TAMACHTILIS 16
¿Toni kichiuak Jesús keman nemia nikan taltikpak?
Miakej kinemiliaj ke Jesús sayoj se konetsin akin uetstok itech pesebre, se takat yolkuali, oso aksa akin tajyouijtok uan momikilitia. Komo okachi timomachtiaj tein Jesús kichiuak nikan taltikpak, ¿tikonnemilia ke kuali tikixmatiskej? Itech nejin tamachtilis, tikitaskej toni tein okachi moneki kichiuak Jesús uan keniuj uelis mitsonpaleuis.
1. ¿Katiyejua tekit tein okachi moneki kichiuak Jesús?
Jesús kichiuak tein okachi monekia, tetapouij “kuali tanauatilmej ika iTekiuajyo Dios” oso iTaixyekanalis Dios (xikonita Lucas 4:43, TNM). Kiteixmatiltij ke Dios kiixtaliskia se tekiuajyot tein kiyektalis nochi kuejmolmej tein tikpiaj. a Itech eyi xiuit uan tajko, Jesús motemakak kiteixmatiltis nejin kuali tanauatilmej (Mateo 9:35).
2. ¿Keniuj tapaleuij maj Jesús kichiuani uejueyi tachiualismej?
Biblia kijtoua miak taman “tein se kimoujkaita uan uejueyi tachiualismej tein Dios kichiuak itechkopa [Jesús]” (Hechos 2:22, TNM). Ika ichikaualis Dios, Jesús uelik kitamatilij se tetsaujkaejekat, semi miakej kintamakak, kinpajtij akin mokokouayaj uan kichiuak maj oksepa nemikan akin momikilijkajya (Mateo 8:23-27; 14:15-21; Marcos 6:56; Lucas 7:11-17). Nochi tein kichiuak Jesús kinextij ke Dios kiualtitanka. Uan no kinextij ke sayoj Jiova kipia chikaualis uan uelis kiyektalis nochi tokuejmoluan.
3. ¿Toni techmachtia tein kichiuak Jesús?
Jesús nochipa kitakamatik Jiova (xikonita Juan 8:29). Maski miakej kiixnamikkej, Jesús nochipa kitakamatik Jiova hasta keman momikilij. Kinextij ke uelis tiktekitiliskej Dios maski tikpanoskej ouijkayomej. Ijkon kinnextilij imomachtijkauan tein ueliskia kichiuaskej para kitojtokaskej “ika miak nejmachkayot” (1 Pedro 2:21, TNM).
MAJ OKACHI TIMOMACHTIKAN
Maj tikitakan keniuj Jesús kiteixmatiltij kuali tanauatilmej uan keniuj kichiuak uejueyi tachiualismej.
4. Jesús kiteixmatiltij kuali tanauatilmej
Jesús semi uejka nejnemia uan miakkan yaya maski semi talnextaj katka, porin kinekia kintapouis kuali tanauatilmej nochin akin ueliskia. Xikitakan Lucas 8:1 uan ika xitajtokan nejin:
-
¿Kinmachtiaya Jesús sayoj akin yayaj kitemotij?
-
¿Toni monekik kichiuas Jesús para kinajsis akin kinmachtis?
Dios kijtoj ke Mesías kiteixmatiltiskia kuali tanauatilmej. Xikitakan Isaías 61:1, 2 uan ika xitajtokan nejin:
-
¿Keniuj kichiuak Jesús tein nikan moijtoua?
-
¿Tikonnemilia ke axkan no moneki maj oksekin kikakikan nejin kuali tanauatilmej?
5. Jesús tamachtij miak taman tein no uelis techpaleuis
Jesús amo sayoj kiteixmatiltij kuali tanauatilmej ika iTekiuajyo Dios, ta no tamachtij tein ueli techpaleuia axkan. Maj tikitakan seki taman tein tamachtij itech se tepet. Xikitakan Mateo 6:14, 34 uan 7:12, uan ika xitajtokan nejin:
-
¿Toni tayolmajxitij Jesús itech nejin versículos?
-
¿Tikonnemilia ke no uelis techpaleuis axkan?
6. Jesús kichiuak uejueyi tachiualismej
Jiova kimakak Jesús chikaualis tein ika kichiuak uejueyi tachiualismej. Xikitakan Marcos 5:25-34 oso xikitakan VIDEO uan ika xitajtokan nejin:
-
Kemej tikitakej itech video, ¿toni kineltokaya siuatsin akin mokokouaya?
-
¿Toni tein mochiuak okachi tikonuelitak?
Xikitakan Juan 5:36 uan ika xitajtokan nejin:
-
¿Toni kinextiaj uejueyi tachiualismej tein kichiuak Jesús?
¿Tikonmatia?
Miak taman tein tikmatij ke kichiuak Jesús ijkuiliujtok itech naui Evangelios. Mateo, Marcos, Lucas uan Juan kijkuilojkej tein Jesús kichiuak. Kemej tataman tein kijkuilojkej techpaleuia maj kuali tikixmatikan inemilis Jesús.
-
MATEO
yejua akin kijkuiloj yekinika Evangelio. Kijkuiloj tein tamachtij Jesús, uan okachiok tein tamachtij ika iTekiuajyo Dios.
-
MARCOS
kijkuiloj Evangelio tein okachi tsikitsin uan ika tajtoua seki taman tein semi kualtsin.
-
LUCAS
okachi ika tajtoua ke moneki se kichiuas netataujtil uan kinextia ke Jesús semi kualtakat katka iniuan siuamej.
-
JUAN
okachi ika tajtoua keniuj katka Jesús, kinextia keniuj kinnojnotsaya akin kuali iniuan mouikaya uan oksekin.
TEIN SEKIN KIJTOUAJ: “Jesús katka sayoj se takat yolkuali”.
-
¿Toni tikonnemilia tejuatsin?
TEIN TIKITAKEJ
Jesús kiteixmatiltij iTekiuajyo Dios, kichiuak uejueyi tachiualismej uan nochipa kitakamatik Jiova.
Maj tikelnamikikan
-
¿Katiyejua tekit Jesús kiitaya ke okachi monekia keman yetoya nikan taltikpak?
-
¿Toni moyekitak keman Jesús kichiuaya uejueyi tachiualismej?
-
¿Toni tamachtij Jesús tein axkan no techpaleuia?
NO XIKONITA NEJIN
¿Toni okachi ika tajtoj Jesús?
“¿Keyej Jesús kiita ke moneki iTekiuajyo Dios?” (Tanejmachtijkej, 1 metsti noviembre xiuit 2014)
Xikonita keyej uelis tikneltokaskej ke Jesús yekmelauj kichiuak uejueyi tachiualismej.
“Los milagros de Jesús: ¿qué puede aprender de ellos?” (La Atalaya, 15 de julio de 2004)
Xikonita keniuj se takat semi kipaleuij keman momachtij ke Jesús amo sayoj itech tanemiliaya.
“Okachi niktayekanaltiaya tein nejua niknejnekia” (Tanejmachtijkej, 1 metsti noviembre xiuit 2014)
Xikonita tein kipanok Jesús ijkon kemej mochiujtiyajki.
“Inemilis Jesús itech taltikpak: Jesús peua tekiti” (Amaix tein ika timomachtiaj iTajtol Dios, 4-B)
a Itech tamachtilismej 31 hasta 33 kimelaua toni kijtosneki iTekiuajyo Dios.
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
