KĨTHOOMO KĨA 16
Nĩatĩa Jesũ Aathithĩrie Rĩrĩa Aarĩ Nthĩgũrũne?
Antũ babaingĩ bonaga Jesũ ta kaana kaniini, kĩroria gĩkĩũme, kana muntũ mũrũme wa gũkuĩra bangĩ. Ĩndĩ no twĩritane jamaingĩ jamwegie na njĩra ya gũcũnkũũna ũtũũro bwawe bwa aja nthĩgũrũne. Kĩthoomone gĩkĩ, tũkairitana mantũ jamwe ja gĩtũmi nkũrũki jarĩa Jesũ aathithĩrie, na ũrĩa joomba gũgũtethia.
1. Nĩ ngũgĩ ĩrĩkũ Jesũ oonaga ĩrĩ ya gĩtũmi nkũrũki?
Ngũgĩ ya Jesũ ĩrĩa yaarĩ ya gĩtũmi nkũrũki nĩ “gutumagiiria nkuma injega ya Unene bwa Murungu.” (Thooma Luka 4:43.) Aatũmagĩĩria nkuma ĩnjega atĩ Mũrungu akarũngĩka ũnene, kana thirikarĩ, ĩrĩa ĩkathiria mathĩĩna jonthe ja antũ. a Jesũ naatũmĩrĩrie nkuma ĩnjega na wĩru mono mĩaka ĩthatũ na nusu.—Mathayo 9:35.
2. Nĩmbi biatũmaga Jesũ aringa biama?
Bibiria nĩtaragĩĩria “mathithio ja inya na imako o na biama biria Murungu aathithagia” gũkũrũkĩĩra Jesũ. (Mathithio 2:22) Gũkũrũkĩĩra inya ya Mũrungu, Jesũ noombĩre gũkiria kĩbubani, aranyiria mangiri, arooria aajie, na arariũkia barĩa bakuĩte. (Mathayo 8:23-27; 14:15-21; Mariko 6:56; Luka 7:11-17) Biama bia Jesũ nĩbiarikithĩrie kamma atĩ nĩ Mũrungu wamũtũmĩte. Kinya nĩbionanĩrie atĩ Jehova arĩ na inya ya kũthiria mathĩĩna jeetũ jonthe.
3. Nĩmbi tũũmba kwiritana kuumania na mũtũũrĩre jwa Jesũ?
Jesũ naathĩkĩĩre Jehova mantũne jonthe. (Thooma Johana 8:29.) O amwe na gũkũrũkĩĩra irigĩĩria, na njĩra ya wĩtĩkikua Jesũ naathithĩrie jonthe jarĩa Ĩthe eendaga athithia mwanka gũkua kwawe. Naarikithĩrie atĩ kwombĩka antũ bagatumĩkĩra Mũrungu kinya rĩrĩa bagũkũrũkĩĩra mantũ jamoomũ. Kwou, Jesũ naatũtigĩĩre ‘mungˈuanano jumwega nikenda tuthingataga makinya jawe.’—1 Petero 2:21.
ĨNJA NKŨRŨKI
Ona ũrĩa Jesũ aatũmĩrĩrie nkuma ĩnjega na araringa biama.
4. Jesũ naatũmagĩĩria nkuma ĩnjega
Jesũ neetaga na magũrũ mairi inyingĩ njĩrene irĩna tĩĩri, agĩtũmagĩĩria nkuma ĩnjega kĩrĩ antũ babaingĩ ũrĩa kũũmbĩka. Thooma Luka 8:1, riu bwarĩĩrie biũria bibi:
-
Rĩ, Jesũ atũmagĩĩria akĩ kĩrĩ antũ barĩa beejaga kũmũthikĩĩra?
-
Nĩatĩa Jesũ aathithagia nĩkenda akinyĩra antũ?
Mũrungu neeranĩte atĩ Mesiya arĩngĩtũmĩĩria nkuma ĩnjega. Thooma Isaya 61:1, 2, rĩu bwarĩĩrie biũria bibi:
-
Nĩatĩa Jesũ oojũririe ũroria bũbũ?
-
Ũrĩthũgaania antũ naarua nĩbakũbatara kwigua nkuma ĩjĩ ĩnjega?
5. Jesũ naaritanaga mma cia gĩtũmi
O amwe na kũritana nkuma ĩnjega yegie Ũnene bwa Mũrungu, Jesũ naaritanĩre mantũ jarĩ na ũtethio. Ona ngerekano inkai kuumania na ntũmĩĩri yaawe ya kĩrĩmene ĩrĩa ijĩkene mono. Thooma Mathayo 6:14, 34 na 7:12, rĩu bwarĩĩrie biũria bibi:
-
Nĩ ũtaaro bũrĩkũ bũrĩ na ũtethio Jesũ aejanĩre kĩrĩ mĩstaarĩ ĩu?
-
Ũrĩthũgaania ũtaaro bũu no butethie antũ naarua?
6. Jesũ naaringĩre biama
Jehova naere Jesũ inya ya kũthithia biama bibingĩ. Nĩkenda wona ngerekano ĩmwe, thooma Mariko 5:25-34 kana ũtege VIDIO. Rĩu bwarĩĩrie biũria bibi bithingatĩte.
-
Kĩrĩ vidio, nĩmbi mwekũrũ ũrĩa wajĩtue etĩkĩrie?
-
Nĩmbi bigũkũringithia kuumania na kĩama kĩu?
Thooma Johana 5:36, rĩu bwarĩĩrie kĩũria gĩkĩ:
-
Nĩmbi biama bia Jesũ ‘biakuujagiira,’ kana biarikĩthagia bũmwegie?
Ũramenya?
Jamaingĩ jarĩa twijĩ jegie Jesũ jaumĩte kĩrĩ mauku jana jarĩa jetagwa injili.—Mathayo, Mariko, Luka, na Johana. O ũmwe wa andĩki baba, aandĩkire mantũ mwanya jegie Jesũ. Mantũ jau jonthe nĩjagwatanagĩra jagatwaa mbica ĩnthongi mono yegie ũtũũro bwa Jesũ.
-
MATHAYO
nĩwe wandĩkĩre ĩuku rĩawe mbere. Nĩrĩtwĩraga mantũ jamaingĩ jegie moritani ya Jesũ mono mono jarĩa Jesũ aritanĩre jegie Ũnene bwa Mũrungu.
-
MARIKO
nĩwe wandĩkĩre injili ĩrĩa nkuĩ nkũrũki. Nĩtwĩraga mantũ jamaingĩ-jakũringĩthia nkoro.
-
LUKA
natwĩraga ũrĩa maromba jaarĩ ja gĩtũmi kĩrĩ Jesũ na agatarĩĩria ũrĩa Jesũ athithagĩria ekũrũ na njĩra ya kĩao.
-
JOHANA
natwĩraga mantũ jamaingĩ jegie nkuma cia Jesũ agĩtaarĩragia mantũ jamaingĩ jarĩa aarĩrie na acoore baawe ba akuĩ na kinya antũ bangĩ.
ANTŨ BAMWE BAUGAGA:“Jesũ aarĩ muntũ ũmwega akĩ, ĩndĩ ataarĩ Mesiya.”
-
Ũrĩthũgaania atĩa?
NA NJĨRA ĨNKUĨ
Jesũ naatũmĩrĩrie bwegie Ũnene bwa Mũrungu, araringa biama, na araathĩkĩĩra Jehova mantũne jonthe.
Gũcookera
-
Nĩ ngũgĩ ĩrĩkũ Jesũ oonaga ĩrĩ ya gĩtũmi nkũrũki rĩrĩa aarĩ nthĩgũrũne?
-
Nĩmbi biama bia Jesũ birikĩthagia?
-
Nĩ mantũ jarĩkũ jarĩ na ũtethio Jesũ aaritanĩre?
CŨNKŨŨNA
Nĩ kĩongo kĩrĩkũ Jesũ aaragĩĩria mono ntũmĩĩrine yaawe aja nthĩgũrũne?
“Ũnene bwa Mũrungu—Bwarĩ na Gĩtũmi Kĩrĩkũ Kĩrĩ Jesũ” (Mnara wa mlinzi, Oktoba 1, 2014)
Ona nĩkĩ tũũmba gwĩtĩkia atĩ biama bia Jesũ kamma nĩbiakarĩkĩre.
“Nĩmbi Ũũmba Kwiritana Kuumania na Biama bia Jesũ?” (Mnara wa Mlinzi, Julaĩ 15, 2004)
Iritane ũrĩa ngerekano ya Jesũ ya kwiritanĩria nĩ ũntũ bwa bangĩ, yaaringĩthĩrie ũtũũro bwa muntũ mũrũme ũmwe.
“Ndaithũgaanagĩria Ninka Akĩ Ũtũũrone Bwakwa” (Mnara wa Mlinzi, Oktoba 1, 2014)
Ona mantũ ja gĩtũmi jarĩa Jesũ aathithĩrie jabanganĩtue kũringana na ũrĩa aajathithĩrie.
a Kĩthoomo kĩa 31-33 tũkaarĩĩria nkũrũki mantũ jegie Ũnene bwa Mũrungu.
