SUƐI LEBOLII 16

Yɛɛ Chiisu Ndoo Tosa yɛ Teleŋ O Wa o Chieeŋndo Choo Wo?

PILEI

Te wanaa bɔɔbɔɔ tuei pɛ a Chiisu okɔɔ, ma yiyaŋ a teleŋ o wa chɛlɛkpɛ wo. Mi apum yiyaŋ maa wana suaa le Mɛlɛka wo o cho ni, apum yɛ maa wana vi niŋ ndo. Baa ŋ nɔla pa miŋ pɛɛku a ndu okɔɔ miŋ sina mɛɛ yoomu ndɔɔ wa o chieeŋndo choo yɛ? O suɛi lebolle hei bɛŋgu, ŋ cho yaasiaa sɔɔŋ sɔvɛŋ Chiisu tosa woŋ ŋ tiŋ nduyɛ ma che mɛɛ ŋ mala num yɛ.

1. Yɛɛ wa yɛ wali kpeekpei Chiisu tosa wo?

Wali kpeekpei Chiisu tosa wo wa “yooŋgu kɛndɔɔ dimioo a Masale Mɛlɛkaleŋ okɔɔ” ni. (Nuawɔ Luku 4:43.) Mbo dimul waŋnda yooŋgu kɛndɔɔ maa Mɛlɛka cho Masaleŋ kila mi le huŋ soli bahawɛila waŋnda chieeya kpou. a Mbo tosa wallo hoo kalaŋ le wɔsilaŋ la yaa a tɛndaa tɛɛŋ.—Maatiu 9:35.

2. Le sabu yɛɛ Chiisu tosa yɛ kaamaalaŋ?

Baabuiyo dimi maa “mi Mɛlɛka soliŋ [Chiisu] kpeku le kaamaalaŋ a sɔɔŋ kɔndɔfilloŋ tosaa.” (Walta Kiilaa 2:22) Mi Mɛlɛka ke Chiisu kpaayaa mbo kpaa hueiye, mbo ke waŋnda o waalaŋ niŋ nyɛdiaa, mbo siŋgi wanaa wa a naalaŋ nda nduyɛ mbo miŋgi pɛŋ wanaa vi wa yoomu. (Maatiu 8:23-27; 14:15-21; Maki 6:56; Luku 7:11-17) Mi kaamaala Chiisu tosa laŋ ndaŋ la chɔm kpendekele maa Mɛlɛka vem ndu ni. Mi la chɔm vɛlɛ maa Chɛhowa nɔ kpaayaa le bahawɛila naalaŋ kpou chiiyo.

3. Yɛɛ naŋ pɛɛku yɛ a mɛɛ Chiisu ndoo bii yoomu ndɔɔ yɛ?

Mi Chiisu tuɛi Chɛhowa diom o nyɛ o nyɛ niŋ. (Nuawɔ Chɔŋ 8:29.) Mbo tosa nyɛ o nyɛ Finya ndɔ dimul ndu le tosaa. Mi che bɛɛ waŋnda wa kindiŋndo le ndu kuunaa, kɛ mbo diikuŋ ndu haaa a yoomu ndɔɔ mɛɛlulaŋ. Mbo chɔm maa waŋnda chieeya nɔla ma piɛi Mɛlɛka, o yɔŋ bɛɛ ma wa o nyɛkindilaa bɛŋgu. O hei niŋ, mi Chiisu ‘kɛsul naa tamaseliiyo le miŋ tol ndu kɔɔli.’—1 Pitɛ 2:21.

CHƆƆLU YAASIAA

Yaasiaa wɔ ma sina mɛɛ Chiisu dimul waŋnda yooŋgu kɛndɔɔ nduyɛ mbo tosa kaamaalaŋ yɛ.

4. Mi Chiisu dimul waŋnda yooŋgu kɛndɔɔ

Mi Chiisu ndoo kuɛ o tiŋnda vilɛi vilɛilaŋ o nɛila chundu laŋ choo le waŋnda yooŋgu kɛndɔɔ dimullo. Nuawɔ Luku 8:1, okoŋ mi la suukaŋ o nyunalaŋ ndaŋ choo:

Baa wanaa ndaa chuuŋgiaŋ le ndu nilaŋ yaŋɔɔ wa koni Chiisu ndoo dimul yooŋgu kɛndɔɔ ni?
Sɛmbɛ yɛɛ Chiisu ndoo duau yɛ le waŋnda saalɔŋndo?

Mi Mɛlɛka dimi maa Mɛsayanɔɔ cho waŋnda yooŋgu kɛndɔɔ dimul. Nuawɔ Aisaya 61:1, 2, okoŋ mi la suukaŋ o nyunalaŋ ndaŋ choo:

Vɛɛ Chiisu peelu yɛ huuluei hei?
A yiyaŋ pa maa waŋnda nɔ hau ma tuei yooŋgu kɛndɔɔ hoo?

5. Mi Chiisu pɛɛku waŋnda sɔɔŋ kɛndɔŋ tau

O cho ko yooŋgu kɛndɔɔ a Masale Mɛlɛkaleŋ okɔɔ le Chiisu dimul waŋnda le. Kɛ, mbo pɛɛku nda vɛlɛ sɔɔŋ mala nda o yoomoo niŋndoŋ. Tofawɔ sɔɔŋ muŋ ŋpum, ŋ o pɛɛku waŋnda o pembei choo woŋ. Nuawɔ Maatiu 6:14, 34 a 7:12, okoŋ mi la suukaŋ o nyunalaŋ ndaŋ choo:

Sila sɔvɛ kuɛɛ Chiisu yɔŋgu yɛ o bolii Baabuiye hei niŋ?
A yiyaŋ pa maa silaa hoo nɔla mbo mala naa hau?

6. Mi Chiisu tosa kaamaalaŋ

Mi Chɛhowa ke Chiisu kpaayaa le kaamaala bɔɔbɔɔ tosaa. Le tamaseliiyo chɔɔ a hei okɔɔ, nuawɔ Maki 5:25-34 ɔɔ handu VIDUEIYO. Okoŋ mi la suukaŋ o nyunalaŋ ndaŋ choo:

VIDUEIYO: Chua Wa a Naa Wo Sɔla Sioŋgɔɔ (5:10)

O vidueiyo hoo niŋ, laalaŋ yɛɛ chua wa a naa wo ndoo nɔ yɛ?
Yɛɛ hɛnaŋ yɛ num a kaamaa hoo okɔɔ?

Nuawɔ Chɔŋ 5:36, okoŋ mi la suukaŋ o nyunaa hoo choo:

Yɛɛ kaamaala Chiisu tosa laŋ la chɔm yɛ a ndu okɔɔ?

A sina pa?

Sɔɔŋ naŋ sina a Chiisu okɔɔ woŋ ŋ bɔɔbɔɔ o yaula hiɔɔlu laŋ ndaŋ niŋ ŋ fula ni, Maatiu, Maki, Luku a Chɔŋ. Mi wanaa poonyiaa laŋ nda o kɛ kɛ chɔm sɔɔŋ teŋgeŋ ndoŋ a Chiisu okɔɔ. Sɔɔŋ nda poonyiaa muŋ ndoŋ kpou mala naa le sinaa a Chiisu okɔɔ nyɛkɛndɛi.

MAATIU

Ndu cho wana tase poonyiaa a Chiisu okɔɔ wo ni. A pɛɛkula Chiisulaŋ okɔɔ o soo tau ni, taama taama sɔɔŋ o pɛɛku waŋnda a Masale Mɛlɛkaleŋ okɔɔ woŋ.
MAKI

Yau Maki wo hiou wa o biŋgi. Mbo poonyiaa tau a sɔɔŋ kɛndɛŋ Chiisu tosa woŋ vɛlɛ a kaamaala bɔɔbɔɔ okɔɔ.
LUKU

Ndu soo tau a mɛɛ piɛileŋ le wa nyɛ sɔvɛ le Chiisu yɛ ni, vɛlɛ a mɛɛ ndoo bii waŋ laanduaa yɛ.
CHƆŊ

Chɔŋ mala naa tau ni le sinaa wana Chiisu wa wo. Kanifuule, mbo duaunuŋ kona tau a balta Chiisu dɔu nda chaaŋaa nduaa kpɛɛluŋnda vɛlɛ a wanaa cheleŋnda wa.