Xi ngüʼu̱ yu̱ jäʼi pädi o xi ʼyo̱de nangeʼä Jesús, pe̱ ʼbu̱ʼu̱ ho̱ntho pädi nuʼä bi thoʼbu̱ mi nʼue̱re, ʼbu̱ʼu̱ miʼra ëna ge nuʼä Jesús mi profeta, ʼne kextä ʼbu̱ʼu̱ yu̱ jäʼi ge ho̱ntho mbëni o pädi nuʼä bi thoʼbu̱ mi dü. Pe̱ nuʼbu̱ gä nxa̱hmu̱ xi nho nangeʼä Jesús, gä pähmu̱ ga̱ʼtho nuʼä bi ʼyo̱ʼte. Nuna nxa̱di jaua gä pähmu̱ nangeʼu̱ ʼra yu̱ nʼto̱ʼteʼä Jesús ge emme jaʼtse̱di ʼne gä pähmu̱ ʼbe̱pu̱ bi ze̱kju̱ʼä bi ʼyo̱ʼte.

1. ¿Ndaʼä ra ʼbe̱fi manʼna emme jaʼtse̱di bi ʼyo̱ʼtä Jesús?

Pa nangeʼä Jesús nuʼä thogi mi jaʼtse̱di geʼä ge dä xihyu̱ jäʼi nangeʼu̱ yu̱ hogä nhma nange ra ʼTsu̱ʼtabi Ojä (dä mi nu Lucas 4:43). Nuʼä, bi xiʼu̱ yu̱ jäʼi ge nuʼä Ojä dä ʼyëxä ʼna ra ʼtsu̱ʼtabi ge dä juadi ga̱ʼthoʼu̱ yu̱ nʼtso jaua ja Ha̱i. a Nuʼä Jesús hñu je̱ya made bi predika ʼne bi xiʼu̱ yu̱ jäʼi nangeʼä ra ʼTsu̱ʼtabi Ojä (Mateo 9:35).

2. ¿ʼBe̱ʼä bi ʼyüʼu̱ yu̱ milagro bi ʼyo̱ʼtä Jesús?

Nubu̱ Biblia ma ge nuʼä Jesús “bi ʼyo̱tyu̱ nʼto̱ʼte nuixte nange na ʼtse̱di Ojä, ʼne yu̱ nhyonya nʼto̱ʼte, ʼne yu̱ hmepia” (Hechos 2:22). Nangeʼä ra ʼtse̱diʼä Ojä nuʼä Jesús bi za̱ bi zänhmi ʼna ra däʼye, bi ʼüini mahuähitho yu̱ jäʼi, bi ʼyo̱theʼu̱ mi u̱ ʼne bi xoxi ʼraʼu̱ xi dü (Mateo 8:23-27; 14:15-21; Marcos 6:56; Lucas 7:11-17). Nuʼu̱ yu̱ milagro bi ʼyo̱ʼtä Jesús bi ʼyüdi ge geʼä Ojä bä pe̱hnua Ha̱i. ʼNe kextä nuʼä bi ʼyo̱ʼtä, bi ʼyüdi ge nuʼä Jeoba ja ra ʼtse̱di pa dä juadi o dä ʼueke ga̱ʼthoʼu̱ yu̱ nʼtso jaua Ha̱i.

3. ¿ʼBe̱ʼä ürkähu̱ nuʼä ga̱ʼthoʼä bi ʼyo̱ʼtä Jesús nuʼbu̱ mi nʼyoua Ha̱i?

Nuʼä Jesús nzäntho bi ʼyo̱ʼte nuʼä bi xiʼä Jeoba (dä mi nu Juan 8:29). Nuʼä njämʼbu̱ bi zoʼä na Ta, nzäntho bi ʼyo̱ʼte ga̱ʼthoʼä bi xifi, madägeʼä ʼbu̱ʼu̱ bi hye̱kpi ʼne bi zu̱i ge dä ʼyo̱rpä na pa̱ha̱ʼä Ojä. ʼNe ngübu̱ bi ʼyüdi ge ga̱ʼthogähu̱ dä za̱ nzäntho gä o̱rpähu̱ na pa̱ha̱ʼä Ojä, madägeʼä di thohmu̱ yu̱ hëi. ʼNe ngübu̱ nuʼä Jesús “bi ʼyürkähu̱ ʼbe̱ʼä gä o̱thu̱”, bi zokpä na hogä ejemplo nuʼu̱ toʼo̱ majuäni ne dä de̱nnä (1 Pedro 2:21).

 6. Nuʼä Jesús bi ʼyo̱tyu̱ milagro

Nuʼä Jeoba bi ünna ʼtse̱diʼä Jesús pa dä za̱ dä ʼyo̱ʼte xi ngü yu̱ milagro. Gä nuhu̱ ʼna ejemplo, dä mi nuui Marcos 5:25-34 o dä mi nuui ä BIDEO. ʼNe mʼbe̱fa manhmi nangehna:

• Nangeʼä gä hyandbu̱ ja bideo, ¿ʼbe̱ʼä mi ka̱mfëni ʼna xisu ge mi ja ʼna ra nʼu̱?

• ¿ʼBe̱ʼä manʼna gi numanho nangeʼä milagro bi ʼyo̱ʼtä Jesús?

Dä mi nuui Juan 5:36 ʼne manhmi nangehna:

• ¿ʼBe̱ʼä ürkähu̱ʼu̱ yu̱ milagro bi ʼyo̱ʼtä Jesús?

NUʼÄ MANʼNA JAʼTSE̱DI

Nuʼä Jesús bi predika nangeʼä ra ʼTsu̱ʼtabi Ojä, bi ʼyo̱ʼte yu̱ milagro ʼne nzäntho bi ʼyo̱ʼte nuʼä bi xiʼä na Ta Jeoba.

Nuʼä dä pähmu̱

• ¿Ndaʼä ra ʼbe̱fi manʼna emme jaʼtse̱di bi ʼyo̱ʼtä Jesús nuʼbu̱ mi mʼbu̱kua Ha̱i?

• ¿ʼBe̱ʼä bi ʼyüʼu̱ yu̱ milagro bi ʼyo̱ʼtä Jesús?

• ¿ʼBe̱ʼä ma hogä nʼtsofo bi ʼyüʼä Jesús?