16 YACHACHIKUY
¿Imatam Jesus ruwarqa kay pachapi kachkaspan?
Achka runakunam Jesusmanta rimaspankuqa piensanku wawallaraq kasqanpi, maqapasqa hinaspa warkusqa kasqanpi, piensankutaqmi Jesusqa yachaysapa runalla kasqanpipas. Ichaqa paymantam sumaqta yachachwan kay pachapi kaspan imakuna ruwasqanmanta yachaspa. Kay yachachikuypim yachasun Jesuspa imakuna ruwasqanmanta, hinaspa chaykunamanta yachasqayki imaynata yanapasunaykimanta.
1. ¿Imata ruwananpaqmi Jesusqa astawan kallpanchakurqa?
Jesusqa anchatam kallpanchakurqa Diospa gobiernonmanta lliw runakunaman yachachinanpaq (leey Lucas 4:43). Yachachirqam runakunata Dios kamachimuspan sasachakuyninchikkunata allichananmanta. a Kimsa wata partenmi chay sumaq willakuymanta Jesusqa runakunaman tukuy tiemponwan yachachirqa (Mateo 9:35).
2. ¿Imapaqtaq Jesusqa milagrokunata ruwarqa?
Bibliapim willawanchik Diosqa ‘mana pipapas ruway atisqanta hinaspa admirakuypaq milagrokunata [Jesuswan] ruwachisqanmanta’ (Hechos 2:22). Diospa atiyninwanmi Jesusqa sinchi wayra-parata sayarachirqa, waranqantin runakunaman mikuchirqa, unquqkunata hampirqa hinaspa wañusqakunatapas kawsarichirqa (Mateo 8:23-27; 14:15-21; Marcos 6:56; Lucas 7:11-17). Chay milagrokunata ruwasqanwanmi yachanchik Jesusqa Diospa churin kasqanta, yachanchiktaqmi Jehova Dios sasachakuykunata allichananpaq atiyniyuq kasqanta.
3. ¿Imakunapim Jesusta qatipakuchwan?
Jesusqa tukuy imapim Jehova Diosta kasukurqa (leey Juan 8:29). Wañukunankamam Diosman sunqu karqa, hinaspapas chiqniqninkuna michakuptinkupas Diospa tukuy kamachisqantam ruwarqa. Jesuspa Diosman sunqu kasqanwanmi yachanchik runakunapas ima sasachakuyña kaptinpas Diosta hinalla serviy atisqanchikta. Jesusqa ‘qatipakunapaq hinam kawsakurqa, chaynapi imayna kasqanta allintapuni qatipakunanchikpaq’ (1 Pedro 2:21).
ASTAWAN YACHAYKUSUN
Yachaykusun sumaq willakuykunamanta Jesuspa imayna yachachisqanta hinaspa milagrokunata ruwasqanmanta.
4. Sumaq willakuykunamantam Jesusqa yachachirqa
Jesusqa llaqtan-llaqtanmi purirqa Diosmanta willakustin. Leeychik Lucas 8:1 hinaspa qatiqninmanta rimariychik:
-
¿Asuykuqninkunallamanchu Jesusqa yachachirqa?
-
¿Maykunamanmi Jesusqa rirqa runakunata tarinanpaq?
Diosqa nirqañam Cristoqa utaq akllasqan runaqa allin willakuyta willakunanmanta. Leeychik Isaias 61:1, 2 hinaspa qatiqninmanta rimariychik:
-
¿Imaynatam Jesusqa cumplirqa Isaiaspa willakusqanta?
-
Chay allin willakuykunamanta uyariyninkuqa ¿allinchu kanman kunan tiempopi runakunapaqpas?
5. Jesusqa allinta kawsakunapaqmi yachachirqa
Runakunata Dios kamachimuptin sumaq kawsakuymantam Jesusqa willakurqa, yachachirqataqmi imakunata ruwaspa allinta kawsakunamantapas. Yachaykusunchik Jesuspa ancha riqsisqa yachachikuyninpi ima nisqanmanta. Leeychik Mateo 6:14, 34; 7:12 hinaspa qatiqninmanta rimariychik:
-
¿Ima yachachikuykunatam kay leesqanchikpi tarinchik?
-
¿Kay yachachikuykunaqa yanapanmanchu kay tiemponchikpi runakunatapas?
6. Jesusqa milagrokunatam ruwarqa
Jehova Diosmi Jesusman atiyta qurqa achka milagrokunata ruwananpaq. Chaymanta yachaykunapaq leeychik Marcos 5:25-34 utaq VIDEOTA qawaykuychik hinaspa qatiqninmanta rimariychik:
-
Videopi qawasqanchikman hinaqa ¿imamantam warmichaqa mana iskayrayarqachu?
-
Jesuspa chay milagro ruwasqanmanta, ¿ima niwaqtaq?
Leeychik Juan 5:36 hinaspa qatiqninmanta rimariychik:
-
¿Imamantam mana iskayrayanchikchu Jesuspa milagrokunata ruwasqanwanqa?
Yachaykunaykipaq
Jesuspa vidanmantam willawanchik bibliapa tawa libronkunapi, chay librokunata qillqaqkunam karqaku Mateo, Marcos, Lucas hinaspa Juan. Paykunaqa Jesuspa vidanmantam sapakama qillqarqaku, chaywanpas qillqasqankuqa tupanmi, chaymi allinta yachanchik Jesuspa vidanmanta.
-
MATEO
Paymi puntata qillqarqa Jesuspa vidanmanta. Chay libropiqa willawanchikmi Jesus imakuna yachachisqanmanta, Jesusqa astawanqa willakurqa runakunata Dios kamachimunanmantam.
-
MARCOS
Payqa asllatam qillqarqa Jesuspa vidanmantaqa, ichaqa qillqasqankunaqa anchatam yanapawanchik.
-
LUCAS
Payqa qillqarqa Jesusqa Diosta sapa kuti mañakusqanmantam hinaspa warmikunata respetasqanmantam.
-
JUAN
Payqa qillqarqa amistadninkunawan hinaspa huk runakunawanpas Jesuspa imayna rimasqanmantam, chaywanmi yachanchik Jesusqa imayna sunquyuq kasqanmanta.
WAKIN RUNAKUNAM NINKU: “Jesusqa allin runallam karqa, manam Diospa churinchu”, nispanku.
-
Qamqa ¿ima ninkitaq?
YUYARIYKUSUN
Jesusqa Dios kamachimunanmantam willakurqa, milagrokunatam ruwarqa hinaspapas tukuy imapim Jehova Diosta kasukurqa.
¿Ima niwaqtaq?
-
¿Imapaqtaq Jesusqa astawan kallpanchakurqa kay pachapi kachkaspan?
-
¿Imamantam mana iskayrayanchikchu milagrokunata ruwananpaq Jesus atiyniyuq kasqanrayku?
-
¿Imayna kawsakunapaqmi Jesusqa yachachiwarqanchik?
ASTAWAN YACHANAYKIPAQ
¿Imamantataq Jesusqa astawan yachachirqa? Chaymanta kaypi leey.
“¿Imanasqataq Jesusqa chaninchan Diospa Munaychakuynintaqa?” (Willakuq, noviembre-diciembre 2014)
Jesuspa ruwasqan milagrokunamanta mana iskayrayanaykipaq kay yachachikuyta leeykuy.
“¿Ima nichwantaq Jesuspa milagrokuna ruwasqanmanta?” (Willakuq, 15 julio 2004)
Jesusqa kikillanpi mana piensasqanmanta yachasqan imaynata kay runata yanapasqanmanta yachaykuy.
“Kikillayta kuyakuqmi karqani” (Willakuq, noviembre-diciembre 2014)
Qaway Diosmanta willakustin maylawkunapi hinaspa haykapi Jesus purisqanta.
“Kay pachapi Jesus kasqanmanta” (Musuq alla pachapi kawsaqkunapaq biblia, A7 yachachicuy)
a 31-33 yachachikuykunapim astawan yachasunchik Diospa gobiernonmanta.
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
