PELAJAR 16
Nama Digaga Jesus Lebuh ba Dunya?
Mayuh orang ngumbai Jesus nya seiku anak mit ti lemi, pengajar ti landik, tauka seiku lelaki ke diukum bunuh. Kebendar iya, bisi mayuh utai ke ulih dipelajarka kitai pasal Jesus ari pengidup iya ba dunya. Ba pelajar tu, kitai deka beratika pengawa ke dikereja Jesus maya iya ba dunya sereta penguntung nya ke kitai.
1. Nama pengawa Jesus ti pemadu beguna?
Ku Jesus, ‘Aku enda tau enda mega nusui Berita Manah pasal Perintah Petara.’ (Bacha Luke 4:43.) Pengelama tiga taun setengah, Jesus ngajar orang pasal Petara ke deka numbuhka perintah ti ulih mutarka semua penanggul mensia. a—Matthew 9:35.
2. Nama kebuah Jesus ngereja pengawa ajih?
Bup Kudus mayuh nyebut pasal ‘kereja ajih, enggau kereja ti nyelai ti dikereja Petara, ulih Jesus.’ (Surat Kereja Rasul 2:22) Sekeda kereja ajih ti digaga Jesus, nyengkaum neduhka ribut enggau gelumbang, meri pemakai ngagai beribu iku orang, ngeraika orang ti sakit, sereta ngangkatka orang ti udah mati idup baru. (Matthew 8:23-27; 14:15-21; Mark 6:56; Luke 7:11-17) Petara meri Jesus kuasa ngereja pengawa ajih. Tu enggau terang nunjukka Petara endang udah nganjung iya. Kelimpah ari nya, pengawa ajih Jesus nunjukka Jehovah bisi kuasa muai semua penanggul kitai.
3. Nama utai ke dipelajarka kitai ari pengidup Jesus?
Kitai belajar tetap ati ngagai Jehovah sereta enda mudah putus pengarap. Taja pan Jesus disakal, iya seruran ngasika Jehovah sereta tetap ati nyentukka pengujung pengidup iya ba dunya. (Bacha John 8:29.) Ari pengidup Jesus kitai nemu, mensia ulih tetap ati ngagai Jehovah, taja pan bisi penanggul. Endang amat, iya ‘ninggalka siti teladan ke kitai ngambika kitai nitihka singkang iya.’—1 Peter 2:21.
BELAJAR MAYUH AGI
Peratika baka ni Jesus madahka berita manah sereta ngereja pengawa ajih.
4. Jesus nusui berita manah
Jesus ngaga pejalai ti jauh sereta mar ngambika ulih madahka berita manah ngagai mayuh orang ke ditemu iya. Bacha Luke 8:1, lalu kerandauka tanya tu:
-
Kati Jesus semina nginjil ngagai orang ke datai ngagai iya aja?
-
Nama digaga Jesus ngambika ulih tetemuka orang?
Petara madahka, Messiah deka nusui berita manah. Bacha Isaiah 61:1, 2, lalu kerandauka tanya tu:
-
Kati Jesus ngereja utai ti dipadah dalam ayat tu? Terangka.
-
Kati nuan ngasaika orang kemayaharitu mega patut ningaka berita manah tu?
5. Jesus ngajar pemendar ti berega
Kelimpah ari nusui pasal berita manah, Jesus mega ngajar utai ti ulih nulung orang ngembuan pengidup ti manah agi. Peratika sekeda chunto ari Ajar ba atas Bukit. Bacha Matthew 6:14, 34, sereta 7:12, lalu kerandauka tanya tu:
-
Nama jaku lalau ke diberi Jesus ba ayat tu?
-
Ba runding nuan, kati jaku lalau tu manah sereta agi ulih dikena kemayaharitu?
6. Jesus ngereja pengawa ajih
Jehovah meri Jesus kuasa kena ngereja mayuh pengawa ajih. Bacha Mark 5:25-34 tauka mainka VIDEO. Lalu kerandauka tanya tu.
-
Nama utai ke dipechayaka indu ke sakit nya?
-
Nama utai ti dikerinduka nuan ari pengawa ajih tu?
Bacha John 5:36, lalu kerandauka tanya tu:
-
Kereja ajih Jesus “besaksi” tauka nunjukka nama pasal iya?
Nemu nuan?
Bup Matthew, Mark, Luke, enggau John mayuh madahka pasal pengidup Jesus. Tiap iku penulis nulis utai ti bebida pasal Jesus. Lebuh kitai macha empat iti bup tu, kitai deka nemu mayuh agi pasal pengidup Jesus.
-
MATTHEW
Tu meh bup ti keterubah. Bup tu madahka ajar ari Jesus, kelebih agi pasal Perintah Petara.
-
MARK
Tu meh bup ti pemadu pandak ari empat iti bup nya. Bup tu mayuh cherita ti ngalitka ati pasal pengidup Jesus.
-
LUKE
Bup tu bejaku pasal sampi sereta nunjukka pemanah Jesus ngagai sida ke indu.
-
JOHN
Bup tu ngembuan mayuh randau Jesus enggau bala bakih iya sereta orang bukai. Tu nulung kitai ngelala agi pemanah Jesus.
BISI ORANG MADAH: “Jesus nya Petara ti pemadu bekuasa.”
-
Nama runding nuan?
LANSA
Jesus nusui pasal Perintah Petara, ngereja pengawa ajih, sereta seruran ngasika Jehovah.
Ulang Kaji
-
Nama pengawa Jesus lebuh ba dunya?
-
Nama ulih dipeda kitai ari kereja ajih Jesus?
-
Nama ajar Jesus ti beguna ke pengidup kitai?
ARAM BELAJAR
Nama topik ke suah disebut Jesus?
“Perintah Petara—Nama Kebuah Nya Beguna ba Jesus” (Menara Jaga, 1 Oktober 2014)
Peratika kebuah kitai ulih pechaya kereja ajih Jesus amat kala nyadi.
“Kereja Ajih Jesus—Nama Utai Ke Ulih Dipelajarka Nuan?” (Menara Jaga, 15 Julai 2004)
Bacha pasal baka ni pengidup seiku lelaki berubah pengudah belajar ari utai ti udah dikereja Jesus.
Peratika pengawa ti beguna ke nyadi lebuh Jesus nginjil ba dunya.
“Utai ti Nyadi lebuh Jesus ba Dunya” (Bup Kudus Salin Dunya Baru dalam jaku Melayu, Apendiks A7)
a Kitai deka berandau mayuh agi pasal Perintah Petara ba pelajar 31-33.
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
