TOLUMỌYE 16

Jesus Kiriogbo Bọọ Timi Ifie Bị Teeki Mịẹ Ma O?

FARỊ

Zụa kịmịama Jesus akị aya zii tọbọụ, kịlịkịlị bụrụ-owei, anịghakpọ ịmgbẹsẹtịịn ghọ fịị dọụ mịnị kịmị bara kị diimọ wẹrị emi. Anịa omịnị laa Jesus kiriogbo bọọ inyenrin timi bara dii wẹrị yetolumọ akị a paa emi a? Bei egberitịbị mị, omịnị Jesus mịẹ zụa yelaa yeama má bei yebo baratụa ị́ pịrị mịnị bara diitụa mịnị.

1. Te fịrị kị yelaa Jesus pịrị dẹịn ma o?

“Ọkpọnanaowei Daabụọ ebi egberi gbaa” fịrị kị yelaa Jesus pịrị dẹịn mị. (Luke 4:43 goo.) Ọkpọnanaowei Daabụọ mị Jesus kịmị-awọụ bụụdọọn mịnị yemọsẹ kụn siin mịnị ebi egberi kị gbaatimi mị. a Jesus tara kụraị mọ ekise mọ ka kị ebi egberi gbaa mị.—Matthew 9:35.

2. Tetuu kị duonị Jesus tamamaa yeama mịẹ ma o?

Bible gbaa bara bị “Ọkpọnanaowei baratụa [Jesus] pịrị biin tamamaa yeama má lelei-ama mịẹ mị.” (Acts 2:22) Ọkpọnanaowei baratụa ụ pịrị duonị, Jesus laa erein-tọrụ kẹrịtịẹmọ, biin kịmịama gbalị, dọọn-kịmịama zụọ, má fị dẹ otu kpọ tịịn seri mị. (Matthew 8:23-27; 14:15-21; Mark 6:56; Luke 7:11-17) Jesus mịẹ tamamaa yebo Ọkpọnanaowei kị ụ fịrịmọ bo bara mịẹdịa wẹrị emi, má Jehovah kụrọ nana wẹrị wó nana wẹrị emi bụụdọọn yebosẹ seri siin mịnị bara kị mịẹdịa wẹrị emi.

3. Omịnị Jesus inyenrin bara duo teeki tolumọ akị a paa emi a o?

Jesus ifiemọsẹ Jehovah gbaa bara kị diimịẹ mị. (John 8:29 goo.) Bụụdọọn yeama kị Jesus laa kị gbaa kpọ, omịnị wo Daụ dọụyọ kị mịẹ timi tuu laa mị. Bei yemị mịẹdịa amọ kịmị-awọụ bụụdọọn yeama bolou k’emi kpọ, laa Ọkpọnanaowei dọụyọ mịẹ a paa emi. Anị duonị Jesus “[wó] inyenrin agbẹị emi barasẹ gbaa gaan wó pịrị dẹ.”—1 Peter 2:21.

EBIBARA TUUDỌỤ

Jesus tamamaa yeama mịẹ má ebi egberi gbaa bara diitụa.

4. Jesus ebi egberi gbaa kịmịama pịrị mị

Jesus bei ebi egberi gbaa kịmịotu pịrị mụ duonị, ebigha má alaa kụrọmọ ụwọụama wẹnị mị. Luke 8:1 goo dá, bei biibịbịmọ kẹrị ẹrẹtei:

Jesus ebi egberi gbaa akị ụ dọụ bo otu bẹtịbị kị pịrị ma?
Ebi egberi gbaa kịmịotu pịrị mụ duonị Jesus ọngọtụa teeki ma o?

Messiah bo daba, omịnị ebi egberi gbaa kịmịotu pịrị mịnị bara Ọkpọnanaowei mọ gbaa mị. Isaiah 61:1, 2 goo dá, bei biibịbịmọ kẹrị ẹrẹtei:

Jesus tebara ka kị mị bụrụ egberi mịẹ beinmọ ma o?
Kịmịama bei tịẹkiri kpọ ebi egberi naa agbẹị emi a?

5. Jesus yelaa tolumọbịbị-ama pịrị mị

Daabụọ ebi egberi gbaa yọ bụọmọ dẹ mị, Jesus mọkpọ yelaa gesii-ama tolumọ mị. Jesus Ogun agọnọ bọọ Tolumọ egberimọ duo zụa mịẹdịa yeama dii. Matthew 6:14, 34 má 7:12 goo dá, mị biibịbịmọ kẹrị ẹrẹtei:

Bei goo yọ dii daba, Jesus te yelaa ebi tolumọbịbịama kị pịrị ma o?
Bei tolumọbịbịmọ, mọkpọ baratụa kịmị-otu pịrị a paa emi bara ị́ mọ tọn mị?

6. Jesus tamamaa yeama mịẹ mị

Jehovah kụrọ akị Jesus pịrị wẹrị biin tamamaa yeama mịẹ mị. Kẹnị mịẹdịaye akị, Mark 5:25-34 a goo anịghakpọ VIDIO farị. Má kirianga bọọ emi biibịbịmọ kẹrị ẹrẹtei.

VIDIO: Dọọntimi Ere Zụọ Mị (5:10)

Vidio bolou bị, dọọntimi erema teeki biberin wẹrị ma o?
Bei tamamaa ye gbelemọ yọmị, teeki ị́ dịsẹ dẹịn emi a o?

John 5:36 goo dá, mị biibịbị kẹrị ẹrẹtei:

Jesus wẹnị tamamaa fịrịbo, teeki “mịẹ gaan” ma o?

Ị́ kpọ nimi ma?

Omịnị Matthew, Mark, Luke, má John Bible funmọ kị goo wẹrị Jesus nimi dẹịn mịnị. Gẹẹ-otumọsẹ Jesus gbelemọ yọmị bẹbẹbẹbẹ egberi-ama kị gẹẹ mị. Bei nia Bible funmọsẹ wó mọ goo daba, omịnị ebibara Jesus inyenrin ụndụ bọọ sụọtuu nimi mịnị.

MATTHEW

kị bọlọụ Jesus gbelemọ egberi gẹẹ mị. Omịnị Jesus tolumọyebo kị gẹẹ mị, gbaamaba, Ọkpọnanaowei Daabụọ egberimọ.
MARK

fun kị zaụ dẹịn emi. Omịnị biin kịmị angọ ghọ sụọ egberi-ama kị gẹẹ mị.
LUKE

gẹẹ bara bị, tẹẹbịbị yelaa Jesus pịrị emi má omịnị ebibara ka kị ereotu kẹrị inyenrin mị.
JOHN

Jesus wo naịn dẹịn ikie-otubomọ má zịnị-otubomọ ẹrẹtei egberimọ kị gẹẹ mị. Mị egberibo baratụa wó pịrị Jesus kịmị paa nimi mị.