IREN MEHN KASUKUHL 16
Dahme Sises Ketin Wia ni Eh Ketiket nin Sampah?
Aramas tohto kin medewehki Sises nin duwen seri pwelel men, soukohp men de ohl emen me pahn melahr. Ahpw ia duwe, kitail kak kalaudehla atail esehla ih ni atail kasawih mwomwen sapwellime mour nin sampah? Nan iren mehn kasukuhl wet, kitail pahn tehkpene ekei soahng kesempwal kan me Sises ketin wia oh ia duwen mepwukat eh kak seweseiuk.
1. Mehnia doadoahk me keieu kesempwal ong Sises?
Sapwellimen Sises doadoahk me keieu kesempwal iei en ‘lohki rongamwahu en Wehin Koht.’ (Wadek Luk 4:43.) E kin ketin kalohki rongamwahwo me Koht pahn ketin kauwada wehi ehu, de koperment me pahn kamwahwihala en aramas akan kahpwal koaros. a Erein sounpar siluh elep, Sises kin ketin doadoahk laud pwehn padahkihong aramas akan rohng kangoang wet.—Madiu 9:35.
2. Dahme kahrehda Sises ketin wiahda manaman kan?
Paipel mahsanih me Koht ketin doadoahngki Sises en ketin wiahda “manaman kan oh soahng kapwuriamwei kan oh kilel kan.” (Wiewia 2:22) Sang ni sapwellimen Koht manaman, Sises kak ketin kameleileidi melimel laud ehu, katungoale aramas kid, kamwahwihala me soumwahu oh pil kaiasada me melahr kan. (Madiu 8:23-27; 14:15-21; Mark 6:56; Luk 7:11-17) Sapwellimen Sises manaman kan kasansalehda me Koht me ketin poaronehdo ih. Mepwukat pil kasalehda me Siohwa ketin sapwellimanki manaman en kamwahwihala atail kahpwal kan koaros.
3. Dahme kitail kak sukuhlkihsang mwomwen sapwellimen Sises mour?
Sises kin ketin peikiong Siohwa ahnsou koaros. (Wadek Sohn 8:29.) Mendahki uhwong kan, Sises kin ketin wia mehkoaros me Semeo ketin kupwurki en wia, lao e ketin pwoula. E ketin kasansalehda me aramas akan kak papah Koht, mehnda ma re mi nan irair apwal akan. Eri, Sises ketikihdi “mehn kahlemeng ehu pwe [kitail] en idawehn mwahu dahme e kin ketin wia.”—1 Piter 2:21.
KALAUDEHLA OMW ESE MET
Medewehla duwen Sises eh ketin padahkihong aramas akan rongamwahwo oh wiahda manaman kan.
4. Sises ketin padahkihong aramas akan rongamwahwo
Sises kin ketin alialuhki mwail epwiki kei pohn ahl pwelpar kan oh padapadahkihong aramas tohto duwen rongamwahwo ni uwen me e kak. Wadek Luk 8:1, oh mwuri koasoiapene peidek pwukat:
-
Sises kin ketin kalohkohngete aramas akan me kin kodohng rong ih?
-
Dahme Sises kin ketin nantihong wia pwehn diar aramas akan?
Koht ketin kohpada me Mesaiao pahn lohki rongamwahu. Wadek Aiseia 61:1, 2, oh mwuri koasoiapene peidek pwukat:
-
Ia duwen Sises eh ketin kapwaiada kokohp wet?
-
Ke medewe me aramas akan rahnwet anahne rong rongamwahu wet?
5. Sises kin ketin padahngki kaweid mwahu kan
Patehngete kalohki rongamwahu en Wehin Koht, Sises kin ketin padahngki kaweid mwahu kan. Tehk ekei karasepe kan sang sapwellime Kapahrek en Pohn Dohl me aramas tohto kin ese. Wadek Madiu 6:14, 34 oh 7:12, oh mwuri koasoiapene peidek pwukat:
-
Soangen kaweid mwahu dah kan me Sises ketikihda nan iretikitik pwukat?
-
Ke medewe me kaweid pwukat kak sewese aramas akan rahnwet?
6. Sises ketin wiahda manaman kan
Siohwa ketin wiahiong Sises en kak wiahda manaman tohto. Kilang ehu karasepen met, wadek Mark 5:25-34 de kilang KISIN KASDO. Mwuri koasoiapene peidek pwukat.
-
Dahme lih soumwahwo kamehlele?
-
Dahme ke mwahuki sang nan manaman wet?
Wadek Sohn 5:36, oh mwuri koasoiapene peidek wet:
-
Dahme sapwellimen Sises manaman kan “kadehdehda” duwen ih?
Ke ese met?
Pali laud en soahng kan me kitail ese duwen Sises kohsang nan pwuhken Rongamwahu pahieu ko, Madiu, Mark, Luk oh Sohn. Emenemen sounnting en Rongamwahu ko kasalehda oaritik kan duwen Sises me wekpeseng. Ni atail wadek pwuhk pahieu pwukat koaros, kitail kak medewehla mwomwen sapwellime mour.
-
MADIU
me ntingihedi keieun pwuhken Rongamwahwo. E padahkihong kitail duwen sapwellimen Sises padahk kan, ahpw mehlel me pid duwen Wehin Koht.
-
MARK
me ntingihedi pwuhken Rongamwahu me keieu mwotomwot. E koasoia mwekid kapwuriamwei tohto.
-
LUK
padahkihong kitail uwen Sises eh kin ketin kesempwalki kapakap oh duwen eh kin ketin kadekohng lih akan.
-
SOHN
padahkihong kitail soahng tohto me Sises mahsanihong kompoakepah keren kan oh meteikan. Met sewese kitail en ese soangen aramas dah men Sises.
EKEI ARAMAS KIN NDA: “Sises wiahte aramas mwahu men, ahpw kaidehn ih me Mesaia.”
-
Ia omw madamadau?
DAHME KE SUKUHLKIER
Sises ketin kalohki Wehin Koht, wiahda manaman kan oh peikiong Siohwa ahnsou koaros.
Kousapahl
-
Mehnia doadoahk me keieu kesempwal ong Sises ni eh ketiket nin sampah?
-
Dahme sapwellimen Sises manaman kan kin kadehdehda?
-
Soangen kaweid mwahu dah kan me Sises kin ketin padahngki?
PIL TEHK
Mehnia oaralap me Sises kin ketin kalapw mahsanih duwe?
“Wehin Koht—Dahme Kahrehda E Kesempwal ong Sises” (Kahn Iroir, October 1, 2014)
Kilang dahme kahrehda kitail kak kamehlele me sapwellimen Sises manaman kan uhdahn wiawi.
“Sapwellimen Sises Manaman Akan Dahme Ke Kak Sukuhliki?” (Kahn Iroir, February 1, 2005)
Wadek duwen sapwellimen Sises mehn kahlemeng en tounmetei eh kamwakid emen ohl.
“My Life Was All About Me” (The Watchtower, October 1, 2014)
Kilang kairekdien soahng kesempwal kan me Sises ketin wia nan kalohk.
a Iren Mehn Kasukuhl 31-33 pahn koasoia oaritik kan me pid Wehin Koht.
