LUFUNJISHO 16
Ñanyi Bintu Byaubile Yesu byo Ajinga Pano pa Ntanda?
Bantu bavula bamuyuka Yesu. Pano bino, bantu bamo bayukakotu bintu byamwekejile Yesu byo ajinga lukeke. Kabiji bakwabo nabo bamuyukatu’mba ngauzhi wa maana ne bakwabo bayukatu’mba Yesu wafwile. Nanchi abya kuba twafunda bintu byavula pa bwikalo bwa kwa Yesu byo ajinga pano pa ntanda nenyi? Mu uno mutwe, tusakwisamba pa bintu bimo byanema bingi byaubile Yesu ne byo byafwainwa kwimukwasha.
1. Ñanyi mwingilo mwine waingijile Yesu?
Mwingilo mwine waishijile Yesu pano pa ntanda wajinga wa “kusapwila mambo awama a Bufumu bwa Lesa.” (Tangai Luka 4:43.) Wasapwijilenga kuba’mba Lesa ukaleta bufumu nangwa’mba kafulumende ukapwisha makatazho onse abena kupitamo bantu lelo jino. a Pa myaka isatu ne kichika, Yesu waingijile bingi na ngovu kusapwila bantu mambo awama.—Mateo 9:35.
2. Ñanyi kintu kine kyalengejile Yesu kuba bya kukumya?
Baibolo waamba pa “mingilo ya bulume ne ya kukumya ne biyukilo Lesa byo aubile kupichila mwi [Yesu].” (Byubilo 2:22) Lesa wapeele Yesu bulume bwa kukanya luvula, bwa kujiisha bantu bavula, bwa kubuka bakolwa ne kusangula bantu. (Mateo 8:23-27; 14:15-21; Mako 6:56; Luka 7:11-17) Bya kukumya byaubile Yesu, byamwesheshe’mba Lesa ye wamutumine. Abye bya kukumya byamwesheshe ne kuba’mba Yehoba uji na bulume bwa kupwisha makatazho onse o tubena kupitamo.
3. Twafwainwa kufunjilako ka ku byaubanga Yesu mu bwikalo bwanji?
Yesu wakookelanga Yehoba mu bintu byonsetu. (Tangai Yoano 8:29.) Nangwa kya kuba bantu bakainyenga Yesu kwingila mingilo ya shanji, aye watwajijile kwiingila mu bukishinka kufikatu ne byo afwile. Byaubile Yesu byamwesheshe’mba bantu bafwainwa kwingijila Lesa nangwa kya kuba babena kupita mu makatazho. Onkao mambo, Yesu witushijile ‘mwa kulondela kuba’mba tulondelenga bulongo mu ngayo yanji.’—1 Petelo 2:21.
FUNJILAIPO BIKWABO
Monai Yesu byo asapwilanga bantu mambo awama ne byo aubilenga bya kukumya.
4. Yesu wasapwilanga mambo awama
Yesu waendanga miseke yalepa bingi mu mikwakwa ya lufukuchi kabiji wasapwijilenga mambo awama ku bantu bavula bingi. Tangai Luka 8:1, ne kwisamba ano mepuzho:
-
Nanchi Yesu wasapwilangatu bantu baiyanga ko aji nyi?
-
Yesu waubanga byepi pa kuba’mba ataane bantu?
Lesa waambijile jimo kuba’mba Mesiasa ukasapwila bantu mambo awama. Tangai Isaya 61:1, 2, ne kwisamba ano mepuzho:
-
Yesu wafikizhe byepi buno bungauzhi?
-
Mwalanguluka’mba bantu lelo jino nabo bakebewa kumvwa mambo awama nyi?
5. Yesu wafunjishe bukine bwanema bingi
Yesu kechi wasapwijilengatu mambo awama aamba pa Bufumu bwa Lesa ne, bino wafunjishenga ne bintu byafwainwa kukwasha bantu mu bwikalo bwabo. Monai bintu bimo bicheche biji mu Jashi ja pa Mutumba jo aambile. Tangai Mateo 6:14, 34 ne 7:12, ne kwisamba ano mepuzho:
-
Ñanyi bishinka byanema Yesu byo aambilepo mu bino byepelo?
-
Nanchi mwaswa kuba’mba abye byambo byafwainwa kukwasha bantu ne lelo jino nyi?
6. Yesu waubile bya kukumya
Yehoba wapeele Yesu bulume bwa kuba bya kukumya. Pa kuba’mba mushiinwe, tangai Mako 5:25-34 nangwa tambai VIDYO. Apa bino mwisambe ano mepuzho.
-
Mu vidyo ye mwatamba, ñanyi kintu kyaketekejile mwanamukazhi wakolelwe?
-
Ñanyi kintu kyo mwatemwa mu kino kya kukumya kyaubile Yesu?
Tangai Yoano 5:36, ne kwisamba buno bwipuzho:
-
Bya kukumya byaubile Yesu ‘bimwesha’ nangwa bisolola ñanyi kintu pe aye?
Bishinka bikwabo
Bintu byavula byaamba pa bwikalo bwa kwa Yesu bebinemba mu mabuku ana a mu Baibolo, ano mabuku ke Mateo, Mako, Luka ne Yoano. Abano bonse pa kunemba baambile bintu byapusana pusana byaubile Yesu. Inge twatanga ano mabuku onse ana etukwasha kuyuka bwikalo bwa kwa Yesu byo bwajinga.
-
MATEO
ye wanembele uno buku. Mu uno buku tutaanamo bintu byafunjishanga Yesu. Yesu waambile bingi kikatakata pa Bufumu bwa Lesa.
-
MAKO
ye wanembele uno buku mwipi. Mu uno buku muji bintu byanema bingi byamwekele.
-
LUKA
witubuula Yesu byo anemekele bingi kulomba kwi Lesa. Kabiji walumbulula ne Yesu byo amonanga banabakazhi.
-
YOANO
witubuula bintu byavula bingi byaambile Yesu na balunda banji ne bantutu bakwabo. Uno buku witukwasha kuyuka byajinga Yesu.
BANTU BAMO BAMBA’MBA: “Yesu ye Lesa wa bulume bonse.”
-
Nga anweba musakwambapo’mba ka?
ÑANYI BISHINKA BYO MWAFUNDA?
Yesu wasapwijile pa Bufumu bwa Lesa, waubile bya kukumya kabiji wakookelanga Yehoba mu bintu byonsetu.
Mepuzho a kupitulukamo
-
Ñanyi mwingilo mwine waingijile Yesu byo ajinga pano pa ntanda?
-
Bya kukumya byaubile Yesu bimufunjishapo ka?
-
Ñanyi bintu byanema bingi Yesu byo afunjishanga bantu?
KEBAI BISHINKA BIKWABO
Ñanyi mutwe Yesu ye aambilepo bingi ku bantu?
“Bufumu bwa Lesa kyo Bwanemena kwi Yesu” (Kyamba kya Usopa, October 1, 2014)
Tangai jino jishimikila ja mwanamulume umo wapimpwile byubilo byanji na mambo a bintu byo afunjile pe Yesu kuba’mba watele bingi bantu muchima.
“Nakebangatu Kwiubila Bintu” (Kyamba kya Usopa, October 1, 2014)
Monai ndonda ya bintu byawama byaubile Yesu mu mwingilo wanji.
a Mu lufunjisho 31-33 tukesamba byavula pa biji Bufumu bwa Lesa.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
