TƆM KƖKPƐLƖKƖTƲ 16
Yesu kaawɛ tɛtʋ yɔɔ lɛ ɛbɛ ɛlaba?
Ɛyaa sakɩyɛ maɣzɩɣ se Yesu kɛ pɩɣa cɩɩɩ ŋga kɛfɛyɩnɩ ɖoŋ nɩɩyɩ yɔ, nayʋ lɔŋsɩnɖʋ nɔɔyʋ yaa ɛyʋ weyi eɖiɣni sɩbʋ yɔ. Ɛlɛ ye ɖɩtazɩ wezuu ŋgʋ ɛɛcaɣ tɛtʋ yɔɔ yɔ kɩ-taa yɔ, ɛbɛ ɖɩpɩzɩɣ nɛ ɖɩtasɩ kpɛlɩkʋʋ? Tɔm kɩkpɛlɩkɩtʋ tʋnɛ tɩ-taa, ɖɩkaɣ yɔɔdʋʋ tʋma sɔsɔna wena Yesu kaalaba yɔ a-taa naayɛ tɔm nɛ ɖɩna ɛzɩma pitukuuni-ŋ yɔ.
1. Tʋma wena Yesu laba yɔ a-taa lɛ nɖɩ kpaɖaa?
Yesu tʋma taa lɛ, nɖɩ ɖɩkpaɖaa yɔ, nɖɩ lɛ ‘Ɛsɔ Kewiyaɣ tɔm kɩbandʋ susuu.’ (Kalɩ Luka 4:43.) Tɔm kɩbandʋ ndʋ eesusaa yɔ, ndʋ lɛ se Ɛsɔ kaɣ sɩʋ Kewiyaɣ nakɛyɛ, ŋga kakaɣ yebu nɛ ɛyaa kʋñɔmɩŋ kpeekpe sɩɩ tɩnaɣ yɔ. a Yesu susi tɔm kɩbandʋ ndʋ nɛ kpekpeka pɩnzɩ naadozo nɛ hɔɔlʋʋ.—Maatiyee 9:35.
2. Lɩmaɣzɩyɛ nɖɩ yɔɔ Yesu kaalabɩ piti lakasɩ?
‘Maamaaci lakasɩ nɛ piti lakasɩ nɛ yʋsasɩ nzɩ Ɛsɔ tɩŋnɩ Yesu yɔɔ nɛ ɛla yɔ,’ Bibl yɔɔdɩ sɩ-taa sakɩyɛ tɔm. (Tʋma Labʋ 2:22) Yesu labɩnɩ Ɛsɔ ɖoŋ tʋmɩyɛ nɛ ɛpɩzɩ nɛ ɛsɩnzɩ helim, ɛcalɩ ɛyaa kudokiŋ sakɩyɛ, ɛwaa kʋdɔndɩnaa nɛ halɩ efezi sɩɖaa. (Maatiyee 8:23-27; 14:15-21; Maarɩkɩ 6:56; Luka 7:11-17) Yesu piti lakasɩ wɩlɩ kpayɩ kpayɩ se Ɛsɔ tiyini-i. Sɩwɩlaa ɖɔɖɔ se Yehowa wɛnɩ ɖoŋ se eyele nɛ ɛyaa kʋñɔmɩŋ kpeekpe sɩɩ tɩnaɣ.
3. Ɛzɩma Yesu kaacaɣ wezuu yɔ, ɛbɛ pɩkpɛlɩkɩɣ-ɖʋ?
Yesu ñam Yehowa wɛtʋ tɩŋa taa. (Kalɩ Yohanɛɛsɩ 8:29.) Paa pakaɖaɣnɩ-ɩ yɔ, ɛñam ɛ-Caa pɩkɔɔ nɛ pɩtalɩ ɛ-sɩm wiye. Ɛwɩlaa se paa ɛyaa ɩwɛ kala taa yɔ, papɩzɩɣ nɛ pɛsɛɛ Ɛsɔ. Ye mbʋ, Yesu ha-ɖʋ ‘kɩɖaʋ se ɖɩtɩŋ ɛ-nɩŋgbanzɩ taa ɖeyi ɖeyi.’—1 Pɩyɛɛrɩ 2:21.
TAZƖ NƐ PILIMI
Tazɩ nɛ ŋna ɛzɩma Yesu susi tɔm kɩbandʋ nɛ ɛla piti lakasɩ yɔ.
4. Yesu susi tɔm kɩbandʋ
Yesu ɖɔm kilomɛtanaa sakɩyɛ habɛɛ yɔɔ mʋzʋʋ taa nɛ esusi ɛyaa tɔm kɩbandʋ. Ɩkalɩ Luka 8:1, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛyaa mba powokaɣ nɛ pekpeɣliɣ nɛ pewelisiɣni Yesu yɔ, pe-ɖeke esusaɣ tɔm na?
-
Pana wena Yesu kaañaɣaa se pɩsa nɛ ɛkatɩ ɛyaa?
Ɛsɔ kaayɔɔdaa se Mesiya kaɣ susuu tɔm kɩbandʋ. Ɩkalɩ Izaayii 61:1, 2; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma tɩyɛ Yesu yeba nɛ natʋ tɔm ndʋ tɩla?
-
Ŋmaɣzɩɣ se pɩpɔzʋʋ se ɛyaa iwelisi tɔm kɩbandʋ ndʋ sɔnɔ?
5. Yesu wɩlɩ toovenim tɔm kɩcɛyɩtʋ
Yesu kaasusi Kewiyaɣ tɔm kɩbandʋ nɛ ɛtasɩ ɛyaa lɔŋ kɩbaŋ ɖɔɖɔ; nɛ lɔŋ ɛnɩ ɩwazɩɣ siŋŋ. Iyele nɛ ɖɩtazɩ lɔŋ weyi ɩwɛ Pʋʋ yɔɔ tɔm yɔɔdʋʋ taa yɔ ɩ-taa nɩɩyɩ taa. Ɩkalɩ Maatiyee 6:14, 34 nɛ 7:12, nɛ pʋwayɩ lɛ ɩtazɩ tɔm tʋnɛ tɩ-taa:
-
Lɔŋ kɩbaŋ weyi Yesu tasɩ masɩ sɩnɛ sɩ-taa?
-
Ŋmaɣzɩɣ se lɔŋ ɛnɩ ɩpɩzɩɣ nɛ ɩwazɩ ɛyaa sɔnɔ?
6. Yesu kaalabɩ piti lakasɩ
Yehowa ha Yesu ɖoŋ nɛ ɛpɩzɩ nɛ ɛla piti lakasɩ sakɩyɛ. Ɩkalɩ Maarɩkɩ 5:25-34 nɛ ɩna kɩɖaʋ nakʋyʋ yaa ɩcɔnɩ VIDEO. Pʋwayɩ lɛ ɩtazɩ tɔm tʋnɛ tɩ-taa.
-
Video taa halʋ kʋdɔndʋ taa kaatɛmnɩ we?
-
Ɛbɛ tukuni-ŋ piti lakasɩ nzɩ sɩ-taa?
Ɩkalɩ Yohanɛɛsɩ 5:36, nɛ pʋwayɩ lɛ ɩtazɩ tɔm tʋnɛ tɩ-taa:
-
Yesu piti lakasɩ ‘lɩzɩɣ aseɣɖe’ nɖɩ?
Ŋŋsɩm-tʋ?
Mbʋ ɖɩsɩm Yesu yɔɔ yɔ, pɩ-taa sakɩyɛ wɛ Evaŋgilimwaa taa: Maatiyee, Maarɩkɩ, Luka nɛ Yohanɛɛsɩ. Paa Evaŋgilim mayʋ weyi lɛ, ɛyɔɔdɩ Yesu wezuu caɣʋ hɔɔlʋʋ nakʋyʋ tɔm. Nɛ tɔm ndʋ payɩ pɔyɔɔdaa yɔ, pɛkpɛndɩ-tʋ yɔ, pɩsɩɣnɩ-ɖʋ se ɖɩtɩlɩ ɛzɩma Yesu kaacaɣ wezuu yɔ.
-
MAATIYEE
calɩnɩ maʋ ɛ-tɛ evaŋgilim takayaɣ. Ɛñɩɣ niye Yesu wɩlɩtʋ yɔɔ, kɔzɩ kɔzɩ tɔm ndʋ ɛwɩlɩ Ɛsɔ Kewiyaɣ yɔɔ yɔ tɩ-yɔɔ.
-
MAARƖKƖ
manɩ evaŋgilim takayaɣ ŋga kakɩlɩ ññɩɩ yɔ. Ɛyɔɔdɩ mbʋ mbʋ pɩɩlaba nɛ pɩwɛ piti yɔ pɩ-taa sakɩyɛ tɔm.
-
LUKA
ñɩɣ niye ɛzɩma adɩma tɔm kaacɛyɩ Yesu ɛsɩndaa nɛ ɛzɩma ɛlakaɣ halaa kɩbandʋ yɔ pɩ-yɔɔ.
-
YOHANƐƐSƖ
yɔɔdɩ kɛdɛsɩ nzɩ Yesu nɛ ɛ-taabalaa nɛ ɛyaa lalaa palaba yɔ sɩ-tɔm. Nɛ pɩsɩɣnɩ-ɖʋ se ɖɩtɩlɩ wɛtʋ ndʋ Yesu kaawɛna yɔ.
NABƐYƐ YƆƆDƲƲ SE: «Yesu taakɛ Mesiya, ɛlɛ ɛɛkɛ ɛyʋ kɩbanʋ nɔɔyʋ yem.»
-
Suwe ñamaɣzɩɣ?
TOBI LƐ
Yesu kaasusi Ɛsɔ Kewiyaɣ tɔm, ɛla piti lakasɩ nɛ ɛña Yehowa wɛtʋ tɩŋa taa.
Tɔm taa tazʋʋ
-
Yesu kaawɛ tɛtʋ yɔɔ nɛ ɛla tʋma wena yɔ, a-taa lɛ nɖɩ kpaɖaa?
-
Ɛbɛ Yesu piti lakasɩ wɩlɩɣ?
-
Lɔŋ kɩbaŋ weyi Yesu kaatasɩ ɛyaa?
WONDU LƐƐTƲ
Ɛbɛ tɔm Yesu kaakɩlɩ yɔɔdʋʋ?
«Ɛsɔ Kewiyaɣ—Mbʋ pʋyɔɔ kɔ-tɔm cɛyɩ Yesu ɛsɩndaa yɔ» (Feŋuu Tilimiye, 1er octobre, 2014)
Kalɩ nɛ ŋna mbʋ pʋyɔɔ ɖɩpɩzɩɣ nɛ ɖitisi se Yesu kaalabɩ piti lakasɩ toovenim yɔ.
«Les miracles de Jésus —que vous enseignent-ils?» (La Tour de Garde, 15 juillet, 2004)
Ɛzɩma Yesu laɣaɣ kɩlaŋ nɛ ɛsɩɣnɩ lalaa yɔ, pitukuni abalʋ nɔɔyʋ pɩdɩɩfɛyɩ.
«Je ne vivais que pour moi» (La Tour de Garde, 1er octobre, 2014)
Kalɩ nɛ ŋna tʋma sɔsɔna wena Yesu kaalaba yɔ. Pɔyɔɔdɩ a-tɔm nɛ atɩŋ ɖama wayɩ ɖeyi ɖeyi ɛzɩ ɛɛlabʋ-yɛ yɔ.
a Tɔm kɩkpɛlɩkɩtʋ 31-33 kaɣ tazʋʋ Ɛsɔ Kewiyaɣ tɔm taa nɛ pɩkpaɖɩ.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
