LONGI DIA 16
Nkia Mambu Yesu Kavanga Vava Kakala ova Ntoto?
Wantu ayingi beyindulanga vo Yesu wakinu mwana nsedia, ngunz’a ngangu yovo muntu una mu mpasi za lufwa. Kansi, avo tulongokele zingu kia Yesu vava kakala ova ntoto, tuzaya mambu mayingi mu kuma kiandi. Mu longi diadi, tuvovela mambu mamfunu Yesu kavanga ye una malenda kutusadisila.
1. Nkia salu Yesu kasianga va fulu kiantete?
Yesu wasianga salu kia “samuna e nsangu zambote za Kintinu kia Nzambi” va fulu kiantete. (Tanga Luka 4:43.) E nsangu zambote Yesu kasamunanga zasonganga vo Nzambi osikidisa kintinu yovo luyalu lufokola e mpasi zawonso za wantu. a Muna mvu ntatu ye ndambu, Yesu wavanga mawonso muna samuna e nsangu zazi zambote kwa wantu.—Matai 9:35.
2. Ekuma Yesu kavangilanga masivi?
Bibila kivovanga vo Nzambi wasadila Yesu mu vanga ‘masivi ye sinsu yayingi.’ (Mavangu 2:22) Nzambi wavana Yesu o nkuma wa ningamesa e tembwa, dikila ulolo wa wantu, wuka ambevo yo fula awana bafwa. (Matai 8:23-27; 14:15-21; Maku 6:56; Luka 7:11-17) Yesu wavanga masivi mu songa vo Nzambi wantuma. Masivi mama masonga mpe vo Yave una yo nkuma wa fokola e mpasi zeto zawonso.
3. Adieyi tulenda longoka muna zingu kia Yesu?
Yesu walemvokelanga Yave muna mambu mawonso. (Tanga Yoane 8:29.) Kana nkutu muna lubangamu, Yesu wavanga mawonso mana Se diandi kantuma. I wau kavanga muna zingu kiandi kiawonso ova ntoto, kanele vo wantu ayingi bavava kunkakidila. Wasonga vo wantu balenda sadila Nzambi kana nkutu muna mpasi. Ozevo, Yesu ‘watusisila mbandu kimana twalanda ntambi zandi una ufwene.’—1 Petelo 2:21.
ZAYA DIAKA MANKAKA
Zaya una Yesu kasamunuina e nsangu zambote kwa wantu ye masivi kavanga.
4. Yesu wasamunanga e nsangu zambote kwa akaka
Yesu wakangalanga kilometa zayingi muna nzila zazala yo ntoto muna samuna e nsangu zambote kwa wantu ayingi. Tanga Luka 8:1, i bosi, vana e mvutu za yuvu eyi:
-
Nga Yesu wasila kaka umbangi kwa wantu ana bayendanga kwa yandi?
-
Nkia ngolo Yesu kavanganga muna solola wantu?
Nzambi wasakula vo Masia osamuna e nsangu zambote. Tanga Yesaya 61:1, 2, i bosi, vana e mvutu za yuvu eyi:
-
Aweyi Yesu kalungisila ungunza wau?
-
Nga obenze vo wantu nsangu zambote bavuidi mfunu mu lumbu yayi?
5. Yesu walonga mambu mamfunu
Yesu kasamuna kaka nsangu zambote za Kintinu kia Nzambi ko, kansi walonga mpe mambu mamfunu. Tala nona yakete ya mambu kalonga muna Longi diandi vana Mongo. Tanga Matai 6:14, 34 ye 7:12, i bosi, vana e mvutu za yuvu eyi:
-
Nkia mambu mamfunu Yesu kalonga muna tini yayi?
-
Nga obenze vo malongi mama malenda sadisa wantu o unu?
6. Yesu wavanga masivi
Yave wavana nkuma kwa Yesu mu vanga masivi mayingi. Muna bonga e nona, tanga Maku 5:25-34 yovo tala e VIDEO. I bosi, vana e mvutu za yuvu ilende.
-
Nkia ziku nkento ambevo kakala kiau?
-
Nkia diambu oyangalele muna sivi diadi?
Tanga Yoane 5:36, i bosi, vana e mvutu za kiuvu eki:
-
Masivi ma Yesu, nkia ‘kimbangi mesianga’ mu kuma kiandi?
Nga ozeye?
Mayingi tuzeye mu kuma kia Yesu mena muna nkand’a Matai, Maku, Luka ye Yoane. Konso nsoneki wayika mambu mankaka maswaswana mu kuma kia Yesu. E mambu mama, mekitulanga lusansu lwa zingu kia Yesu se lwakiese muna tanga.
-
MATAI
yandi wasoneka nkanda wantete wa Nsangu Zambote. Muna nkanda wau, Matai wayika malongi mayingi ma Yesu, musungula mana kalonga mu kuma kia Kintinu kia Nzambi.
-
MAKU
i nkanda usundidi keva muna nkanda miami. Uyikanga mambu mamfunu mavangama.
-
LUKA
nkanda wau utoma songanga vo e sambu mfunu kiakala kwa Yesu. Usonganga mpe una Yesu kasongelanga e ngemba kwa akento.
-
YOANE
uvovelanga moko yayingi Yesu kakala yau ye akundi andi yo wantu ankaka. E moko yayi ikutusadisanga mu zaya e mpila muntu Yesu kakala.
AVO MUNTU UVOVESE VO: “Yesu muntu ambote kakala, kansi ke yandi ko i Masia.”
-
Nkia mvutu okumvana?
MAMBU MASINA MA LONGI DIADI
Yesu wasamunanga Kintinu kia Nzambi, wavanga masivi yo lemvokela Yave muna mawonso.
Nkia Mambu Olongokele?
-
Nkia salu Yesu kasianga va fulu kiantete vava kakala ova ntoto?
-
Masivi Yesu kavanga, adieyi masonga?
-
Nkia mambu mamfunu Yesu kalonga?
TALA MPE OMA MALENDE
Nkia diambu Yesu katoma vovelanga?
“Kintinu kia Nzambi—Nkia Mfunu Kina kwa Yesu?” (Eyingidilu dia 1 dia Okutoba, 2014)
Zaya e kuma tukwikidilanga vo masivi ma Yesu mavangama kieleka.
“Os Milagres de Jesus—O que Pode Aprender Deles?” (Eyingidilu dia 15 dia Yuli, 2004)
Zaya una e zingu kia muntu mosi kiasobela vava kalongoka una Yesu kakadilanga yo wantu ankaka.
“Wete Diame Kaka Yatokanenanga” (Eyingidilu dia 1 dia Okutoba, 2014)
Tala e ndandani ya mambu mamfunu Yesu kavanga.
“Mambu Mamfunu Mavangama Muna Zingu kia Yesu ova Ntoto” (Bibila—Nsekola ya Nz’ampa, Nkudika A7)
a Muna longi dia 31-33, tuvovela mayingi mu kuma kia Kintinu kia Nzambi.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
