täte kwe aune ja ngwani metre kwe Jehovai nememe murie ketani ye ngwane. Yebiti bämikani kwe kukwe tare rabadre ni kisete, akwa yebiti ta ni raba Jehová mike täte. “Ja tare nikadre ño, ye abko Kristo käkwe bä mikani” nitre ja tötikaka kwe ye käne (1 Pedro 2:21).
JA TÖTIKE BÄRI NGUSETA
Kukwe kwin Ngöbökwe ye Jesukwe driebare ño aune kukwe ñan tuabare nuainbare ño kwe ye ani mike gare jai.
4. Jesukwe kukwe kwin driebare
Ji kä mününe te ta Jesukwe nänbare kilómetro kabre te blitakäre kukwe kwin Ngöbökwe yebätä nitre kwati ben. Ñäkädre Lucas 8:1 yebätä aune kukwe ne kädriedre jabe:
-
¿Nitre nämäne kite Jesús kukwe nuin ye aibe ie kukwe driebare kwe?
-
¿Jesukwe ja di ngwani ño rabakäre nitre jökrä känti?
Mesías käkwe kukwe kwin driedi ye Ngöbökwe mikani gare. Ñäkädre Isaías 61:1, 2 yebätä aune kukwe ne kädriedre jabe:
-
¿Jesukwe profecía ne mikani nemen bare ño?
-
¿Nengwane kukwe kwin driedre nitre ie tätre ribere jai raba ruin mäi?
5. Kukwe ütiäte ja töi kräke driebare Jesukwe
Gobran Ngöbökwe ye ñan aibebätä blitabare Jesukwe, ñakare aune kukwe ja töi kräke driebare kwe arato. Ñodre, kukwe kädriebare ngudrebiti kwe ye ani mike gare ruäre jai. Ñäkädre Mateo 6:14, 34 aune 7:12 yebätä aune kukwe ne kädriedre jabe:
-
¿Bersikulo nekänti kukwe meden kwin driebare Jesukwe?
-
¿Kukwe ja jie ngwankäre ne raba nitre kä nengwane dimike?
6. Jesús kukwe ñan tuabare nuainbare
Jehovakwe ja di biani Jesús ie kukwe keta kabre ñan tuabare nuainkäre. Mikakäre gare keteiti jai ñäkädre Marcos 5:25-34 o VIDEO mikadre ñärärä, biti kukwe ne kädriedre jabe:
-
Video tä mike gare erere, ¿dre nämäne gare metre meri ye ie?
-
¿Kukwe namani bare yebätä dre nibi tuin bäri kwin mäi?
Ñäkädre Juan 5:36 yebätä aune kukwe ne kädriedre jabe:
-
¿Jesukwe kukwe ñan tuabare nuainbare ye tä dre bämike?
¿Ne gare mäi?
Kukwe gare Jesubätä nie ye bäsi jökrä tä Evangelio ketabokä yete. Mateo, Marcos, Lucas aune Juan käkwe Evangelio tikani ngwane, kukwe keta kabre mikani gare kwe Jesubätä. Nita ñäke Evangelio ketabokä nebätä ngwane, Jesús tä nemen gare bäri kwin nie.
-
MATEOKWE
Evangelio kena tikani. Gobran Ngöbökwe driebare Jesukwe yebätä kukwe tikani bäri kwe.
-
MARCOKWE
Evangelio bäri oto brai tikani aune kukwe jene jene ñan tuabare tä tärä yebätä.
-
LUCAKWE
mikani gare orasion ye nämäne ütiäte Jesús kräke aune Jesús meritre mikani ütiäte jai.
-
JUAN
tä kukwe keta kabre mike gare Jesús ja ngwani ño yebätä, ñobätä ñan aune Jesukwe dre kädriebare ja ketamuko kwe ben aune nitre madabe ye tä mike gare.
NITRE RUÄRE TÄ KUKWE NE NIERE: “Jesús ara Ngöbö”.
-
¿Mäkwe dre niedre?
¿DRE NIBI GARE MÄI?
Jesukwe Gobran Ngöbökwe driebare, kukwe ñan tuabare nuainbare kwe aune käre Jehová mikani täte kwe.
Ngwankäreta törö
-
Jesús nämäne kä tibienbätä ngwane, ¿sribi meden bäri ütiäte nuainbare kwe?
-
¿Jesukwe jondron ñan tuabare nuainbare ye käkwe dre bämikani?
-
¿Jesukwe kukwe meden driebare ja töi kräke nie?
KUKWE MIKE GARE BÄRI JAI
¿Jesukwe kukwe meden driebare bäri?
“¿Ñobätä Gobran Ngöbökwe ye ütiäte Jesús kräke?” (Ni Mikaka Mokre, 1 octubre 2014)
Kukwe ñan tuabare nuainbare Jesukwe ye ñan kukwe ngwarbe ye ñokänti gare nie ye mike gare jai.
“Jondron ñan tuabare nuainbare Jesukwe: ¿raba dre driere mäi?” (Ni Mikaka Mokre, 15 julio 2004)
Jesús ñan nämäne töbike ja aibebätä namani gare ni iti ie ngwane, ja töi kwitani kwe yebätä ñäke.
“Ja nämä bäri ütiäte ti kräke” (Ni Mikaka Mokre, 1 octubre 2014)
Jesús kukwe driebare ngwane, kukwe ütiäte ütiäte nuainbare kwe ükaninte jatäri ye mike ñärärä.
a Kukwe ja tötikara 31 nemen 33 yete kukwe mikata gare bäri Gobran Ngöbökwe yebätä.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
