SMALKANKA 16
¿Jisas dîa daukan tasba ra kan taim?
Upla ailal Jisas tânka ba dukiara lukisa taim, tuktan swap lupia kum baku lukisa, prapit sinskira kum, apia kaka waitna pruya kum baku. Sakuna, ¿man lukisma witin rayaka sturka ba yawan stadi munbia kaka, kau lan takaia sip sa ki? Naha smalkanka ra yawan laki kaikbia Jisas dîa daukan tasba ra kan taim, bara baha tânka briaia ba nahki hilp mai munaia sip sa.
1. ¿Ani warkka kau tara Jisas daukan?
Jisas ba wark kau tara daukan ba sika “Gâd King aimaki ba Lâka sturka” smalkaia (Luk 4:43 aisi kaikma). Witin ba sturi yamni nani smalkan upla nani sut trabilka nani ba Gâd Kingka Lâka mita âpu daukbia ba. a Mani yumhpa pura bakriki ba tilara, Jisas karna wark takan baha smalkanka kasak yamni upla ra smalkaia dukiara (Matiu 9:35).
2. ¿Dîa muni Jisas sain pranakira daukan?
Baibil wisa Jisas ba “diara aihka tara nani, sain nani sin daukan” (Sturka Nani 2:22). Gâd bui Jisas ra karnika yaban pâsa tara nani lamni daukaia dukiara, upla ailal ra plun dakakaia, siknis rakaia bara upla pruan wina kli bukaia (Matiu 8:23-27; 14:15-21; Mark 6:56; Luk 7:11-17). Jisas sain tara nani daukan ba wal marikan witin ra Gâd mita blikan ba. Baha sainka nani sin marikan nahki Jehova sip sa wan trabilka nani sut ba wapni mangkaia.
3. ¿Jisas nahki iwi kan tnatka ba wina yawan dîa lan takisa?
Jisas ba piua bani Jehova bîla walan (Jan 8:29 aisi kaikma). Upla nani ba Jisas mapara buan sakuna, Jehova dîa makaban ba kat Jisas daukan pruaia ba kat sin. Baha wal wan marikan yawan sut Gâd kupia lâka daukaia sip sa isi apia kabia kra sin. Baha mita Baibil ba wan wisa “witin daukan baku daukma wisi ai lâka ba sin maikan, ai mina wapanka nani nina blîkma” (1 Pita 2:21).
KAU LAN TAKS
Laki kaiks nahki Jisas sturi yamni nani ba upla ra smalkan bara sain pranakira daukan.
4. Jisas ba upla ra sturi yamni nani ba smalkan
Jisas ba tasba yuya ailal bri yabalka bâk kilómetro ailal pali impakan upla manis ra sturi yamni nani ba smalkaia dukiara. Luk 8:1 aisi kaikma, bara naha dukiara aisi banhma:
-
¿Jisas ba witin ra walaia bali kan uplika nani baman ra smalki kan ki?
-
¿Jisas nahki karna trai munan upla ra pliki bara smalkaia?
Gâd maisa pakan Jisas ba sturi yamni nani ba upla ra smalkaia kan. Aiseya 61:1, 2 aisi kaikma, bara naha dukiara aisi banhma:
-
¿Naha prapit dahra aisanka na nahki Jisas ra aimakan?
-
¿Man lukisma naiwa piua ra sin upla nani ba nit sa baha sturka yamni nani walaia?
5. Jisas ba diara kasak yamni upla ra smalkan
Gâd Kingka Lâka sturka ba baman Jisas smalkras kan, witin ba upla rayaka kat hilp muni smalkanka nani ba aisan. Baha smalkanka nani ba, il purara smalkanka nani tilara sa. Matiu 6:14, 34 bara 7:12 aisi kaikma, bara naha dukiara aisi banhma:
-
¿Naha borska nani ra ani smalkanka yamni Jisas aisan?
-
¿Man lukisma baha smalkanka nani ba naiwa piua ra sin hilp wan munaia sip sa?
6. Jisas ba sain pranakira nani daukan
Jehova mita Jisas ra karnika tara yaban sain pranakira ailal daukaia dukiara. Sain kum kaikaia dukiara, Mark 5:25-34 aisi kaikma, apia kaka LILKA ba kaikma. Ningkara naha dukiara aisi banhma:
-
Lilka ra kaikan baku mairin siknis kata ba, ¿dîa kasak luki kan?
-
¿Naha sainka pranakira ba dukiara man dîa kau lukisma?
Jan 5:36 aisi kaikma, bara naha dukiara aisi banhma:
-
Jisas sain pranakira daukan ba, ¿dîa tânka wan marikisa?
¿Nu kapram ki?
Jisas dukiara yawan dîa nu ba, aihkika ba Baibil bukka walhwal Gaspil wi ba wina sakisa—Matiu, Mark, Luk bara Jan— kumi bani Jisas rayaka tânka pranakira ba sât sât aisisa.
-
MATIU
witin pas Gaspilka ba ulban. Jisas smalkanka nani dukiara witin kau aisisa, kau pali Gâd Kingka Lâka sturka ba.
-
MARK
Gaspil kau kunhku ba ulban. Dîa takan ba lilia bara painkira tnatka ra marikisa.
-
LUK
tânka marikisa pura sunra ba diara tara sa, bara nahki Jisas ba mairin nani ra yamni munan.
-
JAN
Jisas lukanka bara ai daukanka nani dukiara kau aisisa, ai pânika nani aikuki dîa aisi kan ba, bara nahki upla wala wal asla pali kan ba dukiara sin.
UPLA KUM KUM NAKU LUKISA: “Jisas ba waitna pain baman kan, Misaya lika apia kan”.
-
¿Man dîa lukisma?
DÎA LAN TAKRAM
Jisas ba Gâd Kingka Lâka ba dukiara smalkan, sain pranakira daukan bara piua bani Jehova bîla walan.
Wan kupia krawaia
-
Jisas tasba ra kan taim, ¿ani warkka tara kau daukan?
-
¿Jisas sain pranakira dauki kan taim dîa pali marikan?
-
Upla rayaka hilpka ba dukiara, ¿Jisas ba ani smalkanka yamni nani aisan?
KAU PLIKI KAIKS
¿Jisas ba dîa dukiara kau smalkan?
“Dîa muni Gâd Kingka Lâka ba diara kau tara sa Jisas mapara” (La Atalaya octubre 1, 2014)
Laki kaiks dîa muni yawan kasak lukisa Jisas ba rait pali sain tara daukan ba.
“Jisas sain pranakira daukan ba wina: ¿man dîa lan takaia sip sma?” (La Atalaya julio 15, 2004)
Aisi kaiks, nahki waitna kum ai rayaka chens takan Jisas mita upla ra hilp muni bara main kaikan sturka ba lan takan taim.
“Yang rayaki baman kau tara kulki kapri” (La Atalaya octubre 1, 2014)
Kaiks, Jisas warkka nani ba ai piua kat dauki auya kan taim.
“Jisas tasba ra kan taim dîa takan ba marikisa” (Baibil stadi takaia hilpka, Pîska 4-B)
a Smalkanka 31 wina 33 ba kat, kau tânka marikisa Gâd Kingka Lâka ba dukiara.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
