TLAMACHTIJLI 16
¿Tlenon okichiuj Jesús ijkuak ouajlajka ipan tlaltikpaktli?
¿Tejua tlenon tikilnamiki ijkuak yakaj tlajtoua itech Jesús? Miyekej kilnamikij ijkuak yejua onemiko, sekimej kilnamikij kenijki okimiktijkej niman oksekimej kilnamikij kenijki melak kinpaleuiaya oksekimej. San ika, tla kuajli tomachtiaj itech tlen okichiuj ijkuak ouajlajka ipan tlaltikpaktli, más kuajli tikixmatiskej. Ipan yejuin tlamachtijli, tikitaskej tlenon okichiuj Jesús niman tleka melak kuajli tla tikmatij yejuin.
1. ¿Tlenon nochipa kichiuaya Jesús?
Jesús okijto ika yejua okiteijliko “on kuajli tlajtojli yejuan kiteijlia ken Dios temakixtia” (xkita Lucas 4:43). Jesús otemachti ika toTajtsin kitlaliskia se tekiuajyotl, noso se gobierno, tlen kipopolos nochi tlen techtlajyouiltia. a Yejua otenojnots yeyi xiuitl iuan tlajko niman ijkon miyekej makimatikan yejuin (Mateo 9:35).
2. ¿Tlenon techititiaj imilagros Jesús?
Biblia kijtoua ika, itechkopa Jesús, toTajtsin yokinchiuj miyek milagros niman okseki tlemach tlen melak temojkatlachialti (Hechos 2:22). ToTajtsin okipaleui Jesús miyekej makintlakualti, makitelti se ajakakiyaujtli, makinpajti akin kualouayaj niman hasta makinyoliti akin yomijkaj (Mateo 8:23-27; 14:15-21; Marcos 6:56; Lucas 7:11-17). Nochi yejon milagros techititiaj ika toTajtsin yejua akin okuajtitlanka Jesús. Niman noijki, techititiaj ika Jehová uelis kipopolos nochi tlen techtlajyouiltia.
3. ¿Tlenon tiuelij itech tlen okichiuj Jesús ijkuak ouajlajka ipan tlaltikpaktli?
Jesús nochipa okitlakamat Jehová (xkita Juan 8:29). Yejua nochipa okichiuj tlen iTajtsin okinauati maski miyekej kitlauelitayaj. Otechititi ika tejuamej noijki uelis tiktekichiuiliskej Jehová maski kemantika tikixnamikiskej tlen xkuajli. Jesús okichiuj “on tlen kuajli” niman ijkon tejuamej matikchiuakan ken yejua (1 Pedro 2:21).
OKSEKI XKASIKAMATI
Matikitakan kenijki Jesús kiteijliaya tlen toTajtsin kichiuas. Noijki matikitakan seki imilagros Jesús.
4. Jesús okiteijli tlen toTajtsin kichiuas
Jesús melak uejka nejnentinemiya niman kampa melak tlalpoktitlan pampa kinekiya kiteijlis tlen toTajtsin kichiuas. Xkitakan Lucas 8:1 niman xtlajtokan itech yejuin:
-
¿Jesús san kinnojnotsaya akin konitayaj?
-
¿Tlenon okichiuj Jesús niman ijkon kiteijlis tlen toTajtsin kichiuas?
ToTajtsin yokijtojka ika Mesías kiteijliskia tlen kualtsin nochiuas ika tlayekapan. Xkitakan Isaías 61:1, 2 niman xtlajtokan itech yejuin:
-
¿Kenijki okichiuj Jesús tlen kijtoua yejuin teotlajtojli?
-
¿Tiknemilia ika oksekimej noijki noneki makimatikan tlen toTajtsin kichiuas ika tlayekapan?
5. Jesús otemachti tlen melak tepaleui
Jesús xsan okiteijli tlen kualtsin kichiuas toTajtsin, noijki otemachti tlen techpaleuis kuajli matinemikan. Se tonajli, ijkuak Jesús nemiya ipan se tepetl, okiteijli tlen melak tepaleui. ¿Tlenon okijto? Xkitakan Mateo 6:14, 34 niman 7:12, niman xtlajtokan itech yejuin:
-
¿Tlenon otemachti Jesús ipan yejuin textos?
-
¿Tiknemilia ika ok tepaleui tlen otemachti Jesús?
6. Jesús okinchiuj miyek milagros
Jehová okipaleui Jesús niman ijkon makinchiua miyek milagros. Xkitakan Marcos 5:25-34 noso xkitakan VIDEO. Aman xtlajtokan itech yejuin:
-
Ken otikitakej ipan video, ¿tlenon kuajli kimatstoya yejon siuatsintli akin kualouaya?
-
¿Tlenon melak otikuelitak itech yejuin milagro?
Xkitakan Juan 5:36 niman xtlajtokan itech yejuin:
-
¿Tlenon techititiaj imilagros Jesús?
¿Tikmatiya yejuin?
Miyek tlen tikmatij itech Jesús ijkuiliujtika ipan naui libros tlen noixmatij ken Evangelios. Yejuin naui Evangelios okijkuilojkej Mateo, Marcos, Lucas niman Juan. Nochi tlen okijkuilojkej notlajtolnamiki niman techpaleuiya más kuajli matikixmatikan Jesús.
-
MATEO
okijkuilo kachtopa Evangelio. Miyekpa kiteneua tlen Jesús okijto itech iTekiuajyo toTajtsin niman itech okseki itlamachtiluan.
-
MARCOS
okijkuilo Evangelio tlen más pitentsin. Yejua techijlia miyek tlen kualtsin opanok ijkuak ouajlajka Jesús.
-
LUCAS
miyekpa kijtoua ika melak tepaleui tiknotsas toTajtsin. Niman noijki kijtoua kenijki Jesús okintlakaitak siuamej.
-
JUAN
techijlia kenijki katka Jesús. Yejua okijkuilo tlen Jesús okimijli iamigos niman akin imiuan ononojnots.
SEKIMEJ KIJTOUAJ: “Jesús yejua toTajtsin”.
-
¿Tejua tlenon tiknemilia?
TLEN OTIUEL
Jesús okiteijli tlen kichiuas iTekiuajyo toTajtsin, okinchiuj miyek milagros niman nochipa okitlakamat Jehová.
¿Kenon titlanankiliskia?
-
¿Tlenon nochipa kichiuaya Jesús?
-
¿Tlenon techititiaj imilagros Jesús?
-
Jesús otemachti tlen melak tepaleui, ¿uelis tikijtos tlenon otemachti?
OKSEKI XKITA
¿Itech tlenon tlajtouaya Jesús ijkuak tenojnotsaya?
Xkita tleka kuajli tikmatstokej ika imilagros Jesús melauak onochiujkej.
“¿Tlenon techmachtiaj imilagros Jesús?” (Amatl Tekakistilijketl, 15 de julio de 2004)
Se tlakatl melak okipaleui ijkuak okitak kenijki Jesús nochipa kinpaleuiaya oksekimej. Xkita tlenon opanok.
“Nejua melak ninoueyimatiya” (Amatl Tekakistilijketl, 1 de octubre de 2014)
Jesús okichiuj miyek tlemach ipan tlaltikpaktli. Xkita kemanon onochiuj yejon.
“Inemilis Jesús ipan tlaltikpaktli” (Tlen tepaleuiya timomachtis iTlajtol toTajtsin)
a Ipan tlamachtiltin 31 a 33 más titlajtoskej itech iTekiuajyo toTajtsin.
Puede que también le interese
TLEN MIYEKPA NOTLAJTOLTILO
¿Kenon nochiua ijkuak se kimachtiaj itech Biblia?
Ijkuak mitsmachtiskej iteixpantijkauan Jehová uelis tijkuis maski san katlejua Biblia. Uelis ompa nemiskej mochanejkauan noso moamigos.
