LISON 16

Ke ku Jesus fasi ocal na Tera?

TOKA

Manga di jintis ta pensa na Jesus suma un mininu ku ka pudi difindi si kabesa, un profeta jiru, un omi ku sta kuas pa muri. Ma sera ki no pudi aprindi mas aserka del si no studa si vida li na Tera? Nes lison, no na bin aprindi alguns kusas mas importanti ku Jesus fasi i kuma ke pudi judau.

1. Kal ki tarbaju mas importanti ku Jesus fasi?

Tarbaju mas importanti ku Jesus fasi i di “konta Bon Noba di renu di Deus”. (Lei Lukas 4:43.) I ta konta bon noba di kuma Deus na tisi Renu o guvernu, ku na rosolvi purblemas na tudu parti di mundu. a Duranti tris anu i meiu, Jesus tarbaja risu pa konta jintis es bon noba ku ta anima. — Mateus 9:35.

2. Ke ku manda Jesus fasi milagris?

Biblia fala di manga di ‘kusas garandi, ku milagris, ku sinal ku Deus fasi’ atraves di Jesus. (Atus 2:22) Deus da Jesus puder, di para turbada garandi, alimenta manga di jintis, kura duentis, te mesmu lantanda kilis ku muri. (Mateus 8:23-27; 14:15-21; Markus 6:56; Lukas 7:11-17) Milagris di Jesus mostra klaru di kuma i Deus ku mandal. Tambi i ta mostra di kuma Jeova tene puder pa rosolvi tudu no purblemas.

3. Ke ku no pudi aprindi di vida di Jesus?

Jesus obdisi Jeova na tudu situasons. (Lei Jon 8:29.) Jesus fasi tudu kusas ku si Pape pidil pa fasi, i fasil duranti si vida na Tera mesmu oca manga di jintis tenta paral. I mostra di kuma i pusivel pa pekaduris sirbi Deus mesmu si e na pasa situasons difisil. Asin, Jesus disanu ‘isemplu pa no yanda na si pe.’ — 1 Pedru 2:21.

APRINDI MAS

Jubi kuma ku Jesus konta bon noba i kal milagris ki fasi.

4. Jesus konta bon noba

Jesus yanda manga di kilometrus na kamiñu ku tene puera, pa konta bon noba pa manga di jintis. Lei Lukas 8:1, dipus bo kombersa aserka des purguntas:

Sera ki Jesus konta bon noba so pa jintis ku bin nunde el pa sukutal?
Kal sforsu ku Jesus fasi pa buska jintis?

Deus falaba ja di kuma Mesias na konta bon noba. Lei Isaias 61:1, 2, dipus bo kombersa aserka des purguntas:

Kuma ku Jesus kumpri es profesia?
Bu pensa kuma jintis aos pirsisa di sukuta es bon noba?

5. Jesus sina kusas importanti

Alen di prega bon noba aserka di Renu di Deus, Jesus sina kusas ku pudi judanu na no vida di kada dia. Jubi alguns izemplu di kusas ki sina na Sermon di Monti i ku fika na storia. Lei Mateus 6:14, 34 ku 7:12, dipus bo kombersa aserka des purguntas:

Kal bon konsijus ku Jesus da nes versikulus?
Ke ku bu pensa, sera ki es konsijus pudi juda jintis aos?

6. Jesus fasi milagris

Jeova da Jesus puder di fasi manga di milagris. Pa oja un izemplu di kila, lei Markus 5:25-34 o mostra VIDEO. Dipus bo kombersa aserka des purguntas:

VIDEO: Un Minjer ku Staba Duenti Kuradu (5:10)

Na video, ke ku es minjer duenti staba konvensidu del?
Kal kusa ku mas tokau nes milagri?

Lei Jon 5:36, dipus bo kombersa aserka des purgunta:

Milagris di Jesus ta da kal “tustumuñu”, o ke ki ta prova aserka del?

Sera ki bu sibiba kuma?

Maioria di kusas ku no aprindi aserka di Jesus bin di kuatru livrus di Biblia comadu di Ivanjeliu ku sedu Mateus, Markus, Lukas ku Jon. Kada un des skirbidur di Ivanjeliu fala di kusas diferenti aserka di Jesus. Ora ku no lei tudu es kuatru livrus no ta tene un ideia klaru di vida di Jesus.

MATEUS

skirbi purmeru livru. I kontanu manga di kusas ku Jesus sina, spesialmenti ke ki sina aserka di Renu di Deus.
MARKUS

skirbi Ivanjeliu mas kurtu. I fala di akontisimentus ku ta miŝi ku no emoson.
LUKAS

kontanu kuma ku orason seduba importanti pa Jesus i kuma ki ta trataba minjeris ku bondadi.
JON

kontanu manga di kusas ku Jesus papia ku si amigus intimu i ku utrus. Kila ta judanu sibi kal tipu di algin ku Jesus sedu.