TLAMACHTILI 16
¿Tlake kichijki Jesús kema itstoya ipan Tlaltipaktli?
Miakej maseualmej moiljuiaj Jesús nojua eli se pilkonetsi, se tlajtolpanextijketl o se tlakatl katli tlauel tlaijiyouia. ¿Timoiljuia nojua kuali tikixmatisej Jesús tlaj timomachtisej tlake kichijki kema itstoya ipan Tlaltipaktli? Ipan ni tlamachtili tikitasej se keski tlamantli tlen tlauel ipati tlen Jesús kichijki uan kenijkatsa uelis mitspaleuis.
1. ¿Tlake tekitl tlen tlauel ipati kichiuako Jesús?
Jesús mosentlalik kimoyauas “nopa kuali tlajtoli tlen toTeotsij iTlanauatijkayo” (xijpoua Lucas 4:43, TNM). Kinmatiltik maseualmej toTeotsij kitlaliskia se Tlanauatijkayotl tlen kitlamiltiskia nochi tlamantli tlen techtlaijiyouiltia. a Ipan eyi xiuitl uan tlajko Jesús mosentlalik kimoyauas ni kuali tlamachtili (Mateo 9:35).
2. ¿Tlake techmachtia kema tikitaj Jesús kichijki uejueyi tlamantli?
Biblia kiijtoua “ika Jesús, toTeko kichijki miak uejueyi tlamantli para tlakamej ma kisentlachilikaj uan kichijki miak tlaneskayotl uan miak chikaualneskayotl” (Hechos 2:22). Ika Jehová ichikaualis, Jesús kitlakaualtik ueyi atl, kintlamakak miakej, kinchikajki katli mokokouayayaj uan kinyolkuik se keskij maseualmej (Mateo 8:23-27; 14:15-21; Marcos 6:56; Lucas 7:11-17). Nochi nopa uejueyi tlamantli tlen Jesús kichijki, kinextik Jehová kititlantoya. Nojkia kinextik Jehová uelis kitlamiltis nochi tlen techtlaijiyouiltia.
3. ¿Tlake techmachtia tlen Jesús kichijki ipan inemilis?
Jesús nochipa kineltokak Jehová (xijpoua Juan 8:29). Amo kema kitlauelkajki Jehová uan kichijki nochi tlen kinauatik maske sekij amo kinekiyayaj kiampa ma kichiua. Kinextik maseualmej kena uelis kitekipanosej Jehová maske kiixnamikisej miak tlaouijkayotl. Kiampa Jesús kinnextilik itokilijkauaj kenijkatsa uelis kichiuasej kej ya (1 Pedro 2:21).
KUALI XIMOMACHTI
Ma tikitakaj kenijkatsa tlajtolmoyajki Jesús uan kenijkatsa kichijki uejueyi tlamantli.
4. Jesús kimoyajki kuali tlamachtili
Jesús kinekiyaya miakej maseualmej ma kikakikaj nopa kuali tlamachtili, yeka tlauel uejka ikxinejnemiyaya kampa onkayaya miak tlaltejpoktli. Xijpouakaj Lucas 8:1 uan xijnankilikaj ni tlajtlanili:
-
¿Kinkamanaljuiyaya Jesús san katli monechkauiyayaj kampa ya itstoya?
-
¿Tlake monekiyaya kichiuas Jesús uan kiampa kinpantis maseualmej?
ToTeotsij kiijtok Mesías kimoyauaskia nopa kuali tlamachtili. Xijpouakaj Isaías 61:1, 2 uan xijnankilikaj ni tlajtlanili:
-
¿Kenijkatsa kichijki Jesús tlen kiijtoua ni tlajtolpanextili?
-
¿Timoiljuia ipan ni tonali maseualmej nojkia moneki kikakisej nopa kuali tlamachtili?
5. Jesús tlamachtik tlen tlauel ipati
Jesús amo san kimoyajki nopa kuali tlamachtili tlen toTeotsij iTlanauatijkayo, nojkia tlamachtik tlen uelis techpaleuis ipan tonemilis. Ma tikitakaj se keski tlamantli tlen tlamachtik kema itstoya ipan se tepetl. Xijpouakaj Mateo 6:14, 34 uan 7:12 uan xijnankilikaj ni tlajtlanili:
-
¿Tlake kuali tlamantli kiijtok Jesús ipan ni versículos?
-
¿Timoiljuia tlen Jesús kiijtok uelis kinpaleuis maseualmej katli itstokej ipan ni tonali?
6. Jesús kichijki uejueyi tlamantli
Jehová kimakak Jesús chikaualistli uan kiampa uelki kichiua uejueyi tlamantli. Uelis inkiitasej se tlamantli tlen Jesús kichijki, xijpouakaj Marcos 5:25-34 o xikitakaj nopa VIDEO. Teipa xijnankilikaj ni tlajtlanili:
-
Kej nesi ipan video, ¿tlake moiljuiyaya nopa siuatl katli mokokouayaya?
-
¿Tlake tlamantli mitspaktik tlen Jesús kichijki?
Xijpouakaj Juan 5:36 uan xijnankilikaj ni tlajtlanili:
-
¿Tlake kinextia nopa uejueyi tlamantli tlen Jesús kichijki?
¿Tijmajtoya?
Miak tlamantli tlen Jesús kichijki tijmatij pampa ijkuilijtok ipan pilamochtsitsij: Mateo, Marcos, Lucas uan Juan. Katli kiijkuilojkej nopa naui pilamochtsitsij amo sanse tlamantli kipankixtijkej. Yeka nochi tlen kiijkuilojkej techpaleuia nojua kuali ma tikixmatikaj Jesús.
-
MATEO
kiijkuilok nopa achtoui pilamochtsi. Maske kiijkuilok miak tlamantli tlen Jesús tlamachtik, ya mosentlalik ipan tlen Jesús kiijtok tlen toTeotsij iTlanauatijkayo.
-
MARCOS
amo kiijkuilok miak tlamantli, maske kiampa kichijki, tlen kiijkuilok tlauel techpaktia pampa techpaleuia ma timoiljuikaj tlen panotiajki.
-
LUCAS
kiijkuilok Jesús nochipa momaijtouayaya uan tlauel kintlepanitayaya siuamej.
-
JUAN
kiijkuilok miak tlamantli tlen Jesús kiniljuik iuampoyouaj uan sekinok maseualmej, nopa techpaleuia ma tijmatikaj kenijkatsa eliyaya Jesús.
TLEN SEKINOK KIIJTOUAJ: “Jesús eli toTeotsij”.
-
¿Ta tlake timoiljuia?
TLEN TIMOMACHTIJKEJ
Jesús tematiltik tlen kichiuas toTeotsij iTlanauatijkayo, kichijki uejueyi tlamantli uan nochipa kichijki tlen Jehová kinauatik.
¿Tlake tijyekok?
-
¿Tlake mosentlalik kichiuas Jesús kema itstoya ipan Tlaltipaktli?
-
¿Tlake kinextik nopa uejueyi tlamantli tlen Jesús kichijki?
-
¿Tlake tlamantli tlen Jesús tlamachtik uelis techpaleuis ipan tonemilis?
NOJKIA XIKITA NI
¿Tlake tlamachtili kimoyajki Jesús?
“¿Kenke Jesús tlauel kipatiita toTeotsij iTlanauatijkayo?” (Tlen Tematiltia, octubre 1, 2014)
Xikita kenke timotemachiaj Jesús nelnelia kichijki uejueyi tlamantli.
“¿Tlake techmachtia nopa uejueyi tlamantli tlen Jesús kichijki?” (Tlen Tematiltia, julio 15, 2004)
Xikita kenijkatsa se tlakatl kipatlak inemilis kema kiyekok Jesús kitekipachouayaya tlen kinpanoyaya maseualmej.
“San na tlauel nimopatiitayaya” (Tlen Tematiltia, octubre 1, 2014)
Xikita se keski tlamantli tlen tlauel ipati tlen Jesús kichijki, uan xikita kema panotiajki.
a Ipan tlamachtili 31, 32 uan 33 moixtoma tlake eli toTeotsij iTlanauatijkayo.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
