LESON 16
Wat Nao Jesus Duim Taem Hem Stap lo Earth?
Lo tingting blo staka pipol, Jesus hem wanfala baby, wise profet, or man wea redi for dae. Bat hao, iumi savve lanem samfala samting moa abaotem Jesus from laef blo hem taem hem stap lo earth bifor? Lo disfala leson, bae iumi storyim samfala barava important samting wea Jesus duim and hao datwan savve helpem iu.
1. Wat nao important waka wea Jesus duim?
Main waka wea Jesus duim nao hem for “talemaot gud nius abaotem Kingdom bilong God.” (Readim Luke 4:43.) Gud nius wea hem talemaot hem abaotem Kingdom, or gavman wea God nao bae startim wea bae stretem evri problem blo iumi olketa man. a Jesus waka hard for talemaot disfala message wea encouragem pipol for thri and haf years.—Matthew 9:35.
2. Why nao Jesus duim olketa mirakol?
Bible sei “God . . . iusim Jesus for duim olketa mirakol, olketa spesol samting, and olketa saen.” (Acts 2:22) God givim paoa lo Jesus for kontrolem weather, feedim staka thousand pipol, healim olketa wea sik, and mekem olketa wea dae for laef bak tu. (Matthew 8:23-27; 14:15-21; Mark 6:56; Luke 7:11-17) Olketa mirakol wea Jesus duim showim God nao sendem hem kam. Olketa mirakol hia showim tu Jehovah garem paoa for stretem evri problem blo iumi.
3. Wat nao iumi savve lanem from example blo Jesus?
Jesus obeyim Jehovah nomata lo taem wea hem isi or hem hard. (Readim John 8:29.) Nomata pipol againstim Jesus, hem faithful for duim evri samting wea Dadi blo hem askem hem for duim go kasem taem hem dae. Samting wea Jesus duim showim iumi olketa man savve faithful for worshipim God nomata lo taem wea hem hard. So, Jesus showimaot “example for [iumi] barava followim gud.”—1 Peter 2:21.
DIG GO MOA
Bae iumi storyim Jesus talemaot gud nius lo pipol and duim olketa mirakol.
4. Jesus talemaot gud nius lo pipol
Jesus wakabaot for staka handred kilometer followim olketa road wea dust tumas, for trae for kasem staka pipol for talemaot gud nius lo olketa. Readim Luke 8:1, then discussim tugeta olketa kwestin hia:
-
Hao, Jesus preach nomoa lo pipol wea kam lo hem?
-
Wat nao Jesus duim for faendem pipol?
God sei Messiah bae talemaot gud nius. Readim Aesaea 61:1, 2, then discussim tugeta olketa kwestin hia:
-
Wat nao Jesus duim wea mekem disfala profesi kamap tru?
-
Iu tingse pipol distaem needim datfala gud nius?
5. Jesus teachim olketa important advaes
Taem Jesus preachim gud nius abaotem Kingdom blo God, hem teachim tu olketa important advaes. Bae iumi storyim samfala advaes from famous Sermon blo hem lo Maunten. Readim Matthew 6:14, 34 and 7:12, then discussim tugeta olketa kwestin hia:
-
Wat nao olketa important advaes wea Jesus storyim lo olketa verse hia?
-
Iu tingse disfala advaes savve helpem pipol distaem?
6. Jesus duim olketa mirakol
Jehovah givim paoa lo Jesus for duim staka mirakol. For lukim wanfala example, readim Mark 5:25-34 or pleim VIDEO. Then discussim tugeta olketa kwestin hia.
-
Olsem iumi lukim lo video, wat nao datfala woman wea sik bilivim?
-
Wat nao iu laekem abaotem disfala mirakol?
Readim John 5:36, then discussim tugeta disfala kwestin:
-
Wat nao olketa mirakol wea Jesus duim showimaot abaotem hem?
Maet iu laek savve
Staka samting wea iumi savve abaotem Jesus, fofala Gospel hia, Matthew, Mark, Luke, and John nao storyim. Each raeta lo olketa Gospel hia storyim olketa difren samting abaotem Jesus, wea mekem iumi savve lo staka interesting samting abaotem laef blo Jesus.
-
MATTHEW
raetem Gospel blo hem firstaem. Gospel hia storyim staka samting wea Jesus teachim, especially olketa samting abaotem Kingdom blo God.
-
MARK
raetem Gospel wea no garem staka chapter. Gospel hia storyim staka interesting samting wea happen.
-
LUKE
storyim prea hem important lo Jesus and hem kaen lo olketa woman.
-
JOHN
raet abaotem staka story blo Jesus witim olketa fren blo hem and olketa narawan, wea helpem iumi for savve lo wei blo hem.
SAMFALA SAVVE TALEM: “Jesus hem Olmaeti God.”
-
Hao nao tingting blo iu?
MAIN POINT
Jesus preach abaotem Kingdom blo God, duim olketa mirakol, and obeyim Jehovah nomata lo taem wea hem isi or hem hard.
Review
-
Wat nao important waka wea Jesus duim taem hem stap lo earth bifor?
-
Wat nao olketa mirakol wea Jesus duim showimaot?
-
Wat nao olketa advaes wea Jesus teachim wea savve helpem iumi?
FAENDAOT MOA
Wat nao main subject wea Jesus storyim evritaem?
“Kingdom Bilong God—Why Hem Important Long Jesus” (Wastaoa, November 1, 2014)
Read abaotem why iumi savve bilivim olketa mirakol blo Jesus olketa happen.
“Olketa Mirakol Bilong Jesus—Wanem Nao Iu Savve Lanem?” (Wastaoa, July 15, 2004)
Read abaotem wanfala man wea changem laef blo hem taem hem lanem hao Jesus barava tingim olketa nara pipol.
Read abaotem olketa main samting wea Jesus duim lo ministry blo hem followim taem wea olketa happen.
“Olketa Big Samting wea Happen Long Laef Bilong Jesus Long Earth” (Tul for Studyim Bible, 4-A—4-H)
a Leson 31-33 bae explainim gud moa disfala Kingdom blo God.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
