ISIFUNDO 16

Khuyini UJesu Ayenzileko Nakasephasini?

IDLALE

Abantu abanengi bacabanga bona uJesu umntwana ongakghoni ukuzisiza, umphorofidi ohlakaniphileko namkha indoda efako. Kghani singafunda okungeziweko ngaye nasihlola ukuphila kwakhe kwephasini? Esifundwenesi, sizokufunda ngezinye izinto eziqakathekileko uJesu azenzileko nokuthi zikuthinta njani wena.

1. Ngimuphi umsebenzi oqakatheke khuluebewenziwa nguJesu?

Umsebenzi kaJesu oqakathekileko ‘bekukutjhumayela iindaba ezimnandi zomBuso kaZimu.’ (Funda uLukasi 4:43.) Bekatjhumayela iindaba ezimnandi zomBuso kaZimu bona umbuso namkha urhulumende lo uzokurarulula yoke imiraro yabantu. a Kwaphela iminyaka emithathu nesiquntu uJesu asebenza budisi, atjela abantu umlayezo okhuthazako.—Matewu 9:35.

2. Kubayini uJesu bekenza imikarisomraro?

IBhayibheli lihlathulula ‘imisebenzi yamandla neemangaliso neembonakaliso uZimu azenza [ngoJesu].’ (IzEnzo 2:22) UZimu wanikela uJesu amandla wokulawula ubujamo bezulu, wokupha iinkulungwana zabantu ukudla, wokwelapha abagulako ngitjho newokuvusa abahlongakeleko. (Matewu 8:23-27; 14:15-21; Markosi 6:56; Lukasi 7:11-17) Imikarisomraro eyenziwe nguJesu itjengisa kuhle ukuthi bekathunyelwe nguZimu nokuthi uJehova unamandla wokurarulula yoke imirarwethu.

3. Khuyini esingayifunda endleleni uJesuebekaphila ngayo?

UJesu walalela uJehova kiyo yoke into. (Funda uJwanisi 8:29.) Ngitjho naphezu kokuhlunguphazwa, ngokuthembeka uJesu wenza koke uYise ambawe bona akwenze bekwaba sekufeni. Watjengisa bona kuyakghonakala ukuthi abantu balotjhe uZimu, ngitjho nebujamweni obubudisi. Ngokwenza njalo, uJesu ‘wasitjhiyela isibonelo sokobana silandele umtlhalakhe eduze.’—1 Pitrosi 2:21.

FUNDA NGOKUNGENELELEKO

Funda ngendlela uJesu ebekatjhumayela ngayo iindaba ezimnandi nangemikarisomraro ayenzileko.

4. UJesu watjhumayelaiindaba ezimnandi

UJesu ukhambe amabanga amade eendleleni ezinethuli, atjhumayela iindaba ezimnandi ebantwini abanengi khulu. Funda uLukasi 8:1, bese nicoca ngemibuzo le:

Kghani uJesu bekatjhumayeza kwaphela abantu ebebahlangene bona bamlalele?
Ngimiphi imizamo uJesu ayenzileko ukufumana abantu?

UZimu wabikezela bona uMesiya uzokutjhumayela iindaba ezimnandi. Funda u-Isaya 61:1, 2, bese nicoca ngemibuzo le:

UJesu wasizalisa njani isiphorofidwesi?
Ucabanga ukuthi abantu namhlanjesi kufuze bezwe ngeendaba ezimnandezi?

5. UJesu ufundise amaqiniso aqakathekileko

Ngaphezu kokutjhumayela iindaba ezimnandi zomBuso kaZimu, uJesu wabuye wafundisa iimfundo esingazisebenzisa. Akhe sicoce ngeembonelo ezimbalwa zeTjumayelo yeNtabeni eyaziwako. Funda uMatewu 6:14, 34 no-7:12, bese nicoca ngemibuzo le:

Ngiziphi iimfundo uJesu azifundisako emavesini la?
Kghani isiyeleliswesi singabasiza abantu namhlanjesi?

6. UJesu wenza imikarisomraro

UJehova wanikela uJesu amandla wokwenza imikarisomraro eminengi. Bona ufumane isibonelo salokho, funda uMarkosi 5:25-34 namkha dlala IVIDIYO. Bese nicoca ngemibuzo elandelako.

IVIDIYO: Umma Ogulako Uyalatjhwa (5:10)

Evidiyweni le, umma ogulako bekakholelwa ini?
Khuyini oyithandako ngekarisomraro le?

Funda uJwanisi 5:36, bese nicoca ngombuzo lo:

Imikarisomraro eyenziwe nguJesu ‘ifakazela’ ini ngaye?

Kghani bewazi?

Okunengi esikwaziko ngoJesu kuvela eencwadini ezine eziseBhayibhelini ezibizwa ngokuthi maVangeli, okunguMatewu, uMarkosi, uLukasi noJwanisi. Ngamunye wabatloli bamaVangeli la, watlola imininingwana ehlukileko ngoJesu. Imininingwana le nayihlangana yoke, inikela isithombe esikarisako ngokuphila kwakhe.

UMATEWU

watlola iVangeli lakhe kokuthoma. Likhuluma ngeemfundiso zakaJesu, khulukhulu lokho uJesu ebekafundisa ngakho malungana nomBuso kaZimu.
UMARKOSI

watlola iVangeli elincani ukuwadlula woke. Likhuluma ngezehlakalo ezikarisako.
ULUKASI

ukhuluma ngendlela umthandazo ebewuqakatheke ngayo kuJesu nendlela enomusa ebekaphatha ngayo abantu bengubo.
UJWANISI

ukhuluma ngobuntu bakaJesu ngokuveza iindaba ebekazicoca nabangani bakhe nabanye abantu.