ZIRLAI 16
Isua’n Leia A Awm Lai Khân Eng Nge A Tih?
Mi tam takin Isua chu ṭanpui ngai nausên ang te, zâwlnei fing tak ang te, leh bana thi mai tûr angtein an mitthla a. Mahse, leia a nun bih chianna aṭangin a chanchin kan hriat belh thei ang em? He zirlaiah hian Isua thiltih pawimawh berte zînga ṭhenkhat leh chûngte’n a nghawng dân che kan ngaihtuah ang.
1. Isua hna pawimawh ber chu eng nge ni?
Isua hna pawimawh ber chu, “Pathian Ram chanchin ṭha” hrilh a ni a. (Luka 4:43 chhiar rawh.) Ani chuan Pathianin mihringte harsatna zawng zawng sukiangtu tûr lalram, a nih loh leh sawrkâr a din dâwn tih chanchin ṭha a hril a. a Isua chuan he thuchah ṭha tak hi hah pawh hre lo khawpin, kum thum leh a chanve chhûng a hril a ni.—Matthaia 9:35.
2. Isua thilmak tih chhan chu eng nge ni?
Bible chuan, “Pathianin [Isua] hmangin . . . thil ropui te, thil mak tak te, chhinchhiahna te a tih” thu a sawi a. (Tirhkohte 2:22) Isua chuan Pathian thiltihtheihna hmangin leilung pianken chakna a thunun thei a, mi sâng tam tak a hrai theih bâkah, mitthite hial pawh a kaitho thei a ni. (Matthaia 8:23-27; 14:15-21; Marka 6:56; Luka 7:11-17) Isua thilmak tihte chuan Pathian tirh a nihzia chiang takin a târ lang a. Jehova’n kan harsatna zawng zawng chingfel tûrin thiltihtheihna a neihzia a târ lang bawk.
3. Isua nun dân aṭangin eng nge kan zir theih?
Isua chuan eng dinhmunah pawh Jehova thu a âwih a. (Johana 8:29 chhiar rawh.) Dodâlna a tâwk chung pawhin, a Pain ti tûra a duhte chu a thih thlengin rinawm takin a ti a ni. Dinhmun khirh tak hnuaiah pawh mihringte tân Pathian rawngbâwl chu thil theih a ni tih a finfiah bawk. Chutiang chuan, Isua’n “a hniaka [kan] zuina tûrin entawn tûr [min] hnutchhiah” a ni.—1 Petera 2:21.
ZIR BELHIN HMUH BELH RAWH
Isua’n chanchin ṭha a hrilh dân leh thilmakte a tih dân chu ngaihtuah rawh.
4. Isua’n chanchin ṭha a hril
Isua chuan mi a tam thei ang berte hnêna chanchin ṭha a hrilh theih nân, kawng vaivut chhah tak kârah mêl za tam tak kein a kal a ni. Luka 8:1 chhiarin, hêng zawhnate hi sawiho vang che u:
-
Isua chuan a hnêna thu ngaithla tûra lo kalte hnênah chauh thu a hril em?
-
Isua’n mite hmu tûrin eng ang khawpin nge ṭan a lâk?
Pathian chuan Messia’n chanchin ṭha a hril ang tih a sawi lâwk a. Isaia 61:1, 2 chhiarin, hêng zawhnate hi sawiho vang che u:
-
Engtin nge Isua’n he hrilh lâwkna hi a tihfamkim?
-
Tûn laia mite’n he chanchin ṭha hi an hriat ngai niin i hria em?
5. Isua chuan thu ṭha tak takte a zirtîr
Isua chuan Pathian Ram chanchin ṭha a hrilh mai bâkah, thu ṭha tak takte a zirtîr bawk a. Tlâng Chunga A Thusawi hmingthang tak aṭangin entîrna tlêm azâwng lo ngaihtuah ta ila. Matthaia 6:14, 34 leh 7:12 chhiarin, hêng zawhnate hi sawiho vang che u:
-
Hêng Bible chângahte hian Isua’n eng thurâwn ṭha tak nge a pêk?
-
Hêng thurâwnte hi a la ṭangkai rengin i hria em?
6. Isua’n thilmak a ti
Jehova’n Isua chu thilmak tam tak tih theihna a pe. Entîrna pakhat hriat nân, Marka 5:25-34 chhiar la, a nih loh leh VIDEO chu chhuah rawh. Tichuan, a hnuaia zawhnate hi sawiho vang che u.
-
Video-a hmeichhe dam lo khân eng nge a rin tlat?
-
He thilmak tih chungchângah hian engin nge i rilru khawih?
Johana 5:36 chhiarin, he zawhna hi sawiho vang che u:
-
Isua thilmak tihte chuan a chungchâng eng nge ‘a hriattîr,’ a nih loh leh a finfiah?
I lo hre tawh em?
Isua chanchin chu Chanchin Tha Ziak tia koh Bible bu li—Matthaia, Marka, Luka, leh Johana te aṭanga kan hriat a ni deuh ber a. Chanchin Ṭha ziaktute chuan Isua chungchânga thu chi hrang hrang chipchiar takin an ziak a. Chûng aṭang chuan, Isua nuna thilthleng rilru la takte chu kan hre thei a ni.
-
MATTHAIA
chuan Chanchin Ṭha a ziak hmasa ber a. Isua zirtîrnate, a bîk takin Pathian Ram chanchin a zirtîrna chu a sawi uar a ni.
-
MARKA
chuan Chanchin Ṭha zînga bu tâwi ber a ziak a. Thilthleng phûrawm tak takte chungchâng min hrilh a ni.
-
LUKA
chuan ṭawngṭaina chungchâng leh Isua’n hmeichhiate a cheibâwl dân lam a sawi uar a ni.
-
JOHANA
chuan a ṭhian hnai takte leh mi dangte nêna Isua inbiakna tam tak sawiin, Isua mizia tam tak a târ lang a ni.
MI ṬHENKHAT SAWI DAN: “Isua chu pa ṭha tak pakhat ve mai a ni.”
-
Nang engtin nge i ngaih?
KHAIKHAWMNA
Isua chuan Pathian Ram chanchin ṭha a hril a, thilmakte tiin, eng dinhmun hnuaiah pawh Jehova thu a âwih a ni.
Ennawnna
-
Isua leia a awm laia a hnathawh ber chu eng nge ni?
-
Isua thilmak tihte chuan eng nge a finfiah?
-
Isua’n nunpui tûr eng thu ṭha takte nge a zirtîr?
HRIAT BELH NAN
Eng chungchâng nge Isua’n a sawi tam ber?
“Pathian Ram—Isua Tâna A Pawimawh Chhan” (Vênnainsâng, October 1, 2014)
Isua thilmak tihte a thleng tak tak a ni tih kan rin theih chhan ngaihtuah rawh.
“Isua Thilmak Tihte Aṭangin Eng Nge I Zir Theih?” (Vênnainsâng thuziak)
Isua inpêknain pa pakhat chunga nghawng a neih dân chhiar rawh.
Rawngbâwlnaa Isua thiltih pawimawh zualte a thlen dân indawta ziah thlâk chu en rawh.
a Zirlai 31-33-naah Pathian Ram chungchâng chipchiar zâwka sawiho a ni ang.
You May Also Like
ZAWH FO ṬHIN ZAWHNATE
Jehova Thuhretute Ruahman Bible Zirna Chu Eng Nge Ni?
Jehova Thuhretute ruahman a thlâwna sawihona phûrawm takah Bible lehlin eng pawh i hmang thei a. I chhûngte leh i ṭhian tu pawh i sâwm thei a ni.
