16-ШО УРОК
Иисус мландыште могай пашам шуктен?
Иисус Христос нерген шуко еҥ пала. Иктышт изи азаж годым тудын дене мо лийме нерген веле колыныт. Весышт тудым уш-акылан пророк семын гына палат. Кумшышт тудын колымыжо нерген веле колыныт. Но мом эше Иисус нерген пален налаш лиеш? Мландыште тудо мом ыштен? Тиде урок гыч те пален налыда, мо Иисуслан илышыштыже эн тӱҥ лийын да тидым палымаш тыланда могай пайдам конден кертеш.
1. Иисуслан могай паша эн тӱҥ лийын?
Теве мом Иисус шкеже каласен: «Мый Юмын Кугыжаныш нерген Поро Уверым... каласкалышаш улам». (Лукан 4:43 лудын лекса.) Тудо Юмын Кугыжанышын толмыж нерген поро уверым каласкален. Тиде Кугыжаныш, але правительстве, айдеме тукымын чыла проблемыжым ончыкыжым пытара a. Кум ият пеле Иисус тиде пашалан ни вийым, ни жапым чаманен огыл (Матфейын 9:35).
2. Молан Иисус чудо-влакым ыштен?
Библий дене келшышын, Юмо Иисус гоч «тӱрлӧ чудым, ӧрыктарыше пашам да палдарыше палым» ыштен (Апост. пашашт 2:22). Юмын вийжылан кӧра Иисус тӱтан мардежым чарен, тӱжем дене еҥым пукшен, черле-влакым паремден да эсогыл колышо-влакым ылыжтен (Матфейын 8:23—27; 14:15—21; Маркын 6:56; Лукан 7:11—17). Нине чудо-влак раш ончыктат: Иисусым Юмо колтен да чыла проблемынам кораҥдашлан Иегован вийже уло.
3. Иисусын илышыже мемнам мо́лан туныкта?
Иисус Иеговам кеч-могай ситуацийыштат колыштын. (Иоаннын 8:29 лудын лекса.) Шыгыремдымаш ден поктылмашым ончыде, тудо эре Ачан йодмыжым шуктен. Тудо ончыктен: еҥ-влак чот неле годымат Юмым колыштын кертыт. Тугеже, Иисус деч примерым налын, ме тудын кышаж почеш каен кертына (1 Петрын 2:21).
КЕЛГЫНРАК ШЫМЛЕН НАЛЗА
Шукырак пален налза, кузе Иисус поро уверым каласкален да чудо-влакым ыштен.
4. Иисус поро уверым каласкален
Иисус шуко еҥлан поро уверым каласкалаш тыршен. Тидлан тудо пуракан корно дене шуко шӱдӧ километрым эртен. Лукан 8:1 лудын лекса да вашмутым пуыза:
-
Иисус тудым колышташ толшо-влаклан гына таныклен мо?
-
Еҥ-влаклан поро уверым каласкалашлан Иисус мыняр вийым пыштен?
Юмын ончылгоч каласымыже почеш Мессий еҥ-влаклан поро уверым каласкалышаш. Лукан 4:17—19 лудын лекса да вашмутым пуыза:
-
Кузе Исайя гоч пуымо ончылгоч каласымаш Иисус ӱмбалне шукталтын?
-
Кузе шонеда, таче еҥ-влаклан тиде поро уверым пален налаш кӱлеш мо?
5. Иисус кӱлешан шинчымашым пуэн
Иисус Кугыжаныш нерген поро уверым таныклен гына огыл, тыгак тудо еҥ-влакым илышлан пайдале принцип-влаклан туныктен. Курык ӱмбалне туныктымаш гыч икмыняр шонымашым ончен лектына. Матфейын 6:14, 34 да 7:12 лудын лекса да вашмутым пуыза:
-
Нине почеламутлаште могай кӱлешан шонымашым возымо?
-
Кузе шонеда, нине каҥаш-влак тачат пайдале улыт мо?
6. Иисус чудо-влакым ыштен
Иегова Иисуслан чудо-влакым ышташ вийым пуэн. Теве ик пример. Маркын 5:25—34 лудын лекса але ВИДЕОРОЛИКЫМ ончалза. Вара вашмутым пуыза:
-
Чот черле ӱдырамаш мо́лан ӱшанен?
-
Тиде историй тыланда мо дене поснак келшен?
Иоаннын 5:36 лудын лекса да вашмутым пуыза:
-
Иисусын чудыжо-влак мом пеҥгыдемдат?
Паледа мо?
Библийыште Иисус нерген утларакшым ныл книгаште возымо. Нуно Евангелий-влак маналтыт. Тиде ныл книгам Матфей, Марк, Лука да Иоанн возеныт. Кажне возышо шке Евангелийыштыже Иисус нерген тӱрлӧ ешартыш информацийым палемден. Нунын каласкалымыштым иктеш ушаш гын, Иисусын илышыже нерген оҥай каласкалымаш лектеш.
-
МАТФЕЙ
икымше лийын, кӧ шке Евангелийжым возен. Тудо Иисусын туныктымашыже-влак нерген каласкала, но посна вниманийым Юмын Кугыжанышыже нерген Иисусын мутшылан ойыра.
-
МАРК
эн кӱчык Евангелийым возен. Тудо шуко тӱрлӧ событий нерген кӱчыкын палдара.
-
ЛУКА
шукыракшым кумалтыш мутлан вниманийым ойыра да ӱдырамаш-влак шотышто Иисусын ончалтышыже нерген воза.
-
ИОАНН
мыланна палдара, могай айдеме Иисус лийын. Тыгак тудо Иисусын лишыл йолташыж-влак дене да вес еҥ-влак дене шуко мутланымашыже нерген воза.
ИКТАЖ-КӦ КАЛАСЕН КЕРТЕШ: «Иисус — тиде Чылакертше Юмо».
-
А те кузе шонеда?
ТӰҤ ШОНЫМАШ
Иисус Юмын Кугыжанышыже нерген каласкален да чудо-влакым ыштен. Тудо эре Иеговам колыштын.
Ушештарымаш
-
Могай паша Иисуслан эн тӱҥ лийын?
-
Иисусын чудыжо-влак мом пеҥгыдемдат?
-
Могай пайдале принцип-влаклан Иисус туныктен?
ЕШАРТЫШЛАН
Могай темым Иисус эн тӱҥлан шотлен?
«Юмын Кугыжаныш. Молан Иисус тудлан кугу вниманийым ойырен» («Орол башне» 1 октябрь, 2014 ий)
Иисусын чудыжо-влак чынжымак лийыныт манын, доказательстве-влакым ончен налза.
«Иисус Христосын чудыжо-влак. Мом нуно палдарат?» («Орол башне» 15 июль, 2004 ий)
Лудын лекса, кузе Иисусын примерже ик пӧръеҥын илышыжым вашталтен.
«Мый шке верч гына иленам» («Орол башне» 1 октябрь, 2014 ий)
Тиде таблицыште Иисусын илышыж гыч событий-влакым хронологий почеш палемдыме.
«Иисусын мландысе илыш гыч южо событий-влак» («У тӱня» кусарымаш, Приложений A7)
a Юмын Кугыжаныш нерген шукырак информацийым 31—33 уроклаште возымо.
Вас также может заинтересовать
ЧӰЧКЫДЫН ПУЭДЫМЕ ЙОДЫШ-ВЛАК
Иегован Таныкше-влакын Библийым шымлыме курсышт кузе эрта?
Иегован Таныкше-влак Библийым шымлыме курсым темлат. Шымлыме годым те шкендан Библийым кучылтын кертыда да шымлымашыш ешдам але йолташда-влакым ӱжын кертыда.
