TIMEƔRI TIS 16

D acu i gexdem Ɛisa asmi i gella ɣef lqaɛa?

SEL S

Aṭas n lɣaci i geţwalin Ɛisa d llufan, d nnbi neɣ d argaz yeţsufrin. Meɛna, yella wayen nniḍen i nezmer a d-nelmed fell-as ma neɣra ayen i d-inna Wedlis Iqedsen ɣef wasmi i gɛac ɣef lqaɛa? A d-nehdeṛ ɣef kra n leḥwayeǧ yesɛan azal i gexdem Ɛisa, a nwali daɣen deg wacu i k-ɛnant leḥwayeǧ-agi.

1. D acu-t ccɣel yugaren akk wiyaḍ i gexdem Ɛisa?

Ccɣel yugaren akk wiyaḍ i gexdem Ɛisa d aberreḥ n “Linǧil n tgelda n Yillu” (ɣer-ed Luqa 8:1). Linǧil lmeɛna-s “lexbaṛ n lxiṛ”. Lexbaṛ-agi yeqqar-ed belli Ṛebbi ad yesbedd yiwet n tgelda, yeɛni lḥukuma, ara yefrun iɣeblan meṛṛa n yemdanen a. Ɛisa iberreḥ telt snin d nnefṣ yerna mebla aḥbas lexbaṛ-agi i d-yeţţaken asirem (Matta 9:35).

2. D acu i d-beggnent lmuɛǧizat i gexdem Ɛisa?

Adlis Iqedsen ihdeṛ-ed ɣef ‘lbeṛhanat, leɛǧayeb akk-d limaṛat i gexdem Ɛisa’ (Lecɣal 2:22). Ṛebbi yefka-yas tazmert i Ɛisa ad yeḥkem di tbuciḍanin ţ-ţxessaṛin nniḍen, ad yessečč luluf n yemdanen, ad yesseḥlu imuḍan, yerna a d-yesseḥyu ula d wid yemmuten (Matta 8:23-27; 14:15-21; Marqus 6:56; Luqa 7:11-17). Lmuɛǧizat (lbeṛhanat) i gexdem Ɛisa beggnent-ed ɛinani belli d Ṛebbi i t-id-iceggɛen. Beggnent-ed daɣen belli Yahwa yesɛa tazmert akken ad yefru iɣeblan-nneɣ irkelli.

3. D acu ara d-nelmed si tudert n Ɛisa?

Ɛisa yuɣ-as awal i Yahwa di kullec (ɣer-ed Yuḥenna 8:29). Ɣas akken aṭas i t-ixuṣmen, yexdem ayen akk i s-d-iḍleb Baba-s armi ţ-ţaggara n tudert-is. Ibeggen-ed belli lɛibad zemren ad qedcen ɣef Ṛebbi, ula di liḥalat iweɛṛen. Swakka, Ɛisa yeǧǧa-yaɣ-d ‘lemtel iwakken a neddu di lǧeṛṛa-s’ (1 Buṭrus 2:21).

A NNADI A NEFHEM AKTEṚ

A nwali d acu i gexdem Ɛisa akken ad yeţwissen lexbaṛ n lxiṛ, a d-nehdeṛ daɣen ɣef lmuɛǧizat i gexdem.

4. Ɛisa ibecceṛ lexbaṛ n lxiṛ

Ɛisa yelḥa d imeyyaten n kilumitrat deg iberdan yeččuṛen d aɣebbar akken ad yessiweḍ lexbaṛ n lxiṛ i waṭas n lɛibad. Ɣret-ed Luqa 8:1, mbeɛd hedṛet ɣef yesteqsiyen-agi:

Eɛni iberreḥ Ɛisa i wid kan i d-yusan ɣur-es a s-ḥessen?
Acu-ten lmeǧhudat i gexdem Ɛisa akken ad inadi ɣef lɣaci umi ara ibecceṛ?

Ṛebbi icar-ed belli Lmasiḥ ad iberreḥ lexbaṛ n lxiṛ. Ɣret-ed Icɛaya 61:1, 2, mbeɛd hedṛet ɣef yesteqsiyen-agi:

Amek i d-yesseḍra Ɛisa licaṛa-yagi?
Ɛlaḥsab-ik, ḥwaǧen lɛibad ad slen i lexbaṛ-agi n lxiṛ ass-a?

5. Ɛisa yefka-d lewṣayat yetɛeddan

Ɛisa iberreḥ lexbaṛ n lxiṛ n Tgelda n Ṛebbi, meɛna yefka-d daɣen lewṣayat ara inefɛen lɣaci. A d-nwali kra si lewṣayat-agi di lxeṭba-ines yeţţusemman Lxeṭba ɣef wedrar. Ɣret-ed Matta 6:14, 34 akk-d 7:12, mbeɛd hedṛet ɣef yesteqsiyen-agi:

Acu n lewṣayat iṣelḥen i d-yefka Ɛisa deg yefyar-agi?
Ɛlaḥsab-ik, lewṣayat-agi mazal ṣelḥent ass-agi?

6. Ɛisa yexdem lmuɛǧizat

Yahwa yefka tazmert i Ɛisa akken ad yexdem aṭas n lmuɛǧizat. A d-nefk yiwen lemtel: ɣret-ed Marqus 5:25-34 neɣ walit BIDYU-YAGI, mbeɛd hedṛet ɣef yesteqsiyen-agi i d-iţeddun.

BIDYU: Ɛisa yesseḥla yiwet n tmeṭṭut ihelken (5:10)

S wacu i tetḥeqqeq tmeṭṭut-nni ihelken?
D acu i k-yessewhmen di lmuɛǧiza-yagi?

Ɣret-ed Yuḥenna 5:36, mbeɛd hedṛet ɣef westeqsi-yagi:

Ɣef wacu i ‘d-ţcehhident’ lmuɛǧizat i gexdem Ɛisa?

Tɛelmeḍ?

Ayen i nessen ɣef Ɛisa yekka-d abeɛda si ṛebɛa n tektabin yellan deg Wedlis Iqedsen, yeţţusemman Linǧil: Matta, Marqus, Luqa akk-d Yuḥenna. Mkul yiwet si tektabin-agi teḥka-d kra ɣef tudert n Ɛisa. Ma nejmeɛ-ed ayen akk i d-ḥkant, a nissin akken ilaq tudert ifazen n Ɛisa.

MATTA

D neţţa i guran Linǧil-ines d amezwaru. Ihdeṛ-ed ɣef wayen i gesselmed Ɛisa, abeɛda ɣef wayen yeɛnan Tagelda n Ṛebbi.
MARQUS

D neţţa i guran Linǧil akk mecṭuḥen. Yeḥka-d aṭas n leḥwayeǧ yesteɛǧiben i geḍran.
LUQA

Ihdeṛ-ed ɣef lqima i gefka Ɛisa i tẓallit d wamek i gḥunn ɣef tlawin.
YUḤENNA

Yeḥka-d ɣef kra n teswiɛin ideg i gehdeṛ Ɛisa d yeḥbiben-is neɣ d lɛibad nniḍen. Ayagi yeţɛawan-aɣ a d-nelmed akteṛ ɣef ṭṭbiɛa n Ɛisa.