ZAJ KAWM 16
Yexus Ua Dab Tsi Thaum Nws Tseem Nyob Hauv Ntiaj Teb No?
Neeg coob tus xav tias Yexus tsuas zoo yam li tus me nyuam mos, ib tug cev Vajtswv lus uas muaj tswv yim heev, los sis yog ib tug txiv neej uas tab tom yuav tu siav xwb. Tiam sis, yog peb ua tib zoo kawm txog nws lub neej thaum nws tseem nyob hauv ntiajteb no, peb puas yuav kawm tau dab tsi ntxiv txog nws? Hauv zaj no, peb yuav kawm txog tej yam tseem ceeb uas Yexus tau ua thiab seb tej no ho pab tau koj li cas.
1. Yexus tes hauj lwm tseem ceeb tshaj yog dab tsi?
Yexus tes hauj lwm tseem ceeb tshaj yog mus qhia txoj xov zoo txog Vajtswv txoj kev kav. (Nyeem Luka 4:43.) Nws tshaj tawm tias Vajtswv yuav tsa ib lub nceeg vaj los sis ib lub tseem fwv uas yuav kho tib neeg tej teeb meem huv tib si. a Yexus rau siab ntso qhia txoj xov zoo no rau tib neeg tau peb xyoos thiab ib nrab xyoo.—Mathais 9:35.
2. Vim li cas Yexus thiaj ua txuj ci?
Vajtswv muab hwj chim rau Yexus ua ntau yam txuj ci rau tib neeg pom. (Tes Haujlwm 2:22) Yexus siv Vajtswv lub hwj chim los tswj tej huab cua, pub zaub mov rau tsheej txhiab leej noj, kho cov muaj mob zoo, thiab tseem tsa tau cov tuag sawv rov qab los muaj sia dua. (Mathais 8:23-27; 14:15-21; Malakau 6:56; Lukas 7:11-17) Tej txuj ci uas Yexus ua ntawd qhia meej tias Vajtswv yog tus txib nws los tiag. Tej ntawd kuj qhia tias Yehauvas muaj hwj chim kho tau peb txhua tus tej teeb meem huv tib si.
3. Peb kawm tau dab tsi txog Yexus lub neej?
Yexus mloog Yehauvas lus rau txhua txoj ke. (Nyeem Yauhas 8:29.) Txawm yog muaj coob tus tawm tsam nws los, Yexus yeej ua txhua yam uas nws Txiv kom nws ua mus txog hnub tas nws sim neej kiag nyob hauv ntiaj teb no. Qhov uas Yexus ua ntawd, qhia tias tib neeg yeej pe hawm tau Vajtswv txawm tias lawv muaj ntau yam kev nyuaj siab. Twb yog li ntawd, Yexus thiaj tseg ib tug qauv kom peb taug nraim nws tus hneev taw.—1 Petus 2:21.
KAWM NTXIV
Kawm seb Yexus tau qhia txoj xov zoo thiab ua tej txuj ci li cas.
4. Yexus qhia txoj xov zoo
Yexus taug tej kev av uas ncho plua av lug deb heev mus qhia txoj xov zoo rau tib neeg kom coob li coob tau. Nyeem Lukas 8:1, thiab tham txog ob lo lus no:
-
Puas yog Yexus tsuas qhia rau cov neeg uas sau nthwv los mloog nws xwb?
-
Yexus tau ua li cas thiaj nrhiav tau tib neeg?
Vajtswv twb hais tseg lawm tias tus Mexiyas yuav mus tshaj tawm txoj xov zoo. Nyeem Yaxayas 61:1, 2, thiab tham txog ob lo lus no:
-
Yexus ua li cas thiaj muaj tiav raws li zaj lus faj lem no?
-
Koj puas xav tias yuav tsum tau qhia txoj xov zoo rau tib neeg niaj hnub nim no thiab?
5. Yexus qhia tej zaj uas muaj nqis heev
Ntxiv rau qhov uas tshaj tawm txoj xov zoo txog Vajtswv txoj kev kav, Yexus kuj tau qhia ntau zaj uas pab tau yus lub neej thiab. Cia peb tham txog ob peb zaj lus qhuab qhia nto moo heev uas Yexus tau qhia saum roob. Nyeem Mathais 6:14, 34 thiab 7:12, thiab tham txog ob lo lus no:
-
Yexus qhia kom peb ua tej yam twg hauv cov nqe no?
-
Koj puas xav tias cov lus qhia no tseem pab tau tib neeg niaj hnub no?
6. Yexus tau ua ntau yam txuj ci
Yehauvas muab hwj chim rau Yexus ua tau ntau yam txuj ci. Mus saib ib qho txuj ci uas nws tau ua, nyeem Malakaus 5:25-34 los sis saib zaj YEEB YAJ KIAB. Thiab tham txog ob lo lus no.
-
Tus poj niam muaj mob hauv zaj yeeb yaj kiab no ntseeg li cas?
-
Koj nyiam dab tsi txog qhov txuj ci no?
Nyeem Yauhas 5:36, thiab tham txog lo lus no:
-
Yexus tej txuj ci “ua tim khawv” los sis ua pov thawj li cas txog nws?
Koj puas paub?
Peb paub ntau yam txog Yexus hauv plaub phau ntawv hauv phau Vajlugkub hu ua Txoj Xov Zoo uas yog phau Mathais, Malakaus, Lukas, thiab Yauhas. Cov uas sau Txoj Xov Zoo lawv nyias sau raws li tej uas nyias pom thiab paub txog Yexus. Thaum peb nyeem tag nrho plaub phau no, ces peb yuav pom tseeb txog Yexus lub neej.
-
MATHAIS
xub sau tiav nws phau ua ntej. Phau no qhia ntau yam txog tej uas Yexus ua. Qhov tseem ceeb tshaj uas Yexus ua yog qhia txog Vajtswv lub Nceeg Vaj los sis Vajtswv txoj kev kav.
-
MALAKAUS
sau tau phau tsawg tshaj. Phau no sau txog ntau yam uas muaj ceem heev.
-
LUKAS
sau tias kev thov Vajtswv tseem ceeb heev rau Yexus thiab qhia txog qhov uas Yexus ua siab mos siab muag rau cov poj niam.
-
YAUHAS
sau txog tej lus uas Yexus hais rau nws cov phooj ywg zoo thiab lwm tus. Qhov no qhia peb ntau yam txog Yexus tus yam ntxwv tias nws yog ib tug neeg zoo li cas tiag.
IB TXHIA HAIS TIAS: “Yexus tsuas yog ib tug neeg zoo xwb, tsis muaj ntau tshaj ntawd lawm.”
-
Koj ho xav li cas?
KOJ KAWM TAU DAB TSI
Yexus tshaj tawm txog Vajtswv lub Nceeg Vaj, nws tau ua ntau yam txuj ci, thiab nws mloog Yehauvas lus rau txhua txoj ke.
Rov Tham Dua
-
Thaum Yexus tseem nyob hauv ntiaj teb no nws tes hauj lwm tseem ceeb tshaj yog dab tsi?
-
Yexus tej txuj ci qhia li cas rau peb?
-
Yexus qhia tej zaj zoo li cas uas pab tau peb?
TSHAWB NTXIV
Lub ntsiab uas Yexus tham heev tshaj yog dabtsi?
Mus nyeem seb vim li cas peb ntseeg tau tias Yexus tej txuj ci yeej tau muaj lawm tiag tiag.
“Koj Kawm Tau Dab Tsi Txog Tej Txuj Ci Uas Yexus Ua?” (Phau Tsom Faj lub 7 Hli tim 15 xyoo 2004)
Mus nyeem txog ib tug txiv neej seb nws tau hloov nws lub neej li cas thaum nws kawm tau tias Yexus mob siab txog lwm tus npaum li cas.
“Kuv Lub Neej Tsuas Yog Hais Txog Kuv Xwb” (Phau Tsom Faj lub 10 Hli tim 1 xyoo 2014)
Saib tej yam tseem ceeb txog Yexus txoj kev tshaj tawm thaum nws tseem nyob hauv ntiaj teb no.
a Zaj kawm 31-33 yuav qhia ntxiv txog Vajtswv lub Nceeg Vaj.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
