WANGƆ 16

Kwa mɛndó Yezo li na ngoi mɛndó lo ge lɛ sese nɛ?

Azi gba ndo hũ Yezo mabere bebe, bere prɔfeta kɔi mɛ wa ndara, ambanga hĩnga bo lo mɛ ba kwá tɛ lo. Kanda elengbi ti hĩngangɔ alo mɛ ba lo se e manda dungɔ lɛ ngɛ̃́ mɛndó lo na ni ge lɛ sese. Na ya wangɔ mɛ, e na bangɔ aye ti ngbondoni mɛndó Yezo li, e na hĩngangɔ nga nda mɛ ni lengbi ti zangɔ mɔ.

1. Kwa mɛndó du ngbondoni na ya dungɔ lɛ ngɛ̃́ tɛ Yezo nɛ?

Kwa mɛndó du ngbondoni na ya dungɔ lɛ ngɛ̃́ tɛ Yezo adu pangɔ “Nzɔ̃ Pa ti lo Lɛngɔ Gbia tɛ Nzapa.” (Di Luka 4:43.) Nzɔ̃ pa mɛndó lo ndo pa du ya Nzapa na kpãngɔ Lo Gbia bere guvɛrnɛma kɔi mɛ na onzingɔ pɛnɔ tɛ azi. a Yezo pandó nzɔ̃ pa niko na ge ge ge zu na ya bulu taa na ndambu.—Matie 9:35.

2. Nda mɛndó Yezo ndo li akpɛ̃nɛ nɛ?

Ngbangɔ tɛnɛ ya, “na lo nguru tɛ Nzapa ko, Yezo ali ndo aye ti kpɛnɛ, nga na akukunɛ ye” gba. (Awa Pangɔ Kwa 2:22) Na lége ti ngunu tɛ Nzapa ko, Yezo gbanzindó yá, lo hɛ̃ndó tɛ ti tɛngɔ hɛ̃ butu butu tɛ azi, lo sara awa ngã lo so ngandó na awa kinda. (Matie 8:23-27; 14:15-21; Marko 6:56; Luka 7:11-17) Aye ti kpɛ̃nɛ mɛndó Yezo ndo li afa ya Nzapa la to lo. Ni fa nga ya Yehova na ngunu ti onzingɔ pɛnɔ tɛ e zu.

3. Aye mɛ elengbi ti mandangɔ na ndo dungɔ lɛ ngɛ̃́ tɛ Yezo nɛ?

Yezo tɔndɔndó To lo tee ka kwá tɛ lo. Lo fa ya azi lengbi ti lingɔ kwa hɛ̃ Nzapa abɛse du ya ala ndo tengbi na kpengba lo. Afa ya Yezo ziando hɛ̃ e “Nzɔ̃ lɛ lo ya e la nda pa gɛrɛ lo nzɔ̃ni nvɛ̃ni.”—1 Petro 2:21, NWT.

GI HĨNGANGƆ LO MƐNDƐ̃

Gi hĩngangɔ se mɛndó Yezo ndo ha na nzɔ̃ pa nga na akpɛ̃nɛ mɛndó lo li.

4. Yezo lindó kwa ti pangɔ nzɔ̃ pa

Yezo dɔ̃ndó nɔ̃ akilomɛtrɛ gba na gɛrɛ lo na lége mɛ na butu gba ti nɛngɔ ya ni pa nzɔ̃ pa hɛ̃ azi. Di Luka 8:1, wa na pɛni hɛ̃ gbinya ti a hũnda olo mɛ:

Yezo ndo pandó nzɔ̃ pa bo hɛ̃ azi mɛndó ndo ga ka tɛ lo ya lo ha la na tɛnɛ?
Ge ge ge mɛndó Yezo ndo li ti nɛngɔ ya ni tengbi na azi nɛ?

Nzapa piandó tɛnɛ ya Mɛsia na pangɔ nzɔ̃ pa. Di Yisaya 61:1, 2, wa na pɛni hɛ̃ gbinya ti ahũnda olo mɛ:

Prɔfɛsi ni atindó na seni ka tɛ Yezo ngasia?
Mɔ da bɛ mɔ ya azi nga na gwɛ̃ ti mangɔ nzɔ̃ pa ndɛ?

5. Yezo handó bɛta tɛnɛ mɛ ngbondoni

Se e hã hangɔ nzɔ̃ pa ti Lo-lɛngɔ Gbia tɛ Nzapa e zi ko, Yezo ha ngandó tɛnɛ mɛ alengbi ti zangɔ nga e ndɛ. E ba andakisa ti atɛnɛ ni kaya diskur mɛndó lo li ka ndo lɛ ngomba. Di Matie 6:14, 34 nga na 7:12, wa na pɛni hɛ̃ gbinya ti ahũnda olo mɛ:

Wangɔ ti ngbondoni mɛ Yezo hɛ̃ so ya vɛrsɛ olo mɛ nɛ?
Mɔ da bɛ mɔ ya awangɔ niko alengbi nga ti zangɔ azi ndɛ?

6. Yezo lindó aye ti kpɛ̃nɛ

Yehova hɛ̃ndó Yezo ngunu ya lo li aye ti kpɛ̃nɛ gba. Ti nɛngɔ ya mɔ hũ kɔi ti akpale niko, di Marko 5:25-34 bere ba VIDEO. wa na pɛni hɛ̃ gbinya ti ahũnda olo mɛ.

VIDEO: Yesu abikisaki mwasi moko ya maladi (5:10)

Na ya video mɛ, tɛnɛ mɛndó wali mɛ na ngã ye lo ni na bɛ lo kɔi nɛ?
Ye mɛ gbɔ̃ bɛ mɔ na ya video mɛ nɛ?

Di Yoanɛ 5:36, wa na pɛni hɛ̃ gbinya ti hũnda olo mɛ:

Akpɛ̃nɛ mɛndó Yezo ndo li afa nɛ na lo tɛ lo nɛ?

Mɔ hĩnga ni?

Alo zu mɛ e hĩnga na ndo Yezo alo na ya mbɛti siɔ ti Evanzilɛ—Matie, Marko, Luka, nga na Yoanɛ. Awa sungɔ mbɛti niko zu atɛnɛ tɛnɛ ndɛ̃ ndɛ̃ ndɛ̃ mɛ ba Yezo. Se e hɛ̃ tɛrɛ e na dingɔ Aevanzilɛ niko zu, e na hĩngangɔ dungɔ lɛ ngɛ̃́ tɛ Yezo nzɔ̃ni.

MATIE

lo la du zo ti uzu ti sungɔ Evanzilɛ. Lo tɛnɛ tɛnɛ gba mɛ ba Lo-lɛngɔ Gbia tɛ Nzapa mɛndó Yezo ndo ha.
MARKO

Evanzilɛ mɛndó lo su dundo ndunu ni. Akambisa alo gba mɛ alengbi ti hɛ̃ngɔ e dengɔ bɛ.
LUKA

tɛnɛ tɛnɛ gba mɛ ba nda mɛndó lingɔ sambela ndo du ngbondoni ka tɛ Yezo nga se mɛndó lo ndo li na lo ka mbage tɛ awe.
YOANƐ

kambisa yangondo se mɛndó Yezo tɛnɛ na tɛnɛ hɛ̃ akwa lo nga na azi mɛndɛ̃. Lo za e ya e hĩnga se li ye tɛ Yezo nzɔ̃ni.

AZI MƐNDƐ̃ NDO TƐNƐ YA: “Yezo dundó nzɔ̃ zo, kanda ta lo du Mɛsia ma.”

Mɔ da bɛ mɔ ya nɛ?

NA NDUNU NI

Yezo pandó nzɔ̃ pa ti Lo-lɛngɔ Gbia tɛ Nzapa, lo lindó akpɛ̃nɛ wa lo tɔndɔ ngandó Yehova na ya lo zu.

Bozongeli

Kwa mɛndó Yezo kpã na ndo ti uzu na ya dungɔ lɛ ngɛ̃́ tɛ lo na ngoi mɛndó lo ge lɛ sese nɛ?
Aye ti kpɛ̃nɛ mɛndó Yezo li ndo fa nɛ?
Awangɔ ti nzɔ̃ni mɛndó Yezo ha nɛ?

Datɛ mɛ mɔ onzi na wangɔ mɛ:

Ye mɛ mɔ na lingɔ ni

Ba dramɛ ‘Nzambe akomisi ye Nkolo mpe Kristo’—Eteni II bere di Matie shapitre ti 5 tee 7 ti nɛngɔ ya mɔ hĩnga alo gba mɛ aba kwa mɛndó Yezo li ge lɛ sese.

Aye mɛndɛ̃:

Your other goal