LECCIÓN 16
¿Chajariik xubʼan i Jesús noq xwihʼik wach akʼal?
Wilik inkikapaaj chi reʼ Jesús xa jenaj kʼisa neeʼ, jenaj jalal ruqʼorbʼal i Dios oon jenaj winaq xa kimik chik reh. Xa reʼ laʼ, mi xqatijej chi riij i rukʼachariik ayuʼ wach akʼal ¿ne na inqanabʼeej wach chi korik? Chupaam i tijinik wilih naqatzʼirim riij juʼjun taqeh rubʼanooj i Jesús eh nikʼwach ne tirutobʼeej i hat.
1. ¿Ahaʼ wilik i kamanik aajwaal wach xubʼan i Jesús?
Reʼ kamanik aajwaal wach xubʼan i Jesús reʼ i ruqʼorariik «i akʼ kʼuhbʼaal reʼ i runimaal i rajaawriik i Dios» keh taqeh kʼachareel (chawil Lucas 4:43). Xuqʼor rubʼiral chi reʼ Dios na naq rupahbʼaam jenaj reyiil oon ajaawriik reʼ naq i narusacham wach chuʼnchel taqeh kʼaxkilal kiʼikʼik wiiʼ taqeh kʼachareel. a Chuwach i ixibʼ haabʼ ruukʼ waqiibʼ poh reʼ Jesús xuqʼor i akʼ kʼuhbʼaal keh taqeh kʼachareel (Mateo 9:35).
2. ¿Chajariik xuyeew chi nabʼjik taqeh sachbʼal kʼuxliis xubʼan i Jesús?
Reʼ Santo Laj Huuj inqʼorik chi riij taqeh «i runimaal sachbʼal kʼuxliis, taqe i maʼ ilooj taj, taqe i ehtalil xubʼan i Dios parubʼihnaal i Jesús» (Hechos 2:22). Ruum chi reʼ Dios xuyeew rajaawriik i Jesús xubʼan chi xumay jenaj kowlaj jabʼ, xuket kʼihaal chi kʼachareel, xroqʼomaj taqeh yowaabʼ, eh xuksaj taqeh kamnaq (Mateo 8:23-27; 14:15-21; Marcos 6:56; Lucas 7:11-17). Ruukʼ taqeh sachbʼal kʼuxliis xubʼan i Jesús xuyeew chi nabʼjik chi reʼ Dios taqʼanik cho reh. Xukʼuhtaaj woʼ hoq chi reʼ Jehová wilik rajaawriik reh rusachariik wach chuʼnchel taqeh qakʼaxkilaal.
3. ¿Chajariik ne inqatijej ruukʼ i rukʼachariik i Jesús?
Reʼ Jesús juneliik xunimaj i Jehová (chawil Juan 8:29). Pan chuʼnchel i rukʼachariik reʼ Jesús xukʼuhtaaj chi korik wach rukʼux ruukʼ i rajaaw noq xubʼan chuʼnchel xpahqaljik reh atoobʼ ta wilik inixowanik naq reh. Ruukʼ i rukʼachariik i Jesús ne inqatijej chi reʼ taqeh kʼachareel ne inqaloqʼej i Dios atoobʼ ta ne qojikʼik pan kʼaxkilal. Jeʼ wilih, reʼ Jesús xukʼuhtaaj qeh chi naqakʼamam naah «i xubʼan i reh» (1 Pedro 2:21).
CHATZʼIR RIIJ I KʼAHCHIʼ ATIJEM
Qil nikʼwach naq ruqʼorariik i akʼ kʼuhbʼaal irubʼan i Jesús eh taqeh sachbʼal kʼuxliis irubʼan.
4. Reʼ Jesús xuqʼor taqeh atoobʼ laj qʼorik chi riij i runimaal rajaawriik i Dios
Reʼ Jesús najt naq inbʼehik chuwach taqeh bʼeeh nunjinaq chi pooq reh ruqʼorariik i kʼuhbʼaal keh chuʼnchel taqeh kʼachareel. Chawil taq i Lucas 8:1 eh tiqʼoroq taq chi riij:
-
¿Reʼ Jesús xa iruchih na naq, ajwach eh naruqʼorom i kʼuhbʼaal?
-
¿Ahaʼ xooj rusikʼ taqeh kʼachareel i Jesús?
Reʼ Dios xuqʼor chi reʼ Sikʼooj wach na naq ruqʼorom i atoobʼ laj qʼorik. Chawil taq Isaías 61:1, 2 eh tiqʼoroq taq chi riij:
-
¿Nikʼwach xooj eloq wach ruukʼ i Jesús i qʼorooj cho rubʼiral wilih?
-
¿Inaqʼor na i hat chi reʼ taqeh kʼachareel ko ruman chi ne inkibʼiraj i atoobʼ laj qʼorik wilih?
5. Reʼ Jesús xukʼuhtaaj taqeh naʼojbʼal ko inkamanik yuʼnaak
Reʼ Jesús xqʼorik chi riij i atoobʼ laj qʼorik chi riij i runimaal rajaawriik i Dios, eh xukʼuhtaaj woʼ hoq taqeh naʼojbʼal inkamanik yuʼnaak. Qil juʼjun taqeh ehtalil isamaj pan kʼuhbʼalinik xubʼan chi naah i yuuqʼ. Chawil taq Mateo 6:14, 34 eh 7:12, eh tiqʼoroq taq chi riij:
-
¿Ahaʼ wilik taqeh naʼojbʼal xuyeew i Jesús chupaam taqeh versículo wilih?
-
¿Inaqʼor na i hat chi reʼ taqeh naʼojbʼal wilih ne irutobʼeej taqeh kʼachareel yuʼnaak?
6. Reʼ Jesús xubʼan taqeh i sachbʼal kʼuxliis
Reʼ Jehová xuyeew rajaawriik i Jesús reh chi ne rubʼan taqeh i sachbʼal kʼuxliis. Jenaj ehtalil, chawil taq Marcos 5:25-34 oon chawil taq i VIDEO. Chi riij i reʼ tiqʼoroq taq chi riij:
-
Jeʼ rukabʼ xawil pan video, ¿chajariik xubʼan ixoq reh chi ne inqʼomjik ruum i Jesús?
-
¿Chajariik xponik chawach chi riij i sachbʼal kʼuxliis wilih?
Chawil taq Juan 5:36 eh tiqʼoroq taq chi riij:
-
¿Chajariik irukʼuhtaaj taqeh sachbʼal kʼuxliis xubʼan i Jesús?
¿Mi awehtʼal naq?
Reʼ qehtʼal chi riij i Jesús inqareq chupaam i kijibʼ chi huuj reh i Santo Laj Huuj irubʼihnaleej taqeh Evangelio. Reʼ taqeh xitzʼihbʼanik reh i kijibʼ chi Evangelio, Mateo, Marcos, Lucas eh Juan, reh reh wach xkitzʼihbʼaaj chi riij i rukʼachariik i Jesús xa reʼ laʼ irukʼam riibʼ eh irukʼuhtaaj qeh i rukʼachariik i Jesús ayuʼ wach akʼal.
-
REʼ MATEO
reʼ reh i peet xutzʼihbʼaaj jenaj reh i Evangelio. Reʼ ruhuuj inqʼorik chi riij i rukʼuhtaniik i Jesús, jeʼ rukabʼ noq xqʼorik chi riij i runimaal rajaawriik i Dios.
-
REʼ MARCOS
xutzʼihbʼaaj i Evangelio reʼ maʼ kʼih ta paam. Xa reʼ laʼ reʼ xutzʼihbʼaaj ne irusach akʼux.
-
REʼ LUCAS
iruqʼor chi reʼ tiij ko ruman eh chi reʼ Jesús iruyeew kiloqʼil taqeh ixoq.
-
REʼ JUAN
inqʼorik chi riij i runaʼojbʼal i Jesús, ruum chi irukʼuhtaaj nikʼwach xuqʼoreej taqeh ramigo eh taqeh kʼachareel.
REʼ INKIQʼOR I JUʼJUN: «Reʼ Jesús xa jenaj naq atoobʼ laj winaq».
-
¿Chajariik inaqʼor i hat?
KʼOLOQ PAN AKʼUX
Reʼ Jesús xqʼorik chi riij i runimaal rajaawriik i Dios, xubʼan taqeh sachbʼal kʼuxliis eh juneliik xunimaj i Jehová.
Reʼ xkahnik pan akʼux
-
¿Ahaʼ wilik i kamanik aajwaal wach xubʼan i Jesús noq xwihʼik wach akʼal?
-
¿Chajariik xuyeew chi nabʼjik taqeh sachbʼal kʼuxliis xubʼan i Jesús?
-
¿Chajariik chi naʼojbʼal xukʼuhtaaj i Jesús ko inkamanik yuʼnaak?
CHAREQ RUMAN
¿Chi riij chajariik xqʼorik i Jesús?
Chawil chaaj woʼ reet inqakoj qakʼux chi reʼ Jesús xubʼan taqeh sachbʼal kʼuxliis.
Chawil nikʼwach xujal i rukʼachariik jenaj winaq noq xutijej chi riij taqeh naʼojbʼal xuyeew i Jesús chi naah i yuuq.
«Xa reʼ naq i kʼaxbʼal wiibʼ inusikʼ i hin» (La Atalaya, 1 reh octubre reh 2014)
Chawil chi riij i rukʼachariik eh i rukamaj i Jesús chi tuslik wach.
«Reʼ rukʼachariik i Jesús ayuʼ wach akʼal» (La Biblia. Traducción del Nuevo Mundo, apéndice A7)
a Pan lección 31 ko 33 iruchʼobʼ rubʼehel chajariik i runimaal rajaawriik i Dios.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
