LEKSION 16
Antoy Ginawa nen Jesus nen Wadia ed Dalin?
No iisipen na dakel si Jesus, say naiimadyin da et sakey ya anggapoy kalaban-laban ya baby, marunong ya propeta, odino manpapanabos ya too. Pero, anto ni ray naaralan tayo tungkol ed sikato no amtaen tayo so impanbilay to diad dalin? Diad sayan leksion, pantongtongan ta so arum ed saray sankaimportantian ya ginawa nen Jesus tan no antoy epekto na saratan ed sika.
1. Antoy sankaimportantian ya kimey nen Jesus?
Ginawa nen Jesus so sankaimportantian ya kimey ya “iyabawag ed arum . . . so maong a balita na Panarian na Dios.” (Basaen so Lucas 4:43.) Impulong to so maong a balita ya say Dios et manggawa na panarian odino gobierno ya solusyon ed amin ya problema na totoo. a Makulikuli ya impaamta nen Jesus iyan makapabiskeg ya mensahe diad loob na talora tan kapalduan taon.—Mateo 9:35.
2. Akin et nanggawa na saray milagro si Jesus?
Dakel so nabasa ed Biblia ya “makapanyari iran gawa tan saray pakelaw tan saray tanda a ginawa na Dios . . . diad panamegley [nen Jesus].” (Gawa 2:22) Lapud pakapanyari na Dios, apatunda nen Jesus so bagyo, pinakan to ray nilibo, pinaabig to ray mansasakit, tan binilay to ni ingen iray inaatey. (Mateo 8:23-27; 14:15-21; Marcos 6:56; Lucas 7:11-17) Malinew ya saray milagron ginawa nen Jesus et ebidensya ya sikatoy imbaki na Dios. Ipapanengneng met na saratan ya walay pakapanyari nen Jehova ya solusyonan so amin ya problema tayo.
3. Antoy naaralan tayo ed paraan na impanbilay nen Jesus?
Inunor nen Jesus si Jehova diad amin ya situasyon. (Basaen so Juan 8:29.) Anggano wala ray onkokontra, matoor si Jesus ed Ama to. Inunor toy amin ya impagawa na Dios anggad impatey to. Impanengneng to ya nasarag na too so manlingkor ed Dios anggan diad mairap iran situasyon. Kanian, angitilak si Jesus na “pangaligan [tayo] pian maapit [tayon] tumboken iray bakat to.”—1 Pedro 2:21.
DAKEL NI NAARALAN MO
Amtaen no panon ya impulong nen Jesus so maong a balita tan nanggawa na saray milagro.
4. Impaamta nen Jesus so maong a balita
Pian nipasabi so maong a balita ed dakel ya totoo, ararawi so inakar nen Jesus tan marabok ni so dalan. Basaen so Lucas 8:1, insan ebatan iraya:
-
Kasin say pinulongan labat nen Jesus et saray totoon inmaasingger ed sikato?
-
Antoy ginawa nen Jesus pian naalmo iray totoo?
Abayag lan imbaga na Dios ya ipaamta na Mesias so maong a balita. Basaen so Isaias 61:1, 2, insan ebatan iraya:
-
Panon ya sinumpal nen Jesus iyan propesiya?
-
Parad sika, kailangan kasi na totoo natan ya naamtaan iyan maong a balita?
5. Imbangat nen Jesus iray importantin leksion
Aglabat impulong nen Jesus so maong a balita tungkol ed Panarian na Dios. Wala ray imbangat to met ya praktikal iran leksion. Nia ray pigaran alimbawa diad samay kabkabat ya paliwawa odino Sermon to ed Palandey. Basaen so Mateo 6:14, 34, tan 7:12, insan ebatan iraya:
-
Diad sarayan bersikulo, anto ray praktikal ya bilin nen Jesus?
-
Parad sika, makatulong ni kasi irayan bilin?
6. Nanggawa si Jesus na saray milagro
Inikdan nen Jehova si Jesus na pakapanyari pian makagawa na dakel ya milagro. Pian nanengneng so sakey ya alimbawa, basaen so Marcos 5:25-34 odino i-play so VIDEO. Insan ebatan iraya.
-
Diad video, antoy panisiaan na samay biin mansasakit?
-
Antoy panbiliban mo ed sayan milagro?
Basaen so Juan 5:36, insan ebatan iya:
-
Anto so ‘pinaneknekan’ odino pinatunayan na saray milagro nen Jesus?
Kasin antam?
Halos amin ya amta tayo ed si Jesus et abasa tayo ed apatiran libro na Biblia ya tatawagen ya Ebanghelyo—say Mateo, Marcos, Lucas, tan Juan. Nanduruman detalye tungkol ed si Jesus so impaamta na saray nansulat ed Ebanghelyo. No basaen tayo irayan apatiran libro, naimadyin tayo so makapadinayew ya impanbilay nen Jesus.
-
MATEO
Sikato so unaan ya angisulat ed Ebanghelyo. Nabasa ditan iray imbangat nen Jesus, lalo lay tungkol ed Panarian na Dios.
-
MARCOS
Say Ebanghelyo to so sankatikeyan. Balet mabilabilay, makapainteres, tan maaksion.
-
LUCAS
Nabasa ed Ebanghelyo to ya importante ed si Jesus so pikakasi, tan no panon so impantrato to ed saray bibii.
-
JUAN
Impaamta to no anto ray imbaga nen Jesus ed saray kakaaro to tan ed arum. Makatulong itan pian naamtaan tayo so personalidad nen Jesus.
IBABAGA NA ARUM: “Ta maong labat a too si Jesus, aliwan Mesias.”
-
Antoy nibagam?
SUMARYO
Impulong nen Jesus so Panarian na Dios, nanggawa na saray milagro, tan inunor to si Jehova diad amin a situasyon.
Rebyu
-
Anto so sankaimportantian ya kimey nen Jesus nen wadia ed dalin?
-
Antoy ipapanengneng odino papaneknekan na saray milagro nen Jesus?
-
Anto ran praktikal a leksion so imbangat nen Jesus?
DISKOBRIEN
Antoy bungay sangi nen Jesus no manbabangat?
Amtaen no akin ya segurado tayo ya talagan agawa iray milagro nen Jesus.
“Saray Milagro nen Jesus—Anto so Naaralan Mo?” (Say Panag-bantayan, Hulyo 15, 2004)
Basaen no panon ya anguman so bilay na sakey ya laki nen naaralan to ya masakripisyo si Jesus.
“Sarilik Labat so Inisip Ko” (Say Panag-bantayan, Nobyembre–Disyembre 2014)
Nengnengen iray nantutumbokan ya ginawa nen Jesus legan na ministeryo to.
a Mas detalyadon pantongtongan ed Leksion 31-33 so Panarian na Dios.
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
