16 CAJ YACHACUY
¿Imatataj Jesús rurargan cay Pachacho cashgan wichan?
Jesuspaj parlarmi waquincuna nipäcun juc itila, juc profetala o may chaypa puricoj runala cashganta. Ichanga paytaga reguishun cay Pachacho caycar imano cashganpita yachacurmi. Yachacunapaj canga ima alicunatataj Jesús rurash y paypita yachacushgayquega imanotaj gamta yanapäshunquiman.
1. ¿Imatataj cushishgala Jesús ruraj?
Taytan mandashganpaj parlarmi Jesús cayno nej: “Ali wilacuyninta waquin marcacunachöpis wilacunämi caycan” (leiriy Lucas 4:43). Payga yachachicurgan Taytan juc Gobiernuta camacächir lapan nacaycunata ushacächinanpaj. a Quimsa watapita más quillacuna pasashgancamami may chaypa ali wilacuyta apargan (Mateo 9:35).
2. ¿Ima raycur-raj milagrucunata Jesús rurargan?
Bibliami nin: “Jesustami Tayta Dios yanapargan mana ricashganchi milagrucunata [...] rurananpaj” (Hechos 2:22). Chauraga Diospa poderninwanmi Jesusga wayra pücaycämojta pararachergan, achca runacunatapis micuchergan, gueshyaycajcunatapis jampergan y waquin wanushga cajcunatapis cawarachimurgan (Mateo 8:23-27; 14:15-21; Marcos 6:56; Lucas 7:11-17). Claro caycan, Jesusta mandamushganchomi, Jehová alapa poderniyoj cashgan ricacämurgan, alicunata rurananpäga imapis michanmantäcu cargan.
3. ¿Imatataj yachacunchi Jesús imano cawashganpita?
Papäninta cäsucuycarlami Jesusga cawacoj (leiriy Juan 8:29). Waquincuna pasaypa michaycaptinpis wanushgancamami Taytan mandashganta rurargan, yäracuynenga mana juchoj gaga japuy cargan. Cawayninpita yachacunchi imayca mana alicunapa pasar paynola ali yäracur aguantanapaj. Paylatami gatinanchi, payga “tantiyachimashcanchi ñacarpis mana jagayaypa cawanapaj” (1 Pedro 2:21).
SHUMAJ YACHACURCUNAPAJ
Ricärishun imanotaj ali wilacuyta Jesús apargan y milagrucunatapis rurashganta.
4. Jesusga ali cajcunatami wilacurgan
Tamyachopis usyachopis Jesusga Diospa ali wilacuyninta may chaypa apargan. Leipäcuy Lucas 8:1 y caycunapita parlapacäriy:
-
¿Runacuna payman shamunantarächu Jesús shuyaraj yachachinanpaj?
-
¿Imatataj Jesús ruraj runacunata ashinanpaj?
Diosga wilacurganna acrashgan Mesías ali wilacuyninta apananpaj. Leipäcuy Isaías 61:1, 2 y caycunapita parlapacäriy:
-
Cay texto nishgannola, ¿imacunatataj Jesús rurargan?
-
¿Canan wichan runacunatapis musyachishwanchuraj chay ali wilacuycunata?
5. Ali cawacunapäpis yachachicurganmi
Ali wilacuycunapita yachachicurpis, imano ali cawacunapäpis Jesusga consejacurganmi. Juc jircaman wichaycur ima yachachicushganta mä ricärishun. Leipäcuy Mateo 6:14, 34 y 7:12 y caycunapita parlapacäriy:
-
¿Ima ali consejucunataj Jesuspita caycan?
-
¿Consejacushganga alichu caycan canan wichan runacunapäpis?
6. Jesusga achca milagrucunata rurargan
Jehovapa poderninwanmi achca milagrucunata rurargan. Chaypaj parlan Marcos 5:25-34, leipäcuy; o VIDEUTA ricapäcuy y caycunapita parlapacäriy:
-
¿Chay warmiga ima pasananpätaj yäracuycargan?
-
¿Ima ninquitaj ali shongulanwan Jesús rurashganpita?
Leipäcuy Juan 5:36 y caypita parlapacäriy:
-
¿Imataj musyachimanchi Jesuspa milagruncuna?
¿Mayashcanquichu?
Jesuspa vidanpitaga cay chuscu librucunami wilacun: Mateo, Marcos, Lucas y Juan; y chay juticunatami guelgajnincunapis apan. Paycunami Jesús lapan rurashganta wilacäramurgan cawayninpita shumaj yachacunapaj.
-
MATEO
Payga más naupa cajcho Jesuspita guelgash. Librunchoga Diospa Gobiernunpita Jesús ima yachachicushganta ali wilacun.
-
MARCOS
Walcalata escribimushga captinpis, leiptinchega cushircachimanchimi.
-
LUCAS
Mañacunapaj cajpita y warmicunata Jesús ali tratashganta wilacun.
-
JUAN
Jesús imano cashganpita wilacun, payga cuyapajshi amiguncunata y waquin runacunatapis.
WAQUINCUNA NIPÄCUN: “Jesusga waquincunanopis ali runalami cash”.
-
¿Ima ninquitaj gam?
ICHIC YACHACUY
Jesusga Diospa Gobiernunpita yachachicush, milagrucunata rurash y Taytan Jehovata cäsucuycarla cawash.
Yarpänapaj
-
¿Imatataj cushishgala cay Pachacho caycar Jesús rurargan?
-
¿Imatataj musyacächergan Jesuspa milagruncuna?
-
¿Jesusga ima ali consejucunatataj gorgan?
MASLATA YACHACUNAYQUIPAJ
¿Imapitataj Jesusga más yachachicoj?
“¿Imanirtaj Jesús alapa yarpachacoj Diospa Gobiernunlaman?” (Wilacamoj, 1 octubre quilla, 2014)
¿Jesús milagrucunata rurashganga rasunpachu cargan? Chaypita yachacuy.
“¿Imataj yachacunqui Jesús rurashgan milagrucunapita?” (Wilacamoj, 15 julio quilla, 2004)
Juc runapita yachacuy, Jesuspita yachacushgan imanotaj yanapargan cambiananpaj.
“Quiquiläman más yarpachacoj cä” (Wilacamoj, 1 octubre quilla, 2014)
Yachacuy Jesús winaycashganmanno ima pasashgancunata.
“Pachacho caycar imano Jesús cawashgan” (La Biblia. Traducción del Nuevo Mundo, apéndice A7)
a 31-33 yachacuycunacho masraj yachacushun Diospa Gobiernunpita.
