ILUEMHIN 16
Be IJesu Lu Ẹghe Nin Ọle Rẹ Ha Ribhi Otọ?
A ha tẹmhọn iJesu, ebi ọle diayẹ ẹghe nan rẹ la biẹ ọle, la ẹghe nan rẹ ha khan ọle ọbhi okhun oran, ọle vae bhi ọkhọle ọsi ẹbho ne bunbun. Ẹbho eso yẹ riale ghe ọkpa bhi ene akhasẹ iJesu khin. Ọkpakinọn, mhan dẹ sabọ luẹ emhin ne bunbun rẹji Jesu sade mhan gbẹlokotọ fẹ emhin nin ọle lu ghe, ẹghe nin ọle rẹ ha ribhi ọne otọ nan. Bhi ọne uhọnmhọn-ọta nan, mhan dẹ zilo nyan emhin kpataki eso nin Jesu lu, bi ebi ele rẹ rẹtẹ mhan yẹ.
1. Be hi iwẹnna kpataki nin Jesu lu ẹghe nin ọle rẹ ha ribhi ọne otọ nan?
Iwẹnna nan rẹ ‘wewe ọta nọn mhẹn ọsi Agbejele nọnsi Osẹnobulua,’ ọle hi iwẹnna kpataki nin Jesu lu. (Tie Luke 4:43.) Ọle da ha taman ẹbho ghe, Osẹnobulua dẹ mun Agbejele gbọ, nọn ha re ọkpẹnlẹn ọbhi emhin ebe rebhe ne sunu bhi ọne agbọn nan. a Bhi ẹkẹ ikpe ea bi ukhiọnmhẹn, Jesu da wo ha wẹnna kaka nin ọle rẹ wewe ọne ọta nọn mhẹn man ẹbho.—Matthew 9:35.
2. Bezẹle nin Jesu da ha lu emhin ọhan-ilo?
Baibo tẹmhọn ‘iwẹnna ọhan-ilo, emhin ọnyunuan, bi iyaman kẹkẹ nin Osẹnobulua re iJesu lu.’ (Acts 2:22) Osẹnobulua da re ahu nin Jesu rẹ lọ efi, yẹ re ebale nin ẹbho ne bunbun le. Ọ da yẹ re ahu nanlẹn rẹ hinmhin ẹbho ne khọnmhọn, yẹ riọ ẹbho ne yu kpanọ bhi uu. (Matthew 8:23-27; 14:15-21; Mark 6:56; Luke 7:11-17) Emhin ọhan-ilo nin Jesu lu da wo rẹman ghe, Jehova je ọle re. E da yẹ rẹman ghe, Jehova mhọn ahu nin ọle ha rẹ re ọkpẹnlẹn ọbhi ọbalọ rebhe.
3. Be imhan ha sabọ miẹn luẹ bhi uwedẹ nin Jesu rẹ nyẹnlẹn?
Ẹghe rebhe Jesu rẹ ha lu emhin ne yẹẹ Aba ọle nin Jehova. (Tie John 8:29.) Arẹmiẹn eghian ọlẹn ha kpokpo ọle, Jesu da sẹyẹ sun rẹkhan Aba ọle rẹ sẹbhi ukpẹdẹ nin ọle yu. Jesu da re uwedẹ iẹnlẹn nọnsọle rẹ rẹman ghe, eria dẹ sabọ ga iJehova aharẹmiẹn ele ribhi ọnọghọ. Jesu ‘da re ijiẹmhin esili ọbhi otọ nin mhan, beji mhan ha da manman ha rẹkhan ukpoẹ nin ọle zẹ.’—1 Peter 2:21.
MANMAN LẸN OTỌLE NỌNSẸN
Manman luẹ ebi Jesu rẹ ha wewe ọne ọta nọn mhẹn yẹ, bi ebi ọle rẹ ha lu emhin ọhan-ilo yẹ.
4. Jesu da ha wewe ọta nọn mhẹn
Jesu wo yo agbaẹbho ne bunbun nin ọle dọ wewe ọne ọta nọn mhẹn man ẹbho. Tie Luke 8:1, bha ha zilo nyan ene inọnta nan:
-
Ẹbho ne bu iJesu re ọkpa ọle be ha tẹmhọn Osẹnobulua man?
-
Be bhọ Jesu lu nin ọle da sabọ miẹn ẹbho tẹmhọn Osẹnobulua man?
Osẹnobulua ka tale ọbhi otọ bhi ẹkẹ Baibo ghe, ọne Ọmiẹnmhanfan dẹ wewe ọta nọn mhẹn. Tie Isaiah 61:1, 2, bha ha zilo nyan ene inọnta nan:
-
Be iJesu rẹ mun ọne ọta akhasẹ nan sẹ yẹ?
-
Uwẹ be riale ọ yẹ khẹke nin ẹbho họn ọne ọta nọn mhẹn ẹlẹnan?
5. Jesu yẹ man ẹbho emhin ne ha sabọ rẹkpa ele
Rẹ gbera ẹmhọn Agbejele nin Jesu ha taman ẹbho, ọle da yẹ ha re adia nin ele nọn ha sabọ rẹkpa ele bhi iẹnlẹn. Ji mhan fẹ ijiẹmhin eso ghe bhi ọta ogbakha nin Jesu tale bhi uke oke. Tie Matthew 6:14, 34 bi 7:12, bha ha zilo nyan ene inọnta nan:
-
Adia nela Jesu re nin mhan bhi ene ulọnlẹn nan?
-
Uwẹ be riale ghe, ene adia nan dẹ sabọ rẹkpa mhan ẹlẹnan?
6. Jesu da lu emhin ọhan-ilo ne bunbun
Jehova re ahu nin Jesu rẹ lu emhin ọhan-ilo ne bunbun. Nin uwẹ rẹ daghe emhin ọhan-ilo ọkpa nin ọle lu, tie Mark 5:25-34 la ghe ọne IVIDIO. Bha ha ghe ọle fo, zilo nyan inọnta ne rẹkhan ọlẹn.
-
Be ọne okhuo nọn ha khọnmhọn, nan rẹman bhi ọne ividio rẹọ i?
-
Be re ọne emhin ọhan-ilo nan ti uwẹ bhọ?
Tie John 5:36, bha ha zilo nyan ọne inọnta nan:
-
Be emhin ọhan-ilo nin Jesu lu rẹman rẹji ọle?
Uwẹ be rẹ lẹn?
Ebe nọnsi Matthew, Mark, Luke, bi John bhi Baibo, ele manman tẹmhọn iẹnlẹn nọnsi Jesu bi iwẹnna nin ọle lu bhi ọne otọ nan. Emhin eso ribhọ bhi iẹnlẹn nọnsi Jesu nan ta bhi ebe ọkpa, nan bha ta bhi ọnọnkẹle. Bhiriọ, mhan ha tie ene ebe enẹn, ọ ki rẹkpa mhan rẹ manman lẹn ẹmhọn iẹnlẹn nọnsi Jesu.
-
MATTHEW
Ebe nọnsi Matthew, ọle a ka gbẹn bhi ẹwẹ ene ebe enẹn. Iman-emhin nesi Jesu, ọle ọne ebe nan manman tẹmhọnlẹn, manman nọn, ebi ọle man ẹbho le rẹji Agbejele nọnsi Osẹnobulua.
-
MARK
Ọne ebe nan khere nẹ bhi ẹwẹ ene ebe enẹn. Okha ne ribhi ẹkẹ ọle manman wo mhẹn bhi ehọ.
-
LUKE
Ebe nọnsi Luke wo manman tẹmhọn erọnmhọn, bi ebi Jesu rẹ re obọ esili mun ikhuo yẹ.
-
JOHN
Ebe nọnsi John da rẹkpa mhan rẹ lẹn unan ọria nin Jesu khin. Ọle da taman mhan ebi Jesu rẹ ne imọẹ ọle bi ẹbho ebhebhe ha zilo yẹ.
ẸBHO ESO SABỌ YỌLE: “Ọria esili nọn gheghe nyẹnlẹn bhi ọne otọ nan, ọle Jesu ha khin, Ọ iyi ọle hi Ọmiẹnmhanfan.”
-
Be uwẹ riale yẹ?
EBI MHAN LUẸLE
Jesu tẹmhọn Agbejele nọnsi Osẹnobulua, ọle da yẹ lu emhin ọhan-ilo, yẹ ha hẹnmhọn nin Osẹnobulua bhi idia nọn hi ki rẹ khin.
Uwẹ Be Yẹ Yere?
-
Be hi iwẹnna kpataki nin Jesu lu ẹghe nin ọle rẹ ha ribhi ọne otọ nan?
-
Be emhin ọhan-ilo nin Jesu lu rẹman?
-
Be hi emhin eso nin Jesu man ẹbho le nọn ha sabọ rẹkpa ele?
FẸ ENE EMHIN NAN GHE
Be hi uhọnmhọn-ọta nin Jesu tẹmhọnlẹn nẹ?
Fẹ ebezẹle nin mhan da rẹọbhọ ghe Jesu gene lu emhin ọhan-ilo.
“Ebi Mhan Miẹn Luẹ bhi Emhin Ọhan-ilo Nin Jesu Lu” (The Watchtower, July 15, 2004)
Fẹ ebi okpea ọkpa rẹ fi iẹnlẹn nọnsọle denọ ye, ẹghe nin ọle rẹ dọ luẹ ebi Jesu rẹ ha rẹkpa ẹbho yẹ.
“Ẹmhọn Egbe Mẹn Ọkpa Rẹ Wo Rẹtẹ Mẹn” (The Watchtower, October 1, 2014)
Fẹ emhin kpataki eso nin Jesu lu. A gbẹn ele ọbhi otọ beji ọle rẹ lu ele ọsegbe-ọsegbe.
a Mhan dẹ manman tẹmhọn ọne Agbejele nọnsi Osẹnobulua bhi Iluẹmhin 31-33.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
