DAW 16

Yesu Mungkan Ga Hta Nga Ai Laman Hpa Galaw Wa Ai Kun?

HPAW

Masha law law gaw, Yesu hpe ma chyangai, hpaji rawng ai myihtoi, si na hkyen ai masha langai hku nna sha mu mada ma ai. Raitim, shi a ginding aga prat hpe bai myit sawn sumru ai kaw na shi a lam hpe grau chye lu na kun? Ndai daw hta, Yesu galaw wa ai ahkyak dik htum lam nkau hte dai lam ni gaw nang hpe gara hku akyu shabyin ya lu ai lam ni hpe hkaja lu na re.

1. Yesu a ahkyak htum bungli gaw hpa rai kun?

Yesu a ahkyak htum bungli gaw, “Karai Kasang mungdan a kabu gara shi ga” hpe hkaw tsun na matu re. (Luka 4:43 hpe hti u.) Shinggyim masha ni a manghkang yawng hpe hparan ya lu na asuya (sh) Karai Kasang gaw de da ai mungdan hte seng ai kabu gara shiga hpe hkaw tsun wa ai. a Yesu gaw dai n-gun lu hpa shiga hpe masum ning jan n hkring n sa hkaw tsun wa ai.—Mahte 9:35.

2. Yesu galaw wa ai mauhpa lam ni a yaw shada ai lam gaw hpa rai kun?

“Karai Kasang gaw . . . Yesu a lata hte magam ningsam, mauhpa amu, lamik kumla” law law hpe madun dan ai ngu Chyum Laika hta tsun da ai. (Kasa 2:22) Yesu gaw Karai jaw ai atsam hte du hkra ladaw ni hpe hkang lu ai, hkying hku law ai masha ni hpe malu masha jaw sha ai, machyi ai masha ni hpe shamai ya ai, si mat ai masha ni hpe pyi asak bai hkrung hkra galaw ya ai. (Mahte 8:23-27; 14:15-21; Marku 6:56; Luka 7:11-17) Yesu galaw wa ai mauhpa lam ni hpe yu yang, shi hpe Karai Kasang shangun dat ai gaw danleng nga ai. Anhte a manghkang yawng hpe hparan ya lu ai atsam Yehowa hta nga ai hpe dai lam ni gaw madun nga ai.

3. Yesu a asak hkrung hkawm sa lam kaw na anhte hpa sharin la lu ai kun?

Yesu gaw masa lam shagu hta Yehowa hpe madat mara wa ai. (Yawhan 8:29 hpe hti u.) Ninghkap ai lam ni nga tim, Yesu gaw shi Kawa galaw shangun mayu ai lam hpe si ai du hkra sadi dung let galaw wa ai. Yakhkak ai masa ni hta pyi, shinggyim masha ni gaw Karai Kasang hpe nawku dawjau lu ai ngu ai hpe shi sakse madun wa ai. Dai lam hku nna, Yesu gaw “shi a hkang” hpe htep lahti hkan nang lu hkra kasi “ningli tawn da” ai.—1 Petru 2:21.

Kahtap Hkaja

Yesu gaw kabu gara shiga hpe gara hku hkaw tsun wa ai lam hte mauhpa amu ni hpe gara hku galaw wa ai lam hpe hkaja yu ga.

4. Kabu gara shiga hpe Yesu hkaw tsun

Yesu gaw nhpu htat ai lam ni hta, deng tsa lam hku lam hkawm wa nna masha law law hpe kabu gara shiga hkaw tsun wa ai. Luka 8:1 hpe hti nna, ndai ga san ni hpe bawngban u:

Yesu gaw shi a ga madat na matu hpawng wa ai masha ni hpe sha hkaw tsun wa ai kun?
Yesu gaw masha ni hpe mu tam na matu hpa galaw wa ai kun?

Meshia gaw kabu gara shiga hpe hkaw tsun dan na ngu Karai Kasang tau hkrau tsun da ai. Esaia 61:1, 2 hpe hti nna, ndai ga san ni hpe bawngban u:

Yesu gaw ndai myihtoi ga hpe hpring tsup hkra gara hku galaw wa ai kun?
Ndai kabu gara shiga hpe dai ni aten na masha ni na la na matu ra ai ngu nang shadu ai kun?

5. Yesu gaw manu dan ai tengman lam ni hpe sharin ya

Karai Mungdan hte seng ai kabu gara shiga hpe hkaw tsun ai sha n-ga, Yesu gaw tatut re ai lam ni hpe mung sharin ya wa ai. Mying gumhkawng ai Bum Ntsa Na Mungga kaw na sharin la lu ai lam nkau mi hpe hkaja yu ga. Mahte 6:14, 34 hte 7:12 hpe hti nna, ndai ga san ni hpe bawngban u:

Dai Chyum daw ni hta Yesu gaw tatut re ai gara hpaji jaw ga ni hpe tsun da ai kun?
Dai hpaji jaw ga ni gaw dai ni aten du hkra tatut naw re ai ngu nang shadu ai kun?

6. Yesu madun wa ai mauhpa amu ni

Mauhpa lam law law hpe Yesu galaw lu na matu, Yehowa atsam jaw wa ai. Ga shadawn langai hpe chye lu na matu, Marku 5:25-34 hpe hti u (sh) VIDEO hpe hpaw. Dai hpang ndai ga san ni hpe bawngban u.

VIDEO: Machyi Ai Num Langai Shamai Shatsai Hkrum (5:10)

Ndai video hta, machyi ai num gaw hpa hpe kam ai kun?
Dai mauhpa amu kaw na nang hpa hpe ra sharawng ai kun?

Yawhan 5:36 hpe hti nna, ndai ga san hpe bawngban u:

Yesu a mauhpa amu ni gaw hpa hpe sakse madun wa ai kun? (sh) shi hte seng nna hpa hpe “sakse hkam ya nga” ai kun?

Nang Chye Ai Kun?

Yesu a labau hpe Mahte, Marku, Luka, Yawhan Laika mali hpe hti ai kaw na law malawng chye lu ai. Dai Laika mali hpe ka ai marai langai hpra gaw, Yesu a lam hte seng nna n bung ai hku ahkri ahkrai ka ma ai. Dai lam ni gaw, Yesu a prat hte seng nna hkum tsup hkra chye lu na matu karum ya ai.

Mahte

gaw shawng nnan na Laika hpe ka wa ai. Yesu a sharin achyin ai lam ni hpe ahkyak shatai tsun da ai. Laksan hku nna, Karai A Mungdan hte seng nna Yesu sharin ya ai lam ni re.
Marku

ka wa ai gaw Laika mali kaw na kadun dik htum re. Dai hta myit kahpra hpa mabyin law law lawm ai.
Luka

gaw, Yesu a matu akyu hpyi ai gaw kade daram ahkyak ai lam hte numsha ni hpe Yesu gara hku kanawn mazum ai ngu ai lam ni hpe laksan hku nna ka wa ai.
Yawhan

chyawm gaw, Yesu gaw shi a hku hkau ai manang ni hte kaga ni hpe tsun shaga ai lam law law hpe ka shalawm ai hku nna, Yesu a atsam ningja ni hpe tsun dan wa ai.