DIILONGWEESH 16

I Biny Bilongel Yeez Haakadyey ha Bulab?

PLAY

Baat bavul bataatal Yeez bu mwaan mutofw, bu muprofet a meej eecy muut ukaakaam kufw. Ki tudyok mwa kulong myand yivul yimutaatal hatukootontonon shikacil indiy a ha bulab eeny? Mu diilongweesh eedy, twiiyiiy kutal myand ya buseeb yaakady Yeez mulong ni mudyey mwa kukwambulwiish.

1. I mudimw kaay mutam waakady nend Yeez?

Mudimw mutam waakady nend Yeez waakady wa “kudiil baat bakwaabw musah mulengel a Bukaleng bwa Mawej.” (Balaay Luuk 4:43.) Waakady udiil baat musah mulengel wa neey, Mawej wiiyiiy kuteek bukaleng eecy mbul-matady wiikal mwa kuful makab moos ma baat. a Mu mivw yisat ni cituh, Yeez waakady mulong mudimw mukasakan wa kudiil baat musah wiibakaakashish.—Matewus 9:35.

2.Bwabiny Yeez waakady ulong bishim?

Bibl uleeleej neey: “kudyey [Yeez] i kuk kwaakady Mawej mulong myand yikasakan yikeekemesh ni yikwaakwaat mooy.” (Myand Yilongel Bapostol 2:22) Mawej waakady mwaakish Yeez bukash bwa kubatamij naabw ciheeh cikasakan, bwa kudiish baat binun bivul, bwa kondah babeel, ni bwa kubuush baat ku lufw. (Matewus 8:23-27; 14:15-21; Mark 6:56; Luuk 7:11-17) Bishim bya Yeez byaakady bileej neey, i Mawej waakady mumutum. Byaakady bileej cikwaabw neey, Yehow udy ni bukash bwa kuman makab moos mady naam baat.

3. I biny bituloolongel ku shikacil waakady nend Yeez?

Yeez waakady ukooyel Yehow mu myand yoos. (Balaay Jah 8:29.) Ning mwaakadyok bulwiish, Yeez waakady mushaal mulamat Taat indiy ulong myand yaakadyey mumulomb bwa kulong teng ni ku lufw. Waakady muleej neey, kudy mushind udy muut mwa kukadil Mawej mudimw ning yiy ukeng. Yeez i mwiitushiil cileejel cya “kulond mu diikas dindiy.”—1 Pyeel 2:21.

TWEEL MUBONDOK

Tal mwaakady Yeez udiil baat musah mulengel ni ulong bishim.

4. Yeez waakady udiil baat musah mulengel

Yeez waakady wend kilometel yivul mu njil a bulab wend ni kudiil baat musah mulengel. Balaay Luuk 8:1, ni isambilaay ha majooj aam:

Yeez waakady udiil teng baat baakady bamukun mat musah eeny?
I mushind kaay waakady Yeez wiikashishomw bwa kuhet baat?

Mawej uleebel kal neey, Mesih waakady mwa kudiil baat musah mulengel. Balaay Yeshaay 61:1, 2, ni isambilaay ha majooj aam:

I mushind kaay waakady Yeez mukumbaj diiy dya buprofet eedy?
Ulaalangok neey, baat ba leeloow bakaakaam kumvw musah mulengel oow eeny?

5. Yeez waakady ulongweesh teng myand ya biin-biin

Yeez waakady ulongweesh baat musah mulengel a Bukaleng bwa Mawej, ni waakady utwaal malongweesh maakady mambulwiish baat. Tal bimw bileejel bya mu mwiisamb indiy wa ha mulund. Balaay Matewus 6:14, 34 ni 7:12, ni isambilaay ha majooj aam:

I mibel kaay yilengel yidy Yeez utwaal mu verseh eey?
Ulaalangok neey, mibel eey yidy ni buseeb teng ni leeloow eeny?

6. Yeez ulongel bishim

Yehow waakishil Yeez bukash bwa kulongey bishim bivul. Tal cileejel eecy, balaay Mark 5:25-34 eecy talaay VIDEO. Ni isambilaay ha diijooj eedy.

VIDEO: Yeez Wondahil Mwaan-mukaj Waakady ni Lubeel (5:10)

Mu video oomw, i kutwiishiibw kaay kwaakady naakw mwaan-mukaj waakady ubeel oolw?
I biny bikukeekemesh bwa cishim eecy?

Balaay Jah 5:36, ni isambilaay ha diijooj eedy:

I biny bidy bishim bya Yeez “bileej” habimutaatal?

Udy mumanyik eeny?

Myand yivul yitudy bamanyik habitaatal Yeez, yidy mu mikand ya mu Bibl yibiibikanobw neey: Musah mulengel (Evangil)—Matewus, Mark, Luuk, ni Jah. Mikand yoos eey yidy ni myand yishilangan yitaatal Yeez. Myand yoos eey, yituleeleej shikacil mulengel waakadyey nend.

MATEWUS

i yiy muut a kuuhal ufundil Musah mulengel. Uleeleeb bikasakan bwa malongweesh ma Yeez, aman aa man bwa cidyey mulongweesh bwa Bukaleng bwa Mawej.
MARK

i mufund Musah mwiihih. Uleeleebomw bwa-myand yikaakashish baat.
LUUK

uleeleeb nang-nang bwa diisambil ni mwaakady Yeez ulongel baan-bakaj myand.
JAH

wiitwambambil myand yivul yileeleej neey, Yeez waakady wiisamb ni balund bindiy ba ha micim ni baat bakwaabw. Biin eeby, biitwambambulwiish bwiitut kumanyik mwaakady Yeez.