DILONGI 16
Mambu Yina Yezu Salaka na Ntoto?
Bantu mingi ke tadilaka Yezu bonso bebe mosi ya me konda lutaninu, bonso profete mosi ya mayele to bonso muntu mosi ya kufwa. Kansi, kana beto ke longuka mambu mingi yina Yezu salaka awa na ntoto, beto ta zaba mambu mingi sambu na yandi. Na dilongi yai, beto ta longuka mwa mambu ya kuluta mfunu yina Yezu salaka mpi mutindu yo lenda sadisa nge.
1. Inki vandaka kisalu ya kuluta mfunu sambu na Yezu?
Kisalu ya kuluta mfunu ya Yezu vandaka ‘kuzabisa . . . nsangu ya mbote ya Kimfumu ya Nzambi.’ (Tanga Luka 4:43.) Yezu vandaka kulonga nsangu yai ya mbote: Nzambi ta tula kimfumu to guvernema mosi yina ta manisa bampasi yonso ya bantu. a Yezu longaka ti kikesa yonso nsangu yai ya mbote bamvula tatu ti ndambu.—Matayo 9:35.
2. Mambu ya kuyituka yina Yezu vandaka kusala monisaka nki?
Biblia ke tubilaka ‘bidimbu ya nkumbwa, mambu ya kuyituka, mpi bidimbu mingi yina Nzambi salaka na nzila ya Yezu.’ (Bisalu 2:22) Nzambi pesaka Yezu ngolo ya kulembika nzadi-mungwa mpi mupepe ya ngolo, ya kudisa bantu mingi, ya kubelula bamaladi mpi nkutu ya kuvutula bantu ya kufwa na luzingu. (Matayo 8:23-27; 14:15-21; Marko 6:56; Luka 7:11-17) Mambu ya kuyituka yina Yezu vandaka kusala monisaka pwelele nde Nzambi muntu tindaka yandi. Diaka, yo monisaka nde Yehowa kele ti ngolo ya kumanisa bampasi na beto yonso.
3. Mutindu Yezu vandaka kuzinga ke longa beto nki?
Yezu vandaka kulemfukila Yehowa na mambu yonso. (Tanga Yoane 8:29.) Ata ntangu bantu vandaka kutelemina Yezu, yandi salaka tii na lufwa mambu yonso yina Tata na yandi lombaka yandi na kusala. Yandi monisaka nde bantu ta kuka kusadila Nzambi ata ntangu bo ke kutana ti bampasi. Yezu me songaka beto nzila sambu beto “landa [mbandu] na yandi mbote-mbote.”—1 Piere 2:21.
LONGUKA MAMBU MINGI
Beto tala mutindu Yezu vandaka kulonga bantu nsangu ya mbote mpi kusala mambu ya kuyituka.
4. Yezu longaka nsangu ya mbote
Yezu vandaka kutambula bakilometre mingi na banzila ya pusiere, sambu na kuzabisa nsangu ya mbote na bantu mingi. Beno tanga Luka 8:1 mpi na nima beno pesa mvutu na bangiufula yai:
-
Keti Yezu vandaka kulonga nsangu ya mbote kaka na bantu yina vandaka kukwisa kuwidikila yandi?
-
Inki bikesa Yezu vandaka kusala sambu na kuzwa bantu?
Nzambi tubaka nde Mesia ta longa nsangu ya mbote. Beno tanga Yezaya 61:1, 2 mpi na nima beno pesa mvutu na bangiufula yai:
-
Inki mutindu Yezu lungisaka mambu yai ya Nzambi tubaka?
-
Nge ke ndima nde bubu yai mpi bantu kele na mfunu ya kuwa nsangu yai ya mbote?
5. Yezu longaka malongi ya mfunu
Yezu vandaka kulonga nsangu ya mbote ya Kimfumu ya Nzambi mpi malongi ya nkaka ya mfunu. Beto tala mwa bambandu yina yandi pesaka na Disolo na yandi na Zulu ya Ngumba, disolo mosi ya me zabanaka mingi. Beno tanga Matayo 6:14, 34 mpi 7:12. Na nima beno pesa mvutu na bangiufula yai:
-
Inki bandongisila ya mfunu Yezu pesaka na baverse yai?
-
Nge ke ndima nde bandongisila yai kele mpi mfunu tii bubu yai?
6. Yezu salaka mambu ya kuyituka
Yehowa pesaka Yezu ngolo ya kusala mambu mingi ya kuyituka. Sambu na kumona mbandu mosi, beno tanga Marko 5:25-34 to beno tala VIDEO. Na nima beno pesa mvutu na bangiufula ya ke landa.
-
Mutindu video me monisa yo, nkento yina ya kubela vandaka kundima nki?
-
Inki ke yitukisa nge na mambu yai ya kuyituka ya Yezu salaka?
Beno tanga Yoane 5:36 mpi na nima beno pesa mvutu na ngiufula yai:
-
Mambu ya kuyituka yina Yezu salaka monisaka nki to yo ‘taka nki kimbangi’ sambu na yandi?
Keti nge zabaka yo?
Mikanda iya ya Biblia ya bo ke bingaka Baevanzile disongidila, Matayo, Marko, Luka mpi Yoane, ke sadisaka beto na kuzaba mambu mingi sambu na Yezu. Konso muntu ya sonikaka Evanzile tubilaka mpi mambu ya nkaka sambu na Yezu yina Baevanzile ya nkaka ke tubilaka ve. Mambu ya kele na mikanda yai yonso ke sadisaka beto na kubakisa mbote luzingu ya Yezu.
-
MATAYO
yandi vandaka muntu ya ntete yina bandaka kusonika Evanzile. Evanzile ya Matayo ke tubila malongi ya Yezu, mingi-mingi mambu yina Yezu vandaka kulonga sambu na Kimfumu ya Nzambi.
-
MARKO
yandi sonikaka Evanzile ya kuluta nkufi. Yo kele ti masolo mingi ya kitoko.
-
LUKA
yandi ke tubila mingi kisambu mpi mutindu Yezu vandaka kusadila bankento mambu.
-
YOANE
yandi ke tubila mingi mambu yina Yezu vandaka kusolula ti banduku na yandi ya ngolo mpi bantu ya nkaka sambu na kutubila bikalulu mingi ya Yezu.
BANTU YA NKAKA KE TUBAKA NDE: “Yezu vandaka kaka muntu ya mbote, kansi ve Mesia.”
-
Inki nge ke yindula?
NA BUNKUFI
Yezu vandaka kulonga nsangu ya mbote ya Kimfumu ya Nzambi, yandi vandaka kusala mambu ya kuyituka mpi kulemfukila Yehowa na mambu yonso.
Inki Nge Me Simba?
-
Inki vandaka kisalu ya kuluta mfunu sambu na Yezu awa na ntoto?
-
Mambu ya kuyituka yina Yezu salaka ke monisa nki?
-
Inki malongi ya mfunu Yezu longaka?
TALA MPI
Inki mambu Yezu vandaka kutubila mingi?
“Kimfumu ya Nzambi—Sambu na Nki Yo Ke Mfunu Sambu na Yezu?” (Nzozulu ya Nkengi, Oktobri 1, 2014)
Tala bikuma ya ke pusaka beto na kundima nde Yezu salaka mpenza mambu ya kuyituka.
Tala mutindu kikalulu ya Yezu ya kutudila bantu dikebi sadisaka bakala mosi na kuyambula bikalulu na yandi ya mbi.
“Mono Vandaka Kuzinga Kaka Sambu na Mono Mosi” (Nzozulu ya Nkengi, Oktobri 1, 2014)
Tala liste ya mambu ya mfunu yina Yezu salaka.
a Dilongi 31 tii na 33 ta tubila mingi Kimfumu ya Nzambi.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
