LEKSION 16
Anni i Kingngua ni Jesus ta Keggana ta Davvun?
Manono na aru nga totolay kani Jesus i tadday nga baby, masirib nga profeta, onu nu kunnasi yayya nga natay. Ngem egga paga kari i mammuattam meyannung nisa nu gigiammuattam i pattolena taw ta davvun? Taw nga leksion, ikonsidera tam i karuan ta pinaka-importante ira nga gannug nga kingngua ni Jesus anna nu anni i meyuffunna nikaw.
1. Anni i primeru nga trabahu ni Jesus?
I ‘pangilammuyag ta Mapia nga Dumug na Pammaguray na Dios’ onu Pappatulan na Dios i primeru nga trabahu ni Jesus. (Bibbigan i Lucas 4:43.) Nilayyagayyana i mapia nga dumug nga mangipataddag i Dios tu pappatulan, onu gobiernu nga yatun i solusion ta ngamin nga problema na totolay. a Malappo nga nilayyagayya ni Jesus i makapagaram nga mensahe ta unag na tallu anna gaddua nga ragun.—Mateo 9:35.
2. Ngatta nagangngua si Jesus tu milagro ira?
Kagian na Biblia nga niyusa na Dios si Jesus tapenu magangngua tu “makapabbaw ira nga milagro anna takkilala.” (Kingngua 2:22) Megafu ta pakapangngua na Dios, nakontrol ni Jesus i paniempo, napakanna i rinivu nga totolay, nanguru tu mataki, anna namaginnolay tu natay ira. (Mateo 8:23-27; 14:15-21; Marcos 6:56; Lucas 7:11-17) Pakurugan na milagro ira nga kingnguana nga zinog yayya na Dios. Masingan gapa tatun nga egga i pakapangngua ni Jehova nga solban i ngamin nga problema tam.
3. Anni i magigiammu tam ta pinattolay ni Jesus?
Kanayun nga nattuppal si Jesus kani Jehova. (Bibbigan i Juan 8:29.) Maski nu nakokkontra yayya, kingnguana lagapa i nipakua na Yamana anna matalo yayya adde ta patena. Napakurugna nga makapasserbi i totolay ta Dios maski nu mariga ira i situasion. Nangipasingan gafu nittam si Jesus ‘tu apparigan tapenu tuttulan yayya.’—1 Pedro 2:21.
GIGIAMMUAN I ARU PAGA
Gigiammuan nu kunnasi nga nilayyagayya ni Jesus i mapia nga dumug anna nagangngua tu milagro ira.
4. Nilayyagayya ni Jesus i mapia nga dumug
Nilakag ni Jesus i ginatu nga kilometro na ginavu ira nga dalan tapenu ilayyagayya i mapia nga dumug ta aru nga totolay. Bibbigan i Lucas 8:1, anna paguvovugan yaw ira nga pakkiavu:
-
Nilayyagayyan kari laman ni Jesus i totolay nga minay nisa?
-
Anni i kingngua ni Jesus tapenu malayyagayyanna i totolay?
Niprofesiya na Dios nga ilayyagayya na Mesias i mapia nga dumug. Bibbigan i Isaias 61:1, 2, anna paguvovugan yaw ira nga pakkiavu:
-
Kunnasi nga natuppal kani Jesus yaw nga profesiya?
-
Kawagan kari nga maginna na totolay sangawe i mapia nga dumug?
5. Nabalor i nituddu ira ni Jesus
Ari laman tu mapia nga dumug meyannung ta Pappatulan na Dios i nilayyagayya ni Jesus. Nangituddu gapa yayya tu praktikal ira nga leksion. Ikonsidera i karuan nga angngarigan ta nitudduna ta Sermon ta Vukig. Bibbigan i Mateo 6:14, 34 anna 7:12, anna paguvovugan yaw ira nga pakkiavu:
-
Anni ira nga praktikal nga tabarang i nituddu ni Jesus taw ira nga teksto?
-
Praktikal kari paga yatun ira nga tabarang ta tiempo tam?
6. Nagangngua si Jesus tu milagro ira
Iniddan ni Jehova tu pakapangngua si Jesus tapenu magangngua tu aru nga milagro. Ikonsidera i tadday nga angngarigan. Bibbigan i Marcos 5:25-34 onu girawan i VIDEO. Kabalinna, paguvovugan i tumunug ira nga pakkiavu.
-
Ta video, anni i ninono na mataki nga babay?
-
Anni i nagustuammu tatun nga milagro?
Bibbigan i Juan 5:36, anna paguvovugan yaw nga pakkiavu:
-
Anni i ‘pakurugan’ na milagro ira nga kingngua ni Jesus meyannung nisa?
Ammum kari?
Aru ta informasion meyannung kani Jesus ay mabibbig ta appa nga Evanghelio na Biblia—i Mateo, Marcos, Lucas, anna Juan. Nadduruma nga detalye meyannung kani Jesus i nirekord na kada tadday ta nattura ta Evanghelio. Nu bibbigattam yatun nga appa nga libru, mammuattam i interu nga pattolay ni Jesus.
-
MATEO
I ollu nga nangitura ta Evanghelio. Aru i niturana nga tuttuddu ira ni Jesus, naffokus yayya ta tuttuddu ira ni Jesus meyannung ta Pappatulan na Dios.
-
MARCOS
Niturana i pinaka-ababba nga Evanghelio. Paspas i patturunug na istoria anna makapa-interes.
-
LUCAS
Nirekordna nu kunnasi kabalor kani Jesus i pakimallo anna i masippo nga pattratuna ta babbay.
-
JUAN
Niturana i meyannung ta personalidad ni Jesus gukaban na pangirekordna ta pakiyuvovug ni Jesus ta madukko ira nga kokkofunna anna ta tanakuan.
I KAGIAN NA KARUAN: “Tadday laman nga masippo nga tolay si Jesus.”
-
Anni i makagim?
ANNI I NAGIGIAMMUM?
Nilayyagayya ni Jesus i meyannung ta Pappatulan na Dios, nagangngua tu milagro ira, anna kanayun nga sinuppalna si Jehova.
Review
-
Anni i primeru nga trabahu ni Jesus ta keggana ta davvun?
-
Anni i pakurugan na milagro ira nga kingngua ni Jesus?
-
Anni ira nga praktikal nga leksion i nituddu ni Jesus?
I AWAYYAM PAGA KUAN
Anni nga topiko i maruddu nga nituddu ni Jesus?
“Pappatulan na Dios—Ngatta Importante Kani Jesus?” (Passifusifutan, Oktubre 1, 2014)
Ikonsidera nu ngatta makapattalo ittam nga kurug i kingngua ira ni Jesus nga milagro.
“Anni i Magigiammum ta Milagro ira nga Kingngua ni Jesus?” (Passifusifutan, Hulio 15, 2004)
Bibbigan nu kunnasi nga nakoffun ta tadday nga lalaki i passakrifisio ni Jesus.
“Baggì Laman i Nononopakku” (Passifusifutan, Oktubre 1, 2014)
Innan i patturunug na kingngua ira ni Jesus ta pamministeriona.
a Magigiammu ta Leksion 31-33 i aru paga meyannung ta Pappatulan na Dios.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
