ISIFUNDO 16
UJesu Wenzani Ngesikhathi Esemhlabeni?
Abanye abantu bacabanga ukuthi uJesu ulusane, abanye bathi wayengumphrofethi ikanti abanye bathi yindoda nje eyafela abantu. Kodwa ukuhlola okwenziwa nguJesu ngesikhathi esemhlabeni kuzasifundisa okunengi ngaye. Esifundweni lesi sizaxoxa ngezinto eziqakathekileyo uJesu azenzayo lokuthi zingakunceda njani.
1. Yiwuphi umsebenzi oqakathekileyo uJesu ayewenza?
Umsebenzi oqakathekileyo uJesu ayewenza ‘ngowokutshumayela izindaba ezinhle zoMbuso kaNkulunkulu.’ (Bala uLukha 4:43.) Izindaba ezinhle ayezitshumayela zazimayelana lokuthi uNkulunkulu wayezabeka umbuso loba uhulumende ozaqeda zonke inhlupho zabantu. a UJesu wasebenza nzima okweminyaka emithathu lengxenye etshumayela izindaba ezinhle.—UMathewu 9:35.
2. Kungani uJesu wenza izimangaliso?
IBhayibhili lisitshela “ngemisebenzi emangalisayo lezimanga kanye lezibonakaliso [uNkulunkulu] azenza esebenzisa [uJesu].” (ImiSebenzi 2:22) UNkulunkulu wanika uJesu amandla okuthi athulise isiphepho, anike izinkulungwane zabantu ukudla, asilise abagulayo lokuthi avuse abafileyo. (UMathewu 8:23-27; 14:15-21; UMakho 6:56; ULukha 7:11-17) Izimangaliso lezi zakwenza kwacaca ukuthi uJesu wayethunywe nguNkulunkulu. Zaphinda zatshengisa lokuthi uJehova ulamandla okuqeda zonke inhlupho esilazo.
3. Indlela uJesu ayesenza ngayo isifundisani?
UJesu walalela uJehova kukho konke. (Bala uJohane 8:29.) Langesikhathi ephikiswa, waqhubeka esenza konke ayekutshelwe nguYise kwaze kwaba sekufeni kwakhe. Lokhu kwatshengisa ukuthi abantu bayenelisa ukuqhubeka bekhonza uNkulunkulu lanxa izimo zinzima. Yikho uJesu ‘wasitshiyela isibonelo ukuze siwalandele eduze amanyathelo akhe.’—1 UPhetro 2:21.
GEBHA UJULE
Engxenyeni le uzabona ukuthi uJesu wenzani ukuze atshumayele izindaba ezinhle. Uzafunda langezinye izimangaliso azenzayo.
4. UJesu watshumayela izindaba ezinhle
UJesu wayejayele ukuhamba umango omude edinga abantu abatshiyeneyo ukuze abatshumayeze. Bala uLukha 8:1 beselixoxa ngemibuzo elandelayo:
-
UJesu wayetshumayeza abantu ababemlanda kuphela yini?
-
Kuyini okwakusenziwa nguJesu ukuze athole abantu ayengabatshumayeza?
UNkulunkulu wakhuluma kusasele iminyaka eminengi ukuthi uMesiya wayezatshumayela izindaba ezinhle. Bala u-Isaya 61:1, 2 beselixoxa ngemibuzo le:
-
UJesu wasigcwalisa njani isiphrofetho lesi?
-
Ucabanga ukuthi abantu kumele batshelwe izindaba ezinhle yini lamuhla? Kungani usitsho njalo?
5. UJesu wafundisa abantu indlela okumele baphile ngayo
UJesu kazange afundise abantu ngoMbuso kaNkulunkulu kuphela kodwa wabafundisa lendlela okumele baphile ngayo. Ake sixoxe ngokunye akukhulumayo eNtshumayelweni yaseNtabeni. Bala uMathewu 6:14, 34 lo-7:12 beselixoxa ngemibuzo le:
-
Amavesi la asikhuthaza ukuthi senzeni?
-
Ubona angani amazwi la alokhu enceda yini lamuhla?
6. UJesu wenza izimangaliso
UJehova wanika uJesu amandla okwenza izimangaliso ezinengi. Bala uMakho 5:25-34 kumbe ubukele IVIDIYO ukuze ubone esinye isimangaliso asenzayo. Ngemva kwalokho xoxani ngemibuzo elandelayo.
-
Kuyini owesifazana owayegula ayengakuthandabuzi?
-
Kuyini okuthanda kakhulu ngesimangaliso lesi?
Bala uJohane 5:36 beselixoxa ngombuzo lo:
-
Izimangaliso ezenziwa nguJesu ‘zifakazani’ ngaye?
Ubukwazi yini?
Okunengi okumayelana loJesu kutholakala emabhukwini amane aseBhayibhilini abizwa ngokuthi ngamaVangeli. Amabhuku la nguMathewu, uMakho, uLukha loJohane. Abalobi bamaVangeli la babebhala izinto ezitshiyeneyo ngoJesu futhi konke abakubhalayo kwenza sizwisise ukuthi wayengumuntu onjani sibili.
-
UMATHEWU
nguye owaqala ukubhala iVangeli lakhe. Wabhala lokho uJesu ayekufundisa ikakhulu okuphathelane loMbuso kaNkulunkulu.
-
UMAKHO
wabhala iVangeli elifitshane kulawo wonke futhi ulandisa izinto ezenziwa nguJesu ngendlela ehlabusayo.
-
ULUKHA
wabhala okunengi ngokuthandaza langendlela uJesu ayephatha ngayo abesifazana.
-
UJOHANE
ulandisa ingxoxo uJesu aba lazo labangane bakhe kanye labanye abantu futhi lokhu kusinceda sizwisise okunengi ngobuntu bukaJesu.
ABANYE BATHI: “UJesu wayeyindoda ezilungeleyo nje.”
-
Wena uthini?
ISIFINQO
UJesu watshumayela ngoMbuso kaNkulunkulu, wenza izimangaliso njalo walalela uJehova kukho konke.
Ufundeni?
-
Yiwuphi umsebenzi oqakathekileyo uJesu awenza ngesikhathi esemhlabeni?
-
Izimangaliso ezenziwa nguJesu zitshengisani?
-
Yiziphi ezinye izinto uJesu azifundisa abantu?
THOLA OKUNENGI
Kuyini uJesu ayehlala ekhuluma ngakho?
“UMbuso KaNkulunkulu—Kungani Uqakathekile KuJesu?” (INqabayokulinda, October 1, 2014)
Bala isihloko lesi ukuze ubone okwenza sikholwe ukuthi izimangaliso zikaJesu zenzakala sibili.
“Izimangaliso Ezenziwa NguJesu Zisifundisani?” (INqabayokulinda, July 15, 2004)
Bala isihloko lesi uzwe ukuthi eyinye indoda yenzani ngemva kokufunda ukuthi uJesu wayelendaba labantu.
“Ngangingelandaba Labanye Abantu” (INqabayokulinda, October 1, 2014)
Bala ngezinto ezenziwa nguJesu ngokulandelana kwazo.
“Okuqakathekileyo Okwenzakala Empilweni KaJesu Esasemhlabeni” (IBhayibhili Elingcwele ISengezo A7)
a Sizafunda okunengi ngoMbuso kaNkulunkulu esifundweni 31-33.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
