ƐLĀ Ō NWU ƆMƐ 16

Ɔdi Nɛ Ujisɔsi Ya Eko Nɛ Ó Yɔ Ɛcɛ A?

GBƆƆ

Ācɛ alɛwa jé odee lɛyikwu Ujisɔsi, amáŋ ācɛ ōhī jé odee lɛyikwu ɔdā nōo ya da ɔ eko nɛ ó wɛ ɔyipɛ nɛ̄ŋcɛ́ a foofunu. Ācɛ ɔhá jé ɔ ka ó wɛ ɔcomɛɛbɛ nōo jeeyi. Ācɛ ɔhá kē jé lɛyikwu ikwū ku nu foofunu. Amáŋ, alɔ lɔfu jé odee lɛyikwu ɔ tōōtɔ̄ɔ̄ ŋma lɛ ō leyi yɛ ɛgɛ nɛ ó lā oyeeyi ku nu ipu ɛcɛ nyā. Ipu ɛlā ō nwu nyā, alɔ géē leyi yɛ aɔdā ō cɛgbá nɛ ó ya mla ɛgɛ nōó lɔfu ta uwɔ abɔ a.

1. Ɔdi wɛ uklɔ ku Ujiɔsi kpɔcii a?

Uklɔ okpɔcii ku Ujisɔsi wɛ ō “tɔ́ɔna kú ɔ̄kōolɔhi ohígbū ajɔ̄ɔ̄cɛ́ kú Ɔwɔicō.” (Jé Ulúku 4:43.) Ó tɔɔna ku ɔkoolɔhi ka Ɔwɔico géē je ajɔɔcɛ amāŋ igɔmɛnti kwaajɛ nōo géē ya ɛjɛɛji unwalu ku alɔ. a Ujisɔsi bi ihayi ɛta ce ɔya ɛhili le tɔɔna ku ɔkoolɔhi a, ó kē cɛ lɛ ɛ̄jɛ̄ je ɔ flu flu ŋ.—Umátiyu 9:35.

2. Ɔdiya nɛ Ujisɔsi gē yuklɔ idaago a?

Ubáyíbu kɛla lɛyikwu “úklɔ́ nɛ̄hi mɛ́mla ɔdā idāagó mɛ́mla ɔdōcābɔ̄ nɛ̄ Ɔwɔicō yá bū [Ujisɔsi].” (Úklɔ́ kú Ācotɛ̄hɔ̄ 2:22) Mla ɔfu ku Ɔwɔico, Ujisɔsi da ugbagwu ku isu kóō yɔ cii, ó je ɔdole lɛ ɛwa nɛhi ku ācɛ, hɛ ācɛ nōo yɔ i doōcē ta klla je ācɛ nōo kwū a heyi ŋma ɔlekwu. (Umátiyu 8:23-27; 14:15-21; Umáki 6:56 Ulúku 7:11-17) Uklɔ idaago ku Ujisɔsi mafu peee ka Ɔwɔico tu ɔ ɛhɔ a. Uklɔ idaago a klla mafu ka Ɔwɔico lɔfu ō ya ɛjɛɛji unwalu ku alɛɛcɛ.

3. Ɔdi nɛ alɔ lɔfu nwu ŋma ɔwɛ nɛ Ujisɔsi lā oyeeyi ku nu a?

Ujisɔsi gē lɛyitaajɛ lɛ Ujehofa ipu āhɔ̄ duuma. (Jé Ujɔ́ni 8:29.) Ujisɔsi ya ɛjɛɛji ɔdā nɛ adā nu da ɔ kóō ya a. Ó ya lɛ a ipu ɛjɛɛji oyeeyi ku nu, naana nɛ ācɛ alɛwa ceyitikwu kéē ce ɔ ŋma anu a. Ó le mafu peee kóō tɔɔtɛ ku alɛɛcɛ kéē gba Ujehofa ɛ̄gbā naana néē yɔ ipu āhɔ̄ olɔnɔ. Ujisɔsi lɛ ocabɔ taajɛ ku ‘alɔ gbla ɔ ya.’—1 Upíta 2:21.

JÉ GƆBU

Leyi yɛ ɛgɛ nɛ Ujisɔsi tɔɔna ku ɔkoolɔhi a klla yuklɔ idaago a.

4. Ujisɔsi tɔɔna ku ɔkoolɔhi a

Ujisɔsi yɛ iyawu ikpo ukilomita alɛwa bu ɔwɛ umla kóō tɔɔna ku ɔkoolɔhi a lɛ ɛwa ku ācɛ. Jé Ulúku 8:1, cɛɛ ku aa kɔka lɛyikwu aɔka nōo ba nyā:

Ujisɔsi tɔɔna lɛ ācɛ nōo jila tɔha kéē jahɔ tu ɔ foofunu nɛɛ?
Ɛgɛnyá nɛ Ujisɔsi ceyitikwu kóō dɔka ācɛ a?

Ɔwɔico ka taajɛ ka Umɛsayiya a géē tɔɔna ku ɔkoolɔhi a. Jé Ayisáya 61:1, 2, cɛɛ ku aa kɔka lɛyikwu aɔka nōo ba nyā:

Ɛgɛnyá nɛ Ujisɔsi ya akacɛ nyā jila?
A gbɛla ka ācɛ icɛ cɛgbá ō po ɔkoolɔhi a?

5. Ujisɔsi nwu ɛlā ɔkwɛyi nōo cɛgbá

Ba tu uklɔ ku ɔna ō ta ku ɔkoolɔhi ku Ajɔɔcɛ ku Ɔwɔico a, Ujisɔsi nwu ɛnɛɛnɛ ɛlā nōo gē tu alɔ abɔ. Leyi yɛ ocabɔ ōhī ku ɛlā nɛ Ujisɔsi nwu ɛyi ɛfu a. Jé Umátiyu 6:14, 34 mla 7:12, cɛɛ ku aa kɔka lɛyikwu aɔka nōo ba nyā:

Ɛnɛɛnɛ ukɔ́ nyá nɛ Ujisɔsi tu ipu aɔgba nyā a?
A gbɛla ka ukɔ́ nyā ta ācɛ abɔ icɛ gla kpɔ ɛ?

6. Ujisɔsi ya uklɔ idaago alɛwa

Ujehofa je ɔfu lɛ Ujisɔsi kóō ya uklɔ idaago alɛwa. O ya ɛɛ ku a má ocabɔ éyi, jé Umáki 5:25-34 amāŋ lɛ UVIDIO nyā mafu. Cɛɛ ku aa kɔka lɛyikwu aɔka nōo ba nyā.

UVIDIO: Ɔcɛnya Éyi Le Hɛta Ŋma Ōcē Ku Nu (5:10)

Ipu uvidio a, ɔdi nɛ ɔcɛnya nōo yɔ i doōcē a kpɔtuce a?
Ɔdi he uwɔ ɔtu lɛyikwu uklɔ idaago nyā a?

Jé Ujɔ́ni 5:36, cɛɛ ku aa kɔka lɛyikwu ɔka nyā:

Ɔdi nɛ uklɔ idaago ku Ujisɔsi “cē . . . ijáalí” ku nu amāŋ mafu lɛyikwu ɔ a?

A jé?

Ɛyinɛhi ku aɔdā nōo ya ipu oyeeyi ku Ujisɔsi a yɔ ipu ɔkpá ku Umátiyu, Umáki, Ulúku, mla Ujɔ́ni. Eyeeye ku ācɛ nōo ta ɔkpá nyā ta ɔdā ɛyɛɛɛyɛyi lɛyikwu oyeeyi ku Ujisɔsi. Ɔdaŋ ku alɔ jé ɔkpá ɛnɛ nyā, alɔ géē jé ɛnɛɛnɛ oyeeyi nɛ Ujisɔsi lā a.

UMÁTIYU

ta ɔkpá ku nu aflɛyi a. Ɔkpá nyā kɛla lɛyikwu ɛlā ō nwu ku Ujisɔsi, ofiyɛ duu a ɛlā nɛ Ujisɔsi nwu lɛyikwu Ajɔɔcɛ ku Ɔwɔico a.
UMÁKI

ta ɔkpá nōo nyɛ fiyɛ duu ŋma ipu aɔkpa ɛnɛ a. Ɔkpá a kɛla lɛyikwu ɔdā olɔhi alɛwa nɛ Ujisɔsi ya a.
ULÚKU

ɔkpá nyā da alɔ lɛyikwu ɛgɛ nɛ ɔkɔ ō gba cɛgbá lɛ Ujisɔsi lɛ a mla ɛgɛ nɛ ó klla gbonɛnɛ lɛ acɛnya a.
UJƆ́NI

ɔkpá nyā da alɔ aɔdā alɛwa nɛ Ujisɔsi kɛla lɛyikwu ɔ mla aɔya ku nu nōo kwu ɔ ajaajɛ mla ācɛ ɔhá. Ɛnyā ta alɔ abɔ jé ɛdɔ ɔcɛ nɛ Ujisɔsi wɛ a.