MWE LUTLUT 16
Meac Jesus El Oruh Ke Pacl Se El Oasr Fin Facluh?
Mwet pucspucs nuhnkuh kacl Jesus oacna sie ahwowo suc oan in nien mongo luhn kosro, mwet pahluh lahlmwetmwet se, kuh eltahl ac nuhnkuh ke inkacnek upac el misac. Yac kuht kuh in etwacl na pwacye kuht fin lutlutkihn moul lal fin facluh? Ke mwe lutlut se inge, kuht ac fah sramsramkihn kuhtuh sin ma yohk srihpac emeet ma Jesus el oruh ac ma inge kuh in kahsre kom fuhkah.
1. Meac orekma yohk srihpac emeet lal Jesus?
Orekma yohk srihpac emeet lal Jesus pa in fahkwack “pweng wo ke Tohkohsrahi luhn God.” (Riti Luke 4:43.) El fahkwack lah God el ac oakiyac sie tohkohsrahi kuh government, ma ac fah ahkwoyelah ma upac nuhkewa luhn mwet uh. a Jesus el kwacfeacng yohk in fahkwack pweng wo nuh sin mwet uh ke lusen yac tolu tahfuh.—Matthew 9:35.
2. Efuh kuh Jesus el oraclah mwenmwen uh?
Bible uh fahk lah ke inkacnek lal Jesus, God el ahkkahlwemye “kuh luhlahp . . . mwenmwen ac orekma usrnguck.” (Orekma 2:22) Ke srihpen kuh luhn God, Jesus el ahkmihsyelah pahkah, kihteyac tausin mwet, unwelah mwet mas, ac ahkmoulyeack mwet misac. (Matthew 8:23-27; 14:15-21; Mark 6:56; Luke 7:11-17) Mwenmwen lal Jesus uh ahkkahlwemye lah suhpweyucklac el sin God, ac oasr kuh luhn Jeova in ahkwacngihnyelah ma upac nuhkewa lasr.
3. Meac kuht kuh in lotwelah ke ohiyen moul lal Jesus?
Jesus el ahkos Jeova pacl nuhkewa. (Riti John 8:29.) Finne oasr mwet lainuhl, el oruh ma nuhkewa ma Pahpah tuhmwacl uh siyuck sel elan oruh, ac el oaru nwe ke na el misac. El ahkpwacyeye lah mwet uh kuh in kuhlwacnsuhpuh God finne ye ma upac yohk. Ahok, Jesus el oakiyac ‘sie mwe srihkasrak nuh sesr tuh kuht fah fahsr in falkacl.’—1 Peter 2:21.
AHKYOHKYE LUTLUT LOM
Lutlut ahkwoyac lah Jesus el fahkwack pweng wo fuhkah ac oraclah mwenmwen uh.
4. Jesus el fahkwack pweng wo
Jesus el fuhfahsryucsr ke inkacnek uh ke lusen mael loeloes, in fahkwack pweng wo nuh sin mwet pucspucs. Riti Luke 8:1, ac tohkohyang sramsramkihn kihsen siyuck inge:
-
Yac Jesus el fahkwack muhkwena nuh sin mwet suc tuhkuh nuh yohrohl in lohngohl?
-
Kwacfeacng fuhkah Jesus el oraclah in konwacack mwet uh?
God el palye lah Messiah el ac fah sulkackihn pweng wo. Riti Isaiah 61:1, 2, ac tohkohyang sramsramkihn kihsen siyuck inge:
-
Jesus el ahkpwacyeye fuhkah kahs pahluh inge?
-
Kom nuhnkuh muh mwet ke pacl inge enenuh in lohng pweng wo inge?
5. Jesus el luti mwe lutlut yohk srihpac
Sahyen in fahkwack pweng wo ke Tohkohsrahi luhn God, Jesus el luti pac mwe lutlut ma kuh in orekmakihnyuck nuhke moul. Liye kuhtuh sin ma inge ke Mwe Sramsram lal Finohl. Riti Matthew 6:14, 34 ac 7:12, ac tohkohyang sramsramkihn kihsen siyuck inge:
-
Kahs in kahsruh fuhkah lal Jesus ke fuhs inge ma kuht kuh in orekmakihn nuhke moul?
-
Kom nuhnkuh tuh kahs in kahsruh inge kuh in kahsruh mwet uh ke pacl inge?
6. Jesus el oraclah mwenmwen uh
Jeova el sang kuh nuh sel Jesus in oraclah mwenmwen pucspucs. In liye sie mwe srihkasrak nuh kac, riti Mark 5:25-34 kuh liye VIDEO se. Tohkohyang, sramsramkihn kihsen siyuck ekahsr ten inge.
-
Meac muhtwacn mas se ke video se inge luhlahlfongi?
-
Meac kom luhngse ke mwenmwen se inge?
Riti John 5:36, ac tohkohyang sramsramkihn kihsen siyuck se inge:
-
Meac mwenmwen lal Jesus inge “fahkwack” kacl?
Yac kom etuh?
Inkaiyen ma kuht etuh kacl Jesus kuh in liyeyuck ke puk ahkosr in Bible pahngpahng Gospels—Matthew, Mark, Luke, ac John. Kais sie mwet sihm luhn puk inge ahkkahlwemye kuhtuh ma tiac oacna sie kacl Jesus. Kuht fin riti puk ahkosr inge nuhkewa, kuht kuh in liye ma sikyak ke moul lal.
-
MATTHEW
el pa mwet sihm se meet luhn Gospel. Puhs ma el suhmuhslah ke mwe luti lal Jesus, yohkna ke Tohkohsrahi luhn God.
-
MARK
el suhmuhslah Gospel se ma fototo emeet. El suhmuhslah ke ma wowo sikyak ke moul lal Jesus.
-
LUKE
el suhmuhslah lah puhruhe uh yohk srihpac fuhkah nuh sel Jesus ac ohiyac fuhkah Jesus el ahkkahlwemye nuh sin muhtwacn.
-
JOHN
el ahkkahlwemye nuh sesr ma pucspucs Jesus el sramsramkihn nuh sin mwet kawuck fototo lal ac mwet sahyac. Ma inge kahsre kuht in etwaclah lah ohiyac fuhkah oasr yohrohl Jesus.
KUHTUH MWET UH FAHK: “Jesus pa God Fuhlwactlacna.”
-
Meac kom nuhnkuh?
MA KUHT LOTWELAH
Jesus el fahkwack ke Tohkohsrahi luhn God, oraclah mwenmwen, ac ahkos Jeova in ohiyac nuhkewa.
Kalweni
-
Orekma fuhkah yohk srihpac na pwacye nuh sel Jesus ke el muhta fin facluh?
-
Mwenmwen ma Jesus el oraclah uh ahkpwacyeye meac?
-
Mwe lutlut yohk srihpac nuhke moul fuhkah ma Jesus el luti?
LIYE PAC MA INGE
Ma yohk srihpac fuhkah Jesus el fahkwack nuh sin mwet pacl nuhkewa?
“God’s Kingdom—What It Means to Jesus” (The Watchtower, October 1, 2014)
Liye lah efuh kuht kuh in luhlahlfongi lah mwenmwen lal Jesus inge sikyak na pwacye.
“The Miracles of Jesus—What Can You Learn?” (The Watchtower, July 15, 2004)
Riti lah fuhkah sie mwet el ekuhllah moul lal ke el lotwelah lah Jesus el kihsackuhnlah moul lal sifacna.
“My Life Was All About Me” (The Watchtower, October 1, 2014)
Liye ma yohk srihpac Jesus el oruh ke orekma in luti lal fal nuhke tahklac la an.
“Main Events of Jesus’ Earthly Life” (New World Translation of the Holy Scriptures, Appendix A7)
a Ke mwe lutlut 31-33 ac fah ahkuhtweyac ke Tohkohsrahi luhn God.
