KIFUNDWA 16
Byālongele Yesu Paādi Pano pa Ntanda
Bantu bavule bamonanga Yesu bu mwana wampikwa bukomo, bu mupolofeto wa tunangu, nansha bu muntu wikonda na lufu. Ino mwene i biyampe twifunde bivule na kubandaula būmi bwandi pano pa ntanda? Mu kino kifundwa, tusa kubandaula’mo bintu bya mvubu mpata byālongele Yesu ne muswelo obwanya kumwena’mo.
1. Le mwingilo wa mvubu mpata wāingile Yesu i mwingilo’ka?
Mwingilo wa mvubu mpata wāingile Yesu i wa “kusapula myanda miyampe ya Bulopwe bwa Leza.” (Tangai Luka 4:43.) Wāsapwile myanda miyampe ya amba Leza usa kutūla’ko bulopwe, ke umbikalo kadi, ukapwija makambakano onso a bantu. a Yesu wāsapwile pampikwa kukōka musapu muyampe mu myaka isatu ne kipindi.—Mateo 9:35.
2. Mwanda waka Yesu wālongele bingelengele?
Bible utela ‘bilongwa bivule bya bukomo, bintu bya kutendelwa, ne biyukeno byalongele Leza kupityila kudi Yesu.’ (Bilongwa 2:22) Kupityila ku bukomo bwa Leza, Yesu wābwenye kutalaja bimpumpu, kudisha tununu ne tununu twa bantu, kubelula babela, enka ne kujokeja ku būmi boba bafwile. (Mateo 8:23-27; 14:15-21; Mako 6:56; Luka 7:11-17) Bingelengele byālongele Yesu byālombwele patōka’mba i mutumwe na Leza. Kadi byālombwele amba Yehova udi na bukomo bwa kupwija makambakano etu onso.
3. Lelo būmi bwa Yesu bwitufundija bika?
Yesu wākōkele Yehova mu ngikadilo yonso. (Tangai Yoano 8:29.) Nansha byokwādi lwana, Yesu wālongele na kikōkeji byonso byādi bimulomba Shandi kulonga kufika’nka ne ku lufu. Wālombwele amba muntu ubwanya kwingidila Leza nansha ke mu ngikadilo mikomo mwine. Mu uno muswelo, Yesu wētushidile “kimfwa mwanda wa [tulonde] senene mu mayo andi.”—1 Petelo 2:21.
LANGULUKA BININGE
Tala muswelo wāsapwile Yesu myanda miyampe ne waālongele bingelengele.
4. Yesu wāsapwile myanda miyampe
Yesu wāendele tutwa na tutwa twa makilometele mu mashinda a busala mwanda wa kukasapwila bavule bene myanda miyampe. Tangai Luka 8:1, ne kwisambila pa bino bipangujo:
-
Lelo Yesu wādi usapula enka ku bantu bādi bebungila kwadi kete mwanda wa kumuteja?
-
I bukomo’ka bwālongele Yesu pa kusokola bantu?
Leza wālaile amba Meshiasa ukasapula myanda miyampe. Tangai Isaya 61:1, 2, ne kwisambila pa bino bipangujo:
-
Lelo Yesu wāfikidije namani buno bupolofeto?
-
Le ulanga dyalelo kudi bantu basakilwa kwivwana ino myanda miyampe?
5. Yesu wāfundije bubine bwa kamweno
Kutentekela pa kusapula myanda miyampe ya Bulopwe bwa Leza, Yesu wāfundije ne bufundiji bwa kamweno mu būmi. Tala’tu bimfwa bityetye bitanwa mu Busapudi bwandi butumbe bwa ku Lūlu. Tangai Mateo 6:14, 34 ne 7:12, ne kwisambila pa bino bipangujo:
-
Le i madingi’ka a kamweno āletele Yesu mu ano mavese?
-
Molangila ano madingi akidi na mvubu dyalelo?
6. Yesu wālongele bingelengele
Yehova wāpēle Yesu bukomo bwa kulonga bingelengele bivule. Pa kumona’ko kimfwa kimo, tangai Mako 5:25-34 nansha kutala VIDEO. Kupwa, mwisambilei pa bipangujo bilonda’bya.
-
Mu ino video, i bika byādi bikulupile uno mwana-mukaji mubele?
-
Le i bika byakutulumuja mu kino kingelengele?
Tangai Yoano 5:36, ne kwisambila pa kino kipangujo:
-
Lelo bingelengele bya Yesu ‘byāsapwile bukamoni’ pa mwanda’ka, nansha kadi byālombwele bika pādi?
Le wadi uyukile?
Myanda mivule yotuyukile padi Yesu i milupulwe mu mikanda iná ya mu Bible itwa bu Maevanjile—Mateo, Mako, Luka, ne Yoano. Mulembi ne mulembi wa Evanjile wābwejeje’mo mwanda kampanda padi Yesu. Ino myanda yonso i mikwatañane ne kuleta kituntulu pa būmi bwandi.
-
MATEO
wālembele Evanjile mibajinji. Wēsambīle bininge pa bufundiji bwa Yesu, nakampata byobya byāfundije Yesu pa Bulopwe bwa Leza.
-
MAKO
i mulembe Evanjile mīpi, na kutela myanda mivule ikunka mutyima.
-
LUKA
wātele mutyima bininge pa milombelo ne pa muswelo wādi wikele Yesu biyampe na bana-bakaji.
-
YOANO
i musokole nakampata bumuntu bwa Yesu na kwisambila pa mīsambo yandi mivule na balunda nandi ne na bantu bakwabo.
BANTU BAMO BANENANGA’MBA: “Yesu wādi’tu muntu muyampe, kubapu.”
-
Le abe ulanga’po namani?
MU KĪPI
Yesu wāsapwile myanda ya Bulopwe bwa Leza, wālongele bingelengele, kadi wākōkele Yehova mu ngikadilo yonso.
Pitulukai’mo
-
Le mwingilo wa mvubu mpata wāingile Yesu pano pa ntanda i mwingilo’ka?
-
Bingelengele byālongele Yesu byālombwele bika?
-
Le i bufundiji’ka bwa kamweno bwāfundije Yesu?
KIMBA
Le i mwanda’ka wādi uvudile kwisambila’po Yesu?
“Bulopwe bwa Leza—Mobushintulwila Kudi Yesu” (Kiteba kya Mulami, 1 Kweji 10, 2014)
Tala kine kyotukulupidile amba Yesu na bubine wālongele bingelengele.
Tanga umone kimfwa kya Yesu kya kwipānina bakwabo mokyatengēle muntu umo.
“Būmi Bwami Bwadi bwa Kwisakila” (Kiteba kya Mulami, 1 Kweji 10, 2014)
Tala mingilo mikatampe yāingile Yesu moīlondela mungya kitatyi.
a Kifundwa 31-33 bikesambila kamo ne kamo pa Bulopwe bwa Leza.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
