LISON 16

Kuzê ki Jizus faze kantu el staba na Téra?

TOKA

Óras ki txeu algen ta pensa na Jizus es ta imajina-l sima un bebé, un proféta ô un algen ki sta kuazi ta móre. Má nu pode prende más sobri el si nu djobe kuzê ki el faze kantu el staba na Téra. Na kel lison li, nu sta ben odja alguns di kes kuza más inportanti ki Jizus faze i modi ki kel-li pode djuda-u.

1. Kal ki éra trabadju más inportanti di Jizus?

Trabadju más inportanti di Jizus éra ‘pâpia di notísia sábi di Reinu di Deus’. (Lé Lúkas 4:43, BPK.) El prega sobri notísia sábi di un reinu, ô govérnu di Deus, ki ta ben rezolve tudu nos prubléma. a Duránti três anu i meiu, Jizus sforsa txeu pa pâpia ku pesoas sobri kel mensaji sábi li. — Mateus 9:35.

2. Pamodi ki Jizus faze milagris?

Bíblia ta pâpia di txeu milagri ‘ku kuzas grandi i sinal ki Deus faze através di Jizus’. (Atus 2:22, BPK) Deus da Jizus puder pa kalma un tenporal fórti, pa da un monti algen kumida, pa kura duenti i ti pa resusita mortus. (Mateus 8:23-27; 14:15-21; Marcos 6:56; Lucas 7:11-17) Kes milagri ki Jizus faze prova klaru ma é Deus ki manda-l. Tanbê es mostra ma Jeová ten puder di rezolve tudu nos prubléma.

3. Kuzê ki nu pode prende ku manera ki Jizus vive?

Jizus obi ku Jeová na tudu situason. (Lé João 8:29.) Sikrê ku opozison, Jizus faze tudu kel ki se Pai manda-l ti kantu el móre. El prova ma nu pode sirbi Deus sikrê na situasons difísil. Asi Jizus dexa un izénplu ‘pa nu sigi se pasu di manera fiel.’ — 1 Pedro 2:21.

SABE MÁS

Odja modi ki Jizus pâpia ku pesoas sobri notísias sábi i el faze milagris.

4. Jizus pâpia sobri notísias sábi

Jizus anda un monti kilómetru, na kaminhu téra, ta pâpia di notísias sábi ku tudu algen ki el ta podeba. Lé Lucas 8:1, i dipôs pâpia sobri kes pergunta li:

Jizus ta pregaba sô pa kes algen ki ta baba na el?
Ki sforsu Jizus faze pa atxa pesoas?

Deus dja flaba ma Misías ta pregaba notísias sábi. Lé Isaías 61:1, 2, i dipôs pâpia sobri kes pergunta li:

Modi ki Jizus kunpri kel profesia li?
Bu ta atxa ma pesoas oji meste obi kes notísia sábi li?

5. Jizus inxina lisons ki ten txeu valor

Jizus prega notísias sábi di Reinu di Deus, i tanbê el inxina lisons ki nu pode uza na nos vida. Odja alguns izénplu ki nu ta atxa na kel diskursu famozu ki el faze na monti. Lé Mateus 6:14, 34 i 7:12, i dipôs pâpia sobri kes pergunta li:

Ki bons konsedju Jizus da na kes versíklu li?
Bu ta atxa ma kes konsedju li ta djuda-nu oji?

6. Jizus faze milagris

Jeová da Jizus puder pa faze txeu milagri. Pa odja un di kes milagri, lé Marcos 5:25-34 ô odja VÍDIU. Dipôs pâpia sobri kes pergunta li:

VÍDIU: Jizus kura un mudjer ki staba duenti (5:10)

Na vídiu, na kuzê ki kel mudjer ki staba duenti ta kriditaba?
Kuzê ki más bu gosta na kel milagri?

Lé João 5:36, i dipôs pâpia sobri kel pergunta li:

Modi ki kes milagri ki Jizus faze ‘da tistimunhu’ ô kuzê ki es prova sobri el?

Bu sabia?

Txeu kuza ki nu sabe sobri Jizus sta na kes kuatu livru di Bíblia ki ta txomadu Ivanjélhus, ki é Mateus, Marcos, Lucas i João. Kada un di kes algen ki skrebe Ivanjélhu pâpia di kuzas diferenti sobri Jizus. Óras ki nu ta lé tudu kes kuatu livru, nu ta konsigi prende txeu kuza sobri vida di Jizus.

MATEUS

É kel primeru Ivanjélhu ki skrebedu. El ta pâpia di txeu kuza ki Jizus inxina, prinsipalmenti kuzas ki el inxina sobri Reinu di Deus.
MARCOS

É kel Ivanjélhu más pikinoti i el sta xeiu di stória interesanti sobri vida di Jizus.
LUCAS

El ta splika pamodi ki orason éra inportanti pa Jizus i modi ki el ta trataba mudjeris.
JOÃO

Na kel Ivanjélhu li nu ta atxa txeu kuza ki Jizus pâpia ku se amigus i otus algen. Kel-li ta inxina-nu ki tipu di algen ki Jizus éra.