ƐZUKOALƐDEƐ 16

Duzu A Gyisɛse Yɛle Wɔ Azɛlɛ Ye Azo A?

BƆ

Menli dɔɔnwo bu Gyisɛse kɛ adɔma mɔɔ ɛngola ɛnyɛ ɛhwee, ngapezonli mɔɔ ze nrɛlɛbɛ, anzɛɛ nrenyia bie mɔɔ ɛlɛwu la. Noko asoo yɛbahola yɛanlea ɛbɛla mɔɔ ɔbɔle ye wɔ azɛlɛ ye azo la na yɛazukoa ɔ nwo ninyɛne dɔɔnwo ɔ? Wɔ ɛzukoalɛdeɛ ɛhye anu, yɛbazukoa ninyɛne mɔɔ hyia kpalɛ mɔɔ Gyisɛse yɛle la bie mɔ nee kɛzi ɔbaboa wɔ la.

1. Gyima titili boni a Gyisɛse yɛle a?

Ɛnee Gyisɛse gyima titili a le kɛ “[ɔbabɔ] Nyamenle Belemgbunlililɛ ne anwo edwɛkpa ne nolo.” (Kenga Luku 4:43.) Ɔbɔle edwɛkpa mɔɔ kile kɛ Nyamenle bava belemgbunlililɛ anzɛɛ arane bie azie ɛkɛ mɔɔ ɔbali alesama ngyegyelɛ kɔsɔɔti anwo gyima la anwo nolo. a Gyisɛse vale ɛvolɛ nsa nee foa bɔle mɔdenle hanle edwɛkɛ ɛhye mɔɔ yɛ anyelielɛ la.—Mateyu 9:35.

2. Duzu ati a Gyisɛse yɛle nwanwane ninyɛne a?

Baebolo ne ka kɛ ‘Nyamenle luale Gyisɛse anwo zo lile gyima mgbole na ɔyɛle nwanwane ninyɛne nee sɛkɛlɛneɛ ngakyile dɔɔnwo.’ (Gyima ne 2:22) Ɔlua Nyamenle tumi zo Gyisɛse maanle ahumu gyakyile ɛdulɛ, ɔmaanle menli dɔɔnwo aleɛ, ɔyɛle wuliravolɛma ayile na bɔbɔ ɔdwazole mowuamra ɔrale ngoane nu. (Mateyu 8:23-27; 14:15-21; Maake 6:56; Luku 7:11-17) Nwanwane ninyɛne mɔɔ Gyisɛse yɛle la maanle ɔlale ali kɛ Nyamenle a zoanle ye a. Eza ɔkile kɛ Gyihova kola fa ye tumi ne di yɛ ngyegyelɛ kɔsɔɔti anwo gyima.

3. Duzu a yɛsukoa yɛfi kɛzi Gyisɛse bɔle ye ɛbɛla la anu a?

Gyisɛse diele Gyihova wɔ tɛnlabelɛ biala anu. (Kenga Dwɔn 8:29.) Ɔnva nwo kɛ Gyisɛse yiale dwazotia la, ɔvale nɔhalɛlilɛ ɔyɛle mɔɔ ye Papa hanle kɛ ɔyɛ la too ɔhɔle ewule nu. Ɔmaanle ɔlale ali kɛ alesama bahola azonle Nyamenle wɔ tɛnlabelɛ mɔɔ anu yɛ se bɔbɔ la anu. Ɛhye ati, Gyisɛse gyakyile ‘neazo maanle yɛ kɛ yɛli ɔ gyakɛ anzi kpalɛ.’—1 Pita 2:21.

SUKOA DƆƆNWO

Nea kɛzi Gyisɛse bɔle edwɛkpa ne nolo na ɔyɛle nwanwane ninyɛne la.

4. Gyisɛse bɔle edwɛkpa ne nolo

Gyisɛse luale adenle mɔɔ munlutu wɔ zo la dɔɔnwo azo hɔbɔle edwɛkpa ne nolo hilele menli dɔɔnwo. Kenga Luku 8:1, na akee bɛzuzu kpuya ɛhye mɔ anwo:

Asoo menli mɔɔ rayiale kɛ bɛtie Gyisɛse la ala a ɔhanle edwɛkɛ ne bie ɔhilele bɛ a?
Mɔdenle boni a Gyisɛse bɔle kpondɛle menli a?

Nyamenle hanle dole ɛkɛ ne kɛ Mɛzaya ne babɔ edwɛkpa ne nolo. Kenga Ayezaya 61:1, 2, na akee bɛzuzu kpuya ɛhye mɔ anwo:

Kɛzi Gyisɛse maanle ngapezo ɛhye rale nu ɛ?
Ɛnea a ɔwɔ kɛ menli te edwɛkpa ɛhye ɛnɛ ɔ?

5. Gyisɛse hilehilele ninyɛne mgbalɛ

Gyisɛse bɔle Nyamenle Belemgbunlililɛ ne anwo edwɛkpa ne nolo na eza ɔhilehilele ninyɛne dɔɔnwo mɔɔ nvasoɛ wɔ zo la. Nea nwolɛ neazo ekyi wɔ Boka Zo Ɛdendɛlɛ ne mɔɔ ɛlie duma la anu. Kenga Mateyu 6:14, 34, yɛɛ 7:12, na akee bɛzuzu kpuya ɛhye mɔ anwo:

Folɛ kpalɛ boni a Gyisɛse dule wɔ tɛkese ɛhye mɔ anu a?
Ɛnea a folɛdulɛ ɛhye bahola aboa menli ɛnɛ ɔ?

6. Gyisɛse yɛle nwanwane ninyɛne

Gyihova maanle Gyisɛse tumi ɔmaanle ɔyɛle nwanwane ninyɛne dɔɔnwo. Amaa wɔanwu nuhua ko la, kenga Maake 5:25-34 anzɛɛ ye VIDIO ne. Akee bɛzuzu kpuya ɛhye mɔ anwo.

VIDIO: Bɛyɛle Raalɛ Bie Mɔɔ Ɔnde Kpɔkɛ La Ayile (5:10)

Wɔ vidio ne anu, duzu a ɛnee raalɛ ne die di a?
Duzu a ɛ nye die nwo wɔ nwanwane deɛ ɛhye anwo a?

Kenga Dwɔn 5:36, na akee bɛzuzu kpuya ɛhye anwo:

Duzu a Gyisɛse nwanwane ninyɛne ne mɔ ‘di nwolɛ daselɛ’ anzɛɛ maa ɔda ali wɔ ɔ nwo a?

Asoo ɛze?

Gyisɛse anwo edwɛkɛ dɔɔnwo mɔɔ yɛze la wɔ Baebolo mbuluku nna ne mɔɔ bɛfɛlɛ ye Edwɛkpa ne la anu—Mateyu, Maake, Luku yɛɛ Dwɔn. Edwɛkpa ne kɛlɛvolɛ ko biala hanle Gyisɛse anwo edwɛkɛ bie mɔ mɔɔ le ngakyile la. Saa yɛka edwɛkɛ ɛhye mɔ yɛbɔ nu a, yɛnwu Gyisɛse ɛbɛlabɔlɛ nwo edwɛkɛ mɔɔ yɛ anyelielɛ la.

MATEYU

a limoale hɛlɛle ye Edwɛkpa ne a. Ɔka Gyisɛse ngilehilelɛ ne anwo edwɛkɛ dɔɔnwo, titili mɔɔ fale Nyamenle Belemgbunlililɛ ne anwo la.
MAAKE

a hɛlɛle Edwɛkpa mɔɔ le ezinra kpalɛ a. Ɔka ninyɛne dɔɔnwo mɔɔ yɛ anyelielɛ la anwo edwɛkɛ.
LUKU

hanle asɔneyɛlɛ nee kɛzi Gyisɛse nee mraalɛ lile la anwo edwɛkɛ titili.
DWƆN

hanle adwelie mɔɔ Gyisɛse nee ɔ gɔnwo mɔ mɔɔ bikye ye yɛɛ awie mɔ lile la anwo edwɛkɛ na ɔmaa yɛnwu subane mɔɔ Gyisɛse lɛ la.

BIE MƆ KA KƐ: “Ɛnee Gyisɛse le sonlakpalɛ, noko tɛ yemɔ a le Mɛzaya ne.”

Kɛzi ɛnwu ye ɛ?

EDWƐKƐ TITILI

Gyisɛse bɔle Nyamenle Belemgbunlililɛ ne nolo, ɔyɛle nwanwane ninyɛne, na ɔdiele Gyihova wɔ tɛnlabelɛ biala anu.

Ndinu

Gyima titili boni a Gyisɛse yɛle ye wɔ azɛlɛ ye azo a?
Duzu a Gyisɛse nwanwane ninyɛne ne mɔ maa ɔda ali a?
Ninyɛne mɔɔ nvasoɛ wɔ zo la boni mɔ a Gyisɛse hilehilele a?

Yɛwiele ɛzukoalɛdeɛ ne wɔ:

Bodane

Nea drama ‘Yemɔ Ala Yɛɛ Nyamenle Ɛyɛ Ye Awulae Nee Mɛzaya A’—Foa II anzɛɛ kenga Mateyu tile 5 kɔdwu 7 na sukoa Gyisɛse ɛzonlenlɛ gyima ne anwo ninyɛne dɔɔnwo.

Bodane gyɛne:

Your other goal

KPONDƐ DƆƆNWO

Duzu a Gyisɛse hanle nwolɛ edwɛkɛ dɔɔnwo a?

“Nyamenle Belemgbunlililɛ—Deɛmɔti Ɔhyia Gyisɛse La” (Ɛzinzalɛ Arane, October 1, 2014)

Nea deɛmɔti yɛbahola yɛalie yɛali kɛ nwanwane ninyɛne mɔɔ Gyisɛse yɛle la le nɔhalɛ la.

“Gyisɛse Nwanwane Ninyɛne Ne Mɔ—Duzu A Yɛsukoa Yɛfi Nu A?” (Ɛzinzalɛ Arane, July 15, 2004)

Kenga kɛzi adenle mɔɔ Gyisɛse luale zo nee menli lile la hakyile nrenyia bie ɛbɛlabɔlɛ la.

“Ɛnee Me Nwo Ala A Medwenle A” (Ɛzinzalɛ Arane, October 1, 2014)

Nea ninyɛne titili mɔɔ sisile Gyisɛse ɛzonlenlɛ gyima ne anu mɔɔ bɛhyehyɛ la.

“Ninyɛne Titili Mɔɔ Sisile Gyisɛse Ɛbɛlabɔlɛ Nu La” (Ngɛlɛlera Nwuanzanwuanza—Ewiade Fofolɛ Ngilebɛbo, Mokanwo A7)

a Ɛzukoalɛdeɛ 31-33 baha Nyamenle Belemgbunlililɛ ne anwo edwɛkɛ dɔɔnwo.

Bie A Eza Ɛ Nye Balie

KPUYA MƆƆ MENLI TA BIZA

Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?

Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.

NYIA ANYELIELƐ DAHUU!—SUKOA BAEBOLO NE