ISAMBILILO 16
Avyani Vino e Yesu Wacisile Pano Walinji mu Nsi?
Awavule wakakwelenganya Yesu ukuti akana akanya, we kasesema, nanti ukumwelenganizizya vye kwe vino wafwile. Tungamanya ivivule pe Yesu nga cakuti twasambilila pa wumi wakwe pano walinji mu nsi. Mwe lyo-o isambililo twalola ivintu ivicindame vino Yesu wacisile pano walinji mu nsi, na vino vyo-o ivintu vingakwavwa.
1. Amulimo ci uwucindame wuno Yesu wawombanga?
Umulimo uwucindame wuno Yesu wawombanga awa kuwizya “ilyasi lizima ilya Wufumu wa kwe Leza.” (Wazya Luka 4:43.) Wawizizye ilyasi lizima ilya kwe Leza pa wufumu nanti uwuteko wuno wuliyiza wufumyepo intazi zyonsinye zino zyatuyimvya. a E Yesu wawomvile wo-o umulimo wakuwizya nu kusambilizya awantu pi lyasi ilizima pa myaka yitatu ni myezi 6.—Mateyu 9:35.
2. Amulandu ci wuno e Yesu wacitilanga ivizungusyo?
E Baibolo yalondolola imilimo imivule iya maka “nivizungusyo nga nivimanyilo vino Leza wawombezile mwakwe Yesu.” (Imilimo 2:22) E Leza wapile e Yesu amaka yakupozya awalwale, ukulesya icimuza, ukulisya amawumba ya wantu awavule, ukupozya awalwale nga nu kuzyulupula awafwe. (Mateyu 8:23-27; 14:15-21; Marko 6:56; Luka 7:11-17) Ivizungusyo vino Yesu wacitanga vyalanjizyanga apatiswenye ukuti e Yehova awino wamutumile. Swinya vyalanjizizye nu kuti e Yehova wawa na maka yakumala intazi zyonsinyene munsi.
3. Avyani vino tungasambililako kwe vino Yesu walinji?
E Yesu wivwilanga e Yehova lyonsinye. (Wazya Yohani 8:29.) Wacisile vyonsinye vino Yisi wamunenile ukucita mpaka ni mfwa yakwe. Wo-o vino wacisile walanjizizye apatiswenye ukuti awantu wangawombela e Leza asa mulandu ni ntazi zino wangapitamo. Fwandi e Yesu ‘watusila icilolelo alya kuti tuwakonka mu ntampulo zyakwe.’—1 Peter 2:21.
SAMBILILA IVICILE PA-A
Lola vino Yesu wawizyanga ilyasi lizima na vino wacitanga ivizungusyo.
4. E Yesu wawizyanga ilyasi lizima
E Yesu wafikanga ukutali pakuya mukuwizya ilyasi lizima. Swinya wapitanga pansi mwi tukumbu pakuti vye awizizye awavule. Wazyani Luka 8:1, nu kulanzyanya ya-a mawuzyo:
-
Uzye e Yesu wawizizyangavye awantu wano wizanga kwe weliwe?
-
Avyani vino e Yesu wacitanga pakutivye azane awantu?
E Leza walandizile lyankani ukuti e Mesia walinji nu kuwawizya ilyasi lizima. Wazyani Ayizeya 61:1, 2, nu kulanzyanya ya-a mawuzyo:
-
Uzye e Yesu waficilisizye wuli wo-o uwusesemo?
-
Uzye ukulola ukuti awantu pe yo-o impindi wazipizile ukwivwa kwi lyasi lizima?
5. E Yesu wasambilizizye amasambililo amacindame
E Yesu atasambilizyanga vye awantu pa Wufumu wa kwe Leza, lelo wawasambilizyanga na vino vingawavwa. Lola vino wawasambilizizye pi lyasi lya pa Mwamba. Wazyani Mateyu 6:14, 34 ne 7:12, nu kulanzyanya ya-a mawuzyo:
-
Akupanda amano ci kuno e Yesu wanenile awantu pe ya-a amavesi?
-
Uzye ukulola ukuti vyo-o vino Yesu walanzile vingavwa awantu na pe yonye impindi?
6. E Yesu wacisile ivizungusyo
Yehova wapile Yesu amaka yakucita ivizungusyo. Pa kulola icakulolelako conga, wazyani, Marko 5:25-34 nanti tambani e VIDYO. nu kulanzyanya ya-a mawuzyo.
-
Avyani vino we-e umwanaci atavwilikanga?
-
Acani cino wakundapo pe co-o icizungusyo?
Wazyani Yohani 5:36, nu kulanzyanya lyo-o iwuzyo:
-
Uzye ivizungusyo vino e Yesu wacisile ‘vikalanjizya’ cani swinya awusinincizyo ci wuno vikapa pe Yesu?
Uzye umanyile?
Vyonsinye vino vyalandwa pe Yesu, vyawa mu mabuku 4 yano wakakwita ukuti Amalandwe, akuli ukuti—e Mateyu, Marko, Luka ne Yohani. Cila kalemba walembanga cimwi iciyiwele pe Yesu na pa wumi wakwe. Lelo vyonsinye vino walemvile vikakwivwana swinya vikamulondolola uwusaka sana.
-
MATEYU
awino watalicizilepo ukulemba ibuku lyakwe. Likatunena ivivule pe vino Yesu wasambilizyanga, maka maka pa Wufumu wa kwe Leza.
-
MARKO
walemvile ibuku ilifupi pe yonsinye 4. Likatunena ivizima ivivule vino vyacitisile.
-
LUKA
likatunena vino Yesu wacindamisile ipepo na vino walangulucilangako awanaci.
-
YOHANI
likatunena ivivule vino Yesu walanzile ni viwuza vyakwe na wantu wanji. Co-o cikatwavwa ukumumanya.
WAMWI WAKATI: “E Yesu we Leza wa Maka Yonsinye.”
-
Nga wewe ukutipo wuli?
IVISINKA VIKULU
E Yesu wawizyanga pa Wufumu wa kwe Leza, wacitanga ivizungusyo swinya lyonsinye wivwilanga Yehova.
Avyani Vino Wasambilila?
-
Amulimo ci uwucindame wuno Yesu wawombanga pano walinji mu nsi?
-
Uzye ivizungusyo vino Yesu wacisile vikapa wusinincizyo ci?
-
Akupanda mano ci kuno Yesu wanenile awantu?
MANYILAPO NA VINJI
Alilyasi ci lino Yesu walandangapo sana?
“Vino Yesu Walolanga Uwufumu wa kwe Leza” (Ulupungu lwa kwa Kalinda, October 1, 2014)
Lola umulandu wuno tungasuwilila ukuti ivizungusyo vya kwe Yesu vyacitisile asa vyakwelenganya vye.
“Avyani Vino Tukasambililako ku Vizungusyo vya kwe Yesu?” (Ulupungu lwa kwa Kalinda, July 15, 2004)
Lola vino umonsi wumwi wacisile pa nsizi yakulola vino Yesu wayipelesizye.
“Ntelenganyanga pe Wanji” (Ulupungu lwa kwa Kalinda, October 1, 2014)
Lola ivintu vino Yesu wacisile mulyanye muno vyakonkanila.
a Amasambililo 31-33 Yalilondolola ivivule pa wufumu wa kwe Leza.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
