FAMAHAʼÖ 16
Hadia Manö Nifalua Yesu Me So Ia ba Gulidanö?
Ato zokhalaigö wa Yesu andrö ono sawuyu si lö faʼabölö, niha si lö ara tö mate mazui samösa samaʼeleʼö satua-tua. Hizaʼi, sindruhunia na tafahaʼö ita ba waö-waö Yesu me so ia ba gulidanö, oya zi tola aboto ba dödöda sanandrösa khönia. Ba wamahaʼö daʼa, tatutunö ösa hadia manö halöwö sabölö moguna nifalua Yesu me so ia ba gulidanö ba hadia lua-luania khöu.
1. Hadia halöwö Yesu sabölö iʼofönaiʼö?
Halöwö sabölö iʼofönaiʼö Yesu yaʼia daʼö ’manuriaigö turia somuso dödö sanandrösa ba Wamatörö Lowalangi’. (Baso Luka 4:43.) Ituriaigö wa so sambua wamatörö nifasindro Lowalangi mazui dadaoma waʼarazo si tola mangeheta abula dödö salua ba niha gulidanö. a Iforege wanuriaigö turia somuso dödö Yesu sagötö zi tölu fakhe a matonga.—Mataiʼo 9:35.
2. Hadia mbörö wa ifalua dandra sahöli-höli dödö Yesu?
Itutunö Sura Niʼamoniʼö ngawalö ’halöwö Lowalangi safönu faʼabölö, sahöli-höli dödö hegöi tandra’ nifalua Yesu. (Halöwö Zinenge 2:22) Börö waʼabölö si otarai Lowalangi, tola ifahono mbade Yesu, ibeʼe gö niha si ribu faʼato, ifadöhö zofökhö, ba mendrua manö tola isusugi niha si no mate. (Mataiʼo 8:23-27; 14:15-21; Mareko 6:56; Luka 7:11-17) Tandra sahöli-höli dödö andrö zamaduhuʼö wa nifatenge Lowalangi ia. Daʼö göi zangoromaʼö wa tola iheta gabula dödöda Yehowa.
3. Hadia zi tola tahalö khöda famahaʼö moroi ba lala waʼauri Yesu?
Gofu hadia zalua, lö iböhöli Yesu woloʼö oroisa Yehowa. (Baso Yohane 8:29.) Sagötö faʼaurinia ba gulidanö, lö faröi ia ba wamalua ohitö dödö Namania hewaʼae ato zanaisi. Ifaduhuʼö wa tola larorogö waʼalöfaröira niha gulidanö ba wamosumange Lowalangi hewaʼae oya gabula dödö salua khöra. Tobali, ’no iröi khöda duma-duma Yesu enaʼö tahaogö wanara lahenia’.—1 Fetero 2:21.
ODÖDÖGÖ NASA WANGALUI
Tatutunö dania hewisa wamalua Yesu halöwö fanuriaigö turia somuso dödö hegöi tandra sahöli-höli dödö.
4. Ituriaigö duria somuso dödö Yesu
Ngaotu kilometer lala si lö baga nitörö Yesu ba wamaʼema turia somuso dödö ba niha fefu. Baso Luka 8:1, ba beʼe wanema li ba wanofu-nofu daʼa:
-
Hadia ha ba niha si no owulo ba daʼö awai ituriaigö duria somuso dödö Yesu?
-
Hadia nifalua Yesu enaʼö tola falukha ia ba niha?
No ifaʼeleʼö Lowalangi wa ituriaigö duria somuso dödö Mesia. Baso Yesaya 61:1, 2, ba beʼe wanema li ba wanofu-nofu daʼa:
-
Hewisa wamaʼeleʼö daʼö alua ba waʼauri Yesu?
-
Moloʼö yaʼugö, hadia moguna göi ba niha iadaʼa larongo duria somuso dödö?
5. Oya wamahaʼö si tohude nitutunö Yesu
Baero wanuriaigö Yesu turia somuso dödö sanandrösa ba Wamatörö Lowalangi, ifaʼema göi mene-mene soguna ba niha. Enaʼö öʼila duma-dumania, nehegö huhuo nifaʼemania ba hili. Baso Mataiʼo 6:14, 34 hegöi 7:12, ba beʼe wanema li ba wanofu-nofu daʼa:
-
Hadia manö mene-mene nibeʼe Yesu ba ayati daʼa?
-
Moloʼö yaʼugö, hadia moguna nasa mene-mene daʼö iadaʼa?
6. Oya dandra sahöli-höli dödö nifalua Yesu
Yehowa zameʼe kuaso khö Yesu ba wamalua tandra sahöli-höli dödö. Enaʼö öʼila duma-dumania, baso Mareko 5:25-34 mazui futa VIDEO. Aefa daʼö, beʼe wanema li ba wanofu-nofu daʼa:
-
Ba video andrö mege, hadia zi faduhu dödö ndra alawe sofökhö andrö?
-
Hadia zadöni dödömö moroi ba dandra sahöli-höli dödö andrö?
Baso Yohane 5:36, ba beʼe wanema li ba wanofu daʼa:
-
Moroi ba dandra sahöli-höli dödö nifalua Yesu, hadia zi ’tefaduhuʼö’ sanandrösa khönia?
Hadia öʼila?
Arakhagö fefu waö-waö waʼauri Yesu, tesura ia ba zi öfa ngawua buku ba Zura Niʼamoniʼö nifotöi Injil. Buku si öfa ngawua andrö yaʼia daʼö Mataiʼo, Mareko, Luka, ba Yohane. Ero samösa sanura, so zi faböʼö nitutunöra sanandrösa khö Yesu. Börö daʼö, na tabaso fefu Injil awena tola tahalö rahu-rahu ba adöni dödöda ba waʼauri Yesu.
-
MATAIʼO
zi oföna manura Injilnia. Oya itutunö ba Injilnia sanandrösa ba wamahaʼö nifaʼema Yesu, mendrua manö saʼae wamahaʼö Yesu sanandrösa ba Wamatörö Lowalangi.
-
MAREKO
zanura Injil fondrege zadogo-dogo. Oya zalua nitutunönia ba daʼö sadöni dödöda ba si möi famarou dödö.
-
LUKA
zamatunö wa asese sibai mangandrö Yesu. Itutunö göi hewisa waʼasökhi dödö Yesu khö ndra alawe.
-
YOHANE
zabölö oya manura sanandrösa ba huhuo Yesu khö ndra si fahuwu khönia hegöi ba niha böʼö. Daʼa zanolo yaʼita enaʼö monönö waʼaboto ba dödöda hewisa gamuata Yesu andrö.
SO ZANGUMAʼÖ: ”Yesu andrö Lowalangi.”
-
Hewisa moloʼö yaʼugö?
RAHU-RAHU WAMAHAʼÖ
Manuriaigö Yesu sanandrösa ba Wamatörö Lowalangi, oya ifalua dandra sahöli-höli dödö, ba lö tebulö iʼoʼö li Yehowa gofu hadia zalua.
Hadia Wamahaʼö si Tola Öhalö?
-
Hadia halöwö Yesu sabölö iʼofönaiʼö sagötö feʼasonia ba gulidanö?
-
Hadia zi tefaduhuʼö moroi ba dandra sahöli-höli dödö nifalua Yesu?
-
Hadia manö wamahaʼö sabölö moguna nitutunö Yesu?
ALUI NASA DANÖ BÖʼÖ
Hadia zabölö oya ifatunö Yesu?
”Famatörö Lowalangi—Hadia Geluahania khö Yesu?”(Menara Pengawal, 1 Mbaŵa si Fulu 2014)
Hana wa faduhu dödöda wa sindruhu-ndruhu no alua fefu dandra sahöli-höli dödö nifalua Yesu?
Baso zalua khö zi samösa ira matua sadöni tödö me no iʼangerönusi nifalua Yesu me itehegö waʼaurinia.
”Ha Faʼaurigu Niʼera-eragu” (Menara Pengawal, 1 Mbaŵa si Fulu 2014)
Faigi tabel sangoromaʼö hadia manö halöwö nifalua Yesu sagötö feʼasonia ba gulidanö nifaʼoli moloʼö inötö faʼalua.
”Waö-Waö Waʼauri Yesu ba Gulidanö” (Buku Niʼamoniʼö Famoʼeluaha Gulidanö si Bohou, Lampiran A7)
a Ba Wamahaʼö 31-33 oya dania ba daʼö tafatunö sanandrösa ba Wamatörö Lowalangi.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
