CIJIJO 16
Jesu Wakaitenyi Paainga Ari Pasi Pano?
Vandhu vazinji pavanorangarira ngo pamusoro pa Jesu, ivona vanorangarira kuti iyena wainga cimwana, muporofeti anouzivi kana mundhu wainga wodakufa. Asi patinojija ngo pamusoro po upenyu hwa Jesu paainga pasi pano, tinovona kuti iyena wainga mundhu wakanaka kupinda izvi. Pa cijijo ici, tinozovona zviro zvimweni zvinosisira maningi zvakaithwa ndi Jesu. Tinozovonazve kuti zviro izvi zvingamupsasisa kudini mu upenyu hwenyu.
1. Ngorapi basa raisisira maningi rakaithwa ndi Jesu?
Basa raisisira maningi raiithwa ndi Jesu rainga ro “kuzivisa masoko akanaka o Umambo hwa Mwari.” (Verenganyi Ruka 4:43.) Masoko akanaka aicumaehwa ndi Jesu aibhuya ngo pamusoro po umambo, kana kuti utongi hwa Mwari unozopeja zvineso zvo vandhu vese. a Ko makore matatu no meya, Jesu wakashanda ngo simba kuti avhunje vandhu ngo pamusoro po masoko o vetero.—Mateu 9:35.
2. Ngenyi Jesu waiita mushamaiso?
Bhaibheri rinonanga maningi ngo “mabasa o simba, mushamaiso no zvitatijo zvakaithwa ndi Mwari [ecishandisa Jesu].” (Mabasa o Vapostori 2:22) Ngo simba raakapuwa ndi Mwari, Jesu wakakwanisa kuimisa mbhepo, kuhisa vandhu vakawanda, kurapa vanohwaja no kumusa vandhu vakafa. (Mateu 8:23-27; 14:15-21; Marko 6:56; Ruka 7:11-17) Mushamaiso ja Jesu jaitatija kamare kuti iyena wainga akatumwa ndi Mwari. Mushamaiso iji jakatatija kuti Jehovha ano simba rokupeja zvineso zvedu zvese.
3. Tinojijenyi ngo upenyu hwa Jesu?
Mukuvo wese Jesu waizwira Jehovha. (Verenganyi Johani 8:29.) Iyena wakaita izvi mu upenyu hwake hwese. Pikija paaisongana no kuteverehwa iyena wakakhombija kuti zvinokwanisika kuti vandhu vashandire Jehovha pikija vecisongana no zvineso. Ngo kuita izvi, Jesu wakasiya ‘muezaniso kuti tinase kutevera soka jake.’—1 Pedhru 2:21.
NASANYI KUPSAKISISA
Vonanyi kuti Jesu wakacumaeresa kudini masoko akanaka no kuita mushamaiso.
4. Jesu waicumaera masoko akanaka
Jesu wakafamba makirometro akawanda muzvitaka, no cinangwa co kucumaera masoko akanaka kuno vandhu vakawanda. Verenganyi Ruka 8:1, perapo bhuisananyi ngo muvhunjo iji:
-
Kureva kuti Jesu waicumaera basi masoko akanaka ku vandhu vaiviya kwaari?
-
Kuvangisira kwapi kwakaita Jesu kuti awane vandhu?
Mwari wainga akananga kuti Mesiya waizocumaera masoko akanaka. Verenganyi Isaia 61:1, 2, pakupera kuverenga vhesi iji, bhuisananyi ngo muvhunjo jinotevera:
-
Jesu wakakwanirisa kudini ciporofita ici?
-
Imwimwi munorangarira kuti vandhu nyamasi uno vanodadi kuzwa masoko akanaka?
5. Jesu wakajijisa cokwadi cinosisira maningi
Kusiyapo kucumaera masoko akanaka o Umambo hwa Mwari, Jesu wakapavo mbhangiro jinoshanda jo upenyu. Vonanyi muezaniso jimweni jaakananga paainga pa Dundhu ro Maorivhe. Verenganyi Mateu 6:14, 34 na 7:12, perapo bhuisananyi ngo muvhunjo jinotevera:
-
Ngo japi mbhangiro jakapa Jesu pa mavhesi aya?
-
Munorangarira kuti mbhangiro iji jingabeseravo vandhu nyamasi uno?
6. Jesu wakaita mushamaiso
Jesu wakapuwa simba ndi Jehovha kuti aite mushamaiso jakawanda. Vonanyi muezaniso umwe. Verenganyi Marko 5:25-34, kana rijanyi VHIDHIYO. Tevere bhuisananyi ngo muvhunjo jinotevera.
-
Pa vhidhiyo, tavona kuti mwanakaji uu wainga ecihwaja maningi, asi pikija zvakadaro iyena wainga no cokwadi cenyi?
-
Ngo zvapi zvamadakarira maningi pa mushamaiso uu?
Verenganyi Johani 5:36, perapo bhuisananyi ngo muvhunjo uwu:
-
Mushamaiso yakaithwa ndi Jesu yaikhombija ucapupu hwapi, kana kuti yaikhombijenyi ngo pamusoro pake?
Imwimwi maizviziva?
Zvese zvatinoziva ngo pamusoro pa Jesu zviri mu mabhuku o Bhaibheri. Mabhuku aya ndi Mateu, Marko, Ruka na Johani, iwona anodanijwazve kuti Mavhangeri. Mutari umwe nga umwe wo mabhuku aya, ano zvaakatara ngo pamusoro pa Jesu zvicizivi kutahwa ngo umweni. Patinobatanija zvese zvinonangwa mu mavhangeri aya, tinokwanisa kuvona upenyu hwa Jesu paainga ari pasi pano.
-
MATEU
Ndirona Vhangeri rakatanga kutahwa. Mondhomo tinowana jijiso jakawanda ja Jesu, maningi-ningi jijiso ngo pamusoro po Umambo hwa Mwari.
-
MARKO
Ndirona Vhangeri rakafupika. Irona rinobhuya ngo mushamaiso yakaithwa ndi Jesu.
-
RUKA
Anonanga kuti mukumbiro yaisisira maningi kuna Jesu, no matajihwe aiithwa vanakaji ndi Jesu.
-
JOHANI
Anonanga maningi ngo mabhuyo a Jesu no shamwari jake pamwepo no vandhu vamweni. Izvi zvinotibesera kuvona mugariro ja Jesu.
VANDHU VAMWENI VANOTI: “Jesu aacaingepi mwana wa Mwari, asi wainga mundhu wakanaka basi.”
-
Imwimwi munotivo kudini?
ZVOTAJIJA
Jesu wakacumaera ngo pamusoro po Umambo hwa Mwari, wakaita mushamaiso no kuzwira Jehovha mu zvese.
Kuhwirijira
-
Ngo rapi basa raisisira maningi ra Jesu paainga pasi pano?
-
Mushamaiso yakaita Jesu inotijijisenyi ngo pamusoro pake?
-
Ngo japi mbhangiro jakanaka jakapa Jesu?
ZIVANYI ZVIMWENI
Jesu waidakarira kubhuya ngo pamusoro penyi?
“Umambo hwaMwari —Kukosha Kwahunoita Kuna Jesu” (Murindiri, No. 1 wa Outubro wo 2014, Cishona)
Vonanyi kuti ngenyi tingathemba kuti mushamaiso ya Jesu, yakaitikadi kamare.
“Zvishamiso zvaJesu —Ungadzidzei?” (Murindiri, 15 ya Julho wo 2004, Cishona)
Verenganyi ngo pamusoro po mwanarume umweni wakacinja upenyu hwake, pasure po kujija kuti Jesu waitaja vandhu.
“Ndairarama Ndichingozvifunga Ini Pachangu” (Murindiri, No. 1 wa Outubro wo 2014, Cishona)
Vonanyi zviro zvakaita Jesu no manera ozvaizoitika.
a Zvijijo 31-33 zvinozobhuyazve ngo pamusoro po Umambo hwa Mwari.
