LESENI 16
Iesu be Tanobada ai Ia Noho Neganai Dahaka Ia Karaia?
Taunimanima momo idia laloa Iesu be beibi ta, aonega peroveta tauna ta, eiava idia hamasea gwauraia tauna ta sibona. To iena mauri tanobada ai ita stadilaia amo ia do ita dibaia namonamo, a? Inai leseni lalonai, Iesu ese ia karaia mai anina bada gaudia haida bona oi do ia durua dalana do ita herevalaia.
1. Iesu ia karaia mai anina bada gaukarana be dahaka?
Iesu ese ia karaia mai anina bada gaukarana be “Dirava ena Basileia ena sivarai namona ia harorolaia.” (Luka 4:43 duahia.) Ia harorolaia sivarai namona be, Dirava ese basileia eiava gavamani ta do ia haginia bona unai ese taunimanima edia hekwakwanai ibounai do ia hamaoromaoroa. a Iesu ese lagani toi mai kahana lalonai unai sivarai ia harorolaia goadagoada.—Mataio 9:35.
2. Iesu ese hoa karadia ia karaia ena badina be dahaka?
Baibel ia gwau Dirava be Iesu amo “hoa bona toa karadia ia karaia.” (Kara 2:22) Dirava ese Iesu dekenai siahu ia henia dainai, Iesu ese weda ia biagua diba, hutuma ia ubua, gorere ia hanamoa, danu mase taudia ia hamauria. (Mataio 8:23-27; 14:15-21; Mareko 6:56; Luka 7:11-17) Iesu ena hoa karadia amo ia hedinarai goevagoeva ia be Dirava ese ia siaia. Danu, unai ese ia hahedinaraia Iehova be mai ena siahu iseda hekwakwanai ibounai ia hamaoromaoroa totona.
3. Iesu ena mauri dalana amo dahaka ita dibaia?
Iesu ese dala idauidau ai Iehova ia kamonai henia. (Ioane 8:29 duahia.) Herevana Iesu be dagedage ia davaria, to ia be mai abidadama ida iena Tamana ia badinaia ela bona ia mase. Ia hamomokania taunimanima ese Dirava idia hesiai henia diba, nega aukadia lalonai danu. Iesu be “haheitalai namona ia hahedinaraia, unai dainai iena aena gabudia ai do [ita] raka.”—1 Petero 2:21.
DIBA MA HAIDA ABIA
Mani Iesu ese sivarai namona ia harorolaia dalana bona ia karaia hoa karadia oi laloa.
4. Iesu ese sivarai namona ia harorolaia
Iesu be dala ai, kahu bada lalonai kilomita handred ia raka, taunimanima momo dekenai sivarai namona ia gwauraia totona. Luka 8:1 duahia, bena inai henanadai herevalaia:
-
Iesu be ia idia kamonai henia totona idia haboua taudia sibona dekenai ia haroro, a?
-
Iesu be dahaka ia karaia taunimanima ia davaria totona?
Dirava ia peroveta Mesia ese sivarai namona do ia harorolaia. Isaia 61:1, 2 duahia, bena inai henanadai herevalaia:
-
Iesu ese edena dala ai unai peroveta herevana ia hagugurua?
-
Oi laloa hari taunimanima ese sivarai namona idia kamonai be namo, a?
5. Iesu ese ia hadibaia mai anina bada hereva momokanidia
Iesu be Dirava ena Basileia sivarai namona ia harorolaia sibona lasi, to heduru dala namodia ia hadibaia danu. Mani iena Ororo Harorona ai ia gwauraia haheitalai haida ita herevalaia. Mataio 6:14, 34 bona 7:12 duahia, bena inai henanadai herevalaia:
-
Iesu be unai siri amo dahaka heduru dala namodia ia hadibaia?
-
Oi laloa hari unai sisiba namodia ese taunimanima ia durua diba, a?
6. Iesu ese hoa karadia ia karaia
Iehova ena siahu amo Iesu ese hoa karadia momo ia karaia. Haheitalai ta itaia totona, Mareko 5:25-34 duahia eiava VIDIO itaia. Bona henanadai herevalaia.
-
Vidio ai gorere hahine be dahaka ia abia dae momokani?
-
Inai hoa karana ai dahaka oi ura henia?
Ioane 5:36 duahia, bena inai henanadai herevalaia:
-
Iesu ia karaia hoa karadia ese dahaka ia “hamomokania”?
Inai oi diba, a?
Inai Baibel ena Evanelia bukadia foa Mataio, Mareko, Luka, bona Ioane lalonai Iesu ena sivarai idia noho. Evanelia bukadia idia torea taudia ta ta be Iesu ena sivarai idauidau idia torea. Unai Evanelia bukadia foa ita duahia neganai Iesu ena mauri dalana ita lalopararalaia.
-
MATAIO
ese Evanelia buka ginigunana ia torea. Unai ese Iesu ena hahediba herevadia, hegeregere Dirava ena Basileia ia sivarailaia.
-
MAREKO
ese Evanelia buka kwadogina ia torea. Unai ese Iesu dekenai idia vara gaudia idauidau ia sivarailaia.
-
LUKA
ia hahedinaraia Iesu be guriguri karana ia laloa bada bona hahine ia kara namo henidia.
-
IOANE
ese Iesu mai ena turadia bona haida ida ia herevalaia gaudia ia sivarailaia. Unai amo Iesu ena kara ita dibaia.
HAIDA IDIA GWAU: “Iesu be tau namona ta sibona.”
-
Dahaka oi laloa?
POINT BADANA
Iesu ese Dirava ena Basileia ia harorolaia, hoa karadia ia karaia, bona gau ibounai lalonai Iehova ia kamonai henia.
Riviu
-
Iesu be tanobada ai ia noho neganai, ia karaia gaukara badana be dahaka?
-
Iesu ena hoa karadia ese dahaka ia hamomokania?
-
Iesu ese dahaka heduru dala namodia ia hadibaia?
REFERENS ITAIA
Iesu ese nega momo dahaka ia herevalaia?
“Dirava Ena Basileia—Dahaka Dainai Iesu ese Ia Laloa Bada?” (Gima Kohorona, October 1, 2014)
Iesu ena hoa karadia idia vara momokani ita abia dae ena badina oi laloa.
“Iesu Ena Hoa Karadia—Dahaka Oi Dibaia?” (Gima Kohorona, July 15, 2004)
Iesu ena haheitalai, sibona ena ura ia dadaraia karana ese tau ta ia durua dalana oi duahia.
“Lau be Sibona Lau Laloa Bada” (Gima Kohorona, October 1, 2014)
Iesu ena haroro gaukara be idia vara nega hegeregerena ai idia torea ena lista oi itaia.
a Leseni 31-33 ese Dirava ena Basileia do ia herevalaia namonamo.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
